స్పామ్​ కాల్స్​/ మెసేజ్​లు వస్తున్నాయా? 'చక్షు' పోర్టల్​లో ఫిర్యాదు చేయండిలా!

Chakshu portal Launch : సైబర్ నేరాలను, ఆర్థిక మోసాలను అరికట్టేందుకు కేంద్ర ప్రభుత్వం 'డీఐపీ', 'చక్షు' అనే రెండు కొత్త పోర్టల్​లను ప్రారంభించింది. వీటి ద్వారా రియల్ టైమ్​లోనే సైబర్​ నేరాలను, ఆర్థిక మోసాలను కనిపెట్టడానికి వీలవుతుంది. పూర్తి వివరాలు మీ కోసం.

Chakshu portal Launch : టెక్నాలజీ పెరుగుతున్నకొద్దీ సైబర్ నేరాలు, ఆర్థిక మోసాలు విపరీతంగా పెరిగిపోతున్నాయి. వీటిని అరికట్టేందుకు కేంద్ర ప్రభుత్వం 'డీఐపీ' (DIP), 'చక్షు' (Chakshu) అనే రెండు సరికొత్త పోర్టల్​లను ప్రారంభించింది. ఈ రెండూ టెలికమ్యునికేషన్ విభాగం (DoT) ఆధ్వర్యంలో పనిచేస్తాయి.

DIP Portal : డిజిటల్ ఇంటెలిజెన్స్ ప్లాట్​ఫాం (డీఐపీ) అనేది ఒక బ్యాకెండ్​ మాడ్యూల్​. ఇది బ్యాంకులు, ఫోన్​పే వంటి యూపీఐ పేమెంట్స్​ యాప్​లు, టెలికాం సర్వీస్​ ప్రొవైడర్లు, వాట్సాప్​ లాంటి సోషల్​ మీడియా కంపెనీలతో రియల్​ టైమ్​ ఇంటెలిజెన్స్ షేరింగ్​ చేస్తుంది. అలాగే డాక్యుమెంట్​ ఇష్యూయింగ్​ అథారిటీస్​, లా ఎన్​ఫోర్స్​మెంట్ ఏజెన్సీల మధ్య కూడా రియల్ టైమ్ ఇంటెలిజెన్స్ షేరింగ్​ చేసి సైబర్​ క్రైమ్స్​ను అరికట్టేందుకు సహకరిస్తుంది.

ఉదాహరణకు ఒక ఫోన్​ నంబర్​ను సైబర్ ఫ్రాడ్ కోసం ఉపయోగిస్తున్నారని అనుకుందాం. అప్పుడు 'డీఐపీ అనేది పైన పేర్కొన్న అన్ని డిపార్ట్​మెంట్లకు ఈ విషయాన్ని ఒకేసారి పంపిస్తుంది. దీనితో సదరు ఫోన్ నంబర్​ను అన్ని ప్లాట్​ఫామ్​లు ఒకేసారి బ్లాక్​ చేయడానికి వీలవుతుంది.

అయితే ఈ డీఐపీ పోర్టల్ అనేది సాధారణ పౌరులకు అందుబాటులో ఉండదు. కానీ 'చక్షు' యాప్​లో సాధారణ పౌరులు చేసే ఫిర్యాదులను బ్యాకెండ్​లో సమీక్షిస్తుంది.

Chakshu Portal : సైబర్​ మోసాలపై ప్రజలు ఫిర్యాదు చేసేందుకు 'చక్షు' (హిందీలో కన్ను అని అర్థం) అనే పోర్టల్​ను కేంద్ర ప్రభుత్వం ప్రారంభించింది. ప్రజలు తమకు వచ్చిన అనుమానిత కాల్స్​, ఎస్ఎంఎస్​, వాట్సాప్​ మెసెజ్​లు గురించి ఇందులో రిపోర్ట్ చేయవచ్చు.

చక్షు పోర్టల్​లో ఇలా ఫిర్యాదు చేసిన వెంటనే, ​మీ ఫోన్ నంబర్​ను ధ్రువీకరించమని చెబుతుంది. మీరు మీ ఫోన్​ నంబర్​ను కచ్చితంగా చెప్పి, ధ్రువీకరించాల్సి ఉంటుంది. దీనితో మీ రిపోర్ట్​ను తీసుకుని ఇన్వెస్టిగేషన్ మొదలు పెడుతుంది. మీకు తగిన సాయం చేస్తుంది.

మనీ రిటర్న్​
కొన్ని సార్లు పొరపాటున పౌరుల బ్యాంకు ఖాతాలు స్తంభించిపోతుంటాయి. ఇలాంటి సందర్భాల్లో ఖాతాదారులు చాలా ఇబ్బందిపడుతూ ఉంటారు. ఈ సమస్యను పరిష్కరించేందుకు ఆర్​బీఐ, డిపార్ట్​మెంట్ ఆఫ్ ఫైనాన్సియల్​ సర్వీసెస్​తో 'చక్షు' పోర్టల్​ సమన్వయం చేస్తుంది. మీ బ్యాంకు ఖాతాలోని డబ్బులను మీరు తిరిగి పొందడానికి వీలు కల్పిస్తుంది.

సంచార్ సాథి పోర్టల్​ : కేంద్ర ప్రభుత్వం 2023 మే నెలలో సంచార్​ సాథి పోర్టల్​ను ప్రారంభించింది. దీనిలో ఇంకా చాలా సబ్​-పోర్టల్స్ ఉన్నాయి. దొంగతనానికి గురైన ఫోన్​ను బ్లాక్ చేయడానికి, సాధారణ కేవైసీతో ఎన్ని మొబైల్​ ఫోన్​లు కనెక్ట్​ అయ్యాయో తెలుసుకోవడానికి వీటిని యూజర్లు ఉపయోగిస్తూ ఉన్నారు.