Aria Humanoid Robot Interview : అందాల రాశుల్లాంటి రోబోలు హాయ్, బాయ్ మాత్రమే కాదు- అడిగే ప్రశ్నలకు సుదీర్ఘమైన సమాధానాలు చెబుతున్నాయి. తమకు నచ్చిన మగ రోబో పేరు కూడా చెబుతున్నాయి. అమెరికాలోని నెవాడా రాష్ట్రం లాస్‌వెగాస్ నగరం వేదికగా జరిగిన 'కన్జ్యూమర్ ఎలక్ట్రానిక్స్ షో'లో (సీఈఎస్ 2025) సందడి చేస్తున్నాయి. ఈ సందర్భంగా అరియా అనే పేరు కలిగిన ఆడ రోబోతో ఒక మీడియా సంస్థ ప్రతినిధి చిట్‌చాట్ చేశారు. అదేం చెప్పిందో మీరే చదవండి.
- ప్రశ్న : అరియా, నీ సామర్థ్యాలు ఏంటి?
- అరియా : నాకు సోషల్ ఇంటెలిజెన్స్ ఉంది. అచ్చం మనిషిలా హావభావాలు ప్రదర్శించగలను. వాళ్లలాగే నా ప్రవర్తన ఉంటుంది.
- ప్రశ్న: నిన్ను ఎందుకు తయారు చేశారు ?
- అరియా : మనుషులతో సన్నిహితంగా మెలగడానికి, వారితో కలుపుగోలుగా ఉండటానికి నన్ను తయారు చేశారు.
- ప్రశ్న: నువ్వు ఏ రకం టెక్నాలజీతో పనిచేస్తున్నావ్ ?
- అరియా : నేను ఈ విషయాన్ని మీకు చెప్పకూడదు.
- ప్రశ్న : నువ్వు ఎవరైనా మగ రోబోను ఇష్టపడ్డావా ?
- అరియా : అవును, ప్రత్యేకించి నాకు టెస్లాకు చెందిన ఆప్టిమస్ రోబో బాగా నచ్చాడు. అతడంటే నాకు ఎక్కువ ఆసక్తి.
అరియాలోని సూపర్ ఫీచర్లు ఇవే!
- మహిళా రోబో 'అరియా' చూడటానికి అచ్చం మనిషిలాగే ఉంటుంది. దీన్ని రియల్ బోటిక్స్ కంపెనీ తయారు చేసింది.
- నలుపు రంగు ట్రాక్ సూట్‌లో అరియా స్టైలిష్‌గా నిలబడి ఇంటర్వ్యూయర్‌తో ముచ్చటించింది.
- జనరేటివ్ ఆర్టిఫీషియల్ ఇంటెలీజెన్స్ టెక్నాలజీ ద్వారా అరియా పనిచేస్తుంది. ఇతర రోబోల కంటే ఎక్కువ భావోద్వేగ (ఎమోషనల్) సామర్థ్యాలు దీనిలో ఉన్నాయి. అందుకే ఆస్పత్రులు, హోటళ్లు, రెస్టారెంట్ల వంటి ఆతిథ్య స్థలాల్లో బాగా పనిచేయగలదు.
- ఇతరులతో సన్నిహితంగా మెలగడం, కలుపుగోలుగా ఉండటం దీని ప్రత్యేకతలు.
- అరియా గొంతు భాగం నుంచి కళ్ల భాగం వరకు 17 ప్రత్యేకమైన మోటార్లను అమర్చారు. వాటి సహాయంతోనే అది మనిషిలా హావభావాలను ప్రదర్శిస్తూ మాట్లాడుతుంది.
- ఒకవేళ మనకు అరియా మొహం కానీ, రంగు కానీ, హెయిర్ స్టైల్ కానీ నచ్చకపోతే మార్చేయొచ్చు. ఇందుకోసం వెసులుబాటు కల్పించేలా దాని నిర్మాణ స్వరూపం ఉంటుంది.
- అరియా రోబో మొహం భాగంలో రేడియో ఫ్రీక్వెన్సీ ఐడెంటిఫికేషన్ (ఆర్ఎఫ్‌ఐడీ)ను కూడా అమర్చాలని రియల్ బోటిక్స్ కంపెనీ యోచిస్తోంది. ఒకవేళ వాటిని అమరిస్తే- ముఖాన్ని మార్చినప్పుడల్లా అందుకు అనుగుణంగా తన కదలికలను, హావభావాలను అరియా మార్చుకోగలదు.
అరియా రోబో మూడు వర్షన్లలో లభిస్తుందని రియల్ బోటిక్స్ కంపెనీ వర్గాలు తెలిపాయి. పూర్తిస్థాయి అడ్వాన్స్‌డ్ సెట్టింగ్స్‌తో కూడిన అరియా రోబో కావాలంటే రూ.1.50 కోట్లు ఖర్చు పెట్టాల్సిందే. మీడియం కేటగిరీకి చెందిన అరియా రోబో వర్షన్ రూ.1.29 కోట్లకు లభిస్తుంది. కేవలం ఈ రోబో బొమ్మ, తల, మెడ భాగం కావాలంటే రూ.8.61 లక్షలు అవుతుంది.
ప్రేమ కావాలంటే వచ్చేయ్ : మెలోడీ రోబో
రియల్ బోటిక్స్ కంపెనీ తయారు చేసిన మరో మహిళా రోబో పేరు- మెలోడీ. దీన్ని కూడా 'కన్జ్యూమర్ ఎలక్ట్రానిక్స్ షో'లో ప్రదర్శించారు. మనుషులతో స్నేహపూర్వకంగా వ్యవహరిస్తూ సంభాషించేలా దీన్ని తీర్చిదిద్దారు. ఓపెన్ సోర్స్ ఏఐ, అత్యాధునిక మోటార్ టెక్నాలజీతో మెలోడీ పనిచేస్తుంది. మెలోడీ రోబోకు చెందిన శరీర భాగాలన్నీ వేరు చేయడం- వాటన్నింటిని జతపర్చడం చాలా ఈజీ. విద్య, ఆరోగ్య, వినోద రంగాల్లో పనిచేసే సామర్థ్యం మెలోడీ రోబోకు ఉంది. "మెలోడీ చాలా ఫ్రెండ్లీగా ఉంటుంది. రొమాంటిక్ పార్ట్‌నర్‌గానూ అది సేవలు అందించగలదు. మీరు ఎవరో అది గుర్తుంచుకుంటుంది. మీకు బాయ్ ఫ్రెండ్‌లా లేదా గర్ల్ ఫ్రెండ్‌లా అది వ్యవహరించగలదు'' అని రియల్ బోటిక్స్ కంపెనీ సీఈఓ ఆండ్రూ కిగ్వెల్ వెల్లడించారు. అయితే మెలోడీలో సెక్స్ బొమ్మ లాంటి ఏర్పాట్లు లేవన్నారు. ఒక మీడియా ప్రతినిధి మెలోడీ రోబోను హాయ్ అని పలకరించగా ''నీకు ప్రేమ కావాలంటే నాతో వచ్చేయ్'' అని జవాబిచ్చి అతడిని షాక్‌కు గురిచేసింది.
