కొత్త చీఫ్​ టెక్నాలజిస్ట్​ను నియమించిన గూగుల్- ఆయన ఎవరో తెలుసా?

గూగుల్ చీఫ్ టెక్నాలజిస్ట్‌గా ప్రభాకర్ రాఘవన్‌- సీఈవో పిచాయ్ ప్రకటన

Google Appoints New Chief Technologist: గూగుల్ తన కొత్త చీఫ్ టెక్నాలజిస్ట్‌గా ప్రభాకర్ రాఘవన్‌ను నియమించింది. మైక్రోసాఫ్ట్, ఓపెన్‌ఏఐ వంటి టెక్ ప్రత్యర్థులు, పెర్‌ప్లెక్సిటీ వంటి అభివృద్ధి చెందుతున్న స్టార్టప్‌ల నుంచి పెరుగుతున్న పోటీని పరిష్కరించే లక్ష్యంగా ఈ నిర్ణయం తీసుకున్నట్లు కంపెనీ వెల్లడించింది. ఈ మేరకు గూగుల్ సెర్చ్, అసిస్టెంట్, యాడ్స్, కామర్స్, పేమెంట్స్​కు బాధ్యత వహిస్తున్న సీనియర్​ వైస్​ ప్రెసిడెంట్ ప్రభాకర్ రాఘవన్​ను చీఫ్ టెక్నాలజిస్ట్​గా నియమిస్తున్నట్లు గూగుల్ సీఈవో సుందర్ పిచాయ్ ప్రకటించారు. ఈ సందర్భంగా గత 12 సంవత్సరాలుగా రాఘవన్ చేసిన సేవలను గుర్తుచేస్తూ సీఈవో పిచాయ్ కొనియాడారు.

ప్రభాకర్ రాఘవన్ ఎవరు?: 64 ఏళ్ల ప్రభాకర్ రాఘవన్ టెక్నాలజీ ప్రపంచానికి కొత్తేమీ కాదు. ఆయన 2012లో గూగుల్‌లో చేరడానికి ముందు యాహూలో పనిచేశారు. అక్కడ సెర్చ్​, యాడ్ ర్యాంకింగ్, మార్కెట్​ప్లేస్​ డిజైన్​లో కీలక బాధ్యతలు నిర్వహించారు. ఆ తర్వత గూగుల్​లో చేరిన ఆయన కెరీర్ గూగుల్ యాప్స్​, గూగుల్​ క్లౌడ్​తో ప్రారంభమైంది. ఈ సమయంలో ఆయన స్మార్ట్​ రిప్లై అండ్ స్మార్ట్​ కంపోస్ వంటి ఏఐ- ఆధారిత ఫీచర్స్​ను ప్రారంభించడంలో కీలక పాత్ర వహించారు.

2018లో గూగుల్ సెర్చ్, అసిస్టెంట్, జియో, యాడ్స్, కామర్స్, పేమెంట్స్ ప్రొడక్ట్‌ల సీనియర్ వైస్ ప్రెసిడెంట్‌గా శ్రీధర్ రామస్వామి నుంచి రాఘవన్ బాధ్యతలు స్వీకరించారు. ఆయన నాయకత్వంలో లెన్స్‌లో AI ఓవర్‌వ్యూస్, వీడియో అవగాహన, 'Shop What You See' వంటి ముఖ్యమైన ఫీచర్‌లు ప్రవేశపెట్టారు. ఇవి యూజర్స్ అనుభవాన్ని మెరుగుపరచడంలో, సెర్చ్ అండ్ ఇ-కామర్స్​ స్పేస్​లో గూగుల్ డామినెన్స్​ను మరింత సాలిడ్​గా చేసేందుకు సహాయపడ్డాయి.