తండ్రి-కుమార్తె వీడియోపై అసభ్యంగా మాట్లాడిన యూట్యూబర్​ 'ప్రణీత్​ హనుమంతు అరెస్ట్' - YouTuber Praneeth Hanumanthu arrest

YouTuber Praneeth Hanumanthu Controversy : ఎట్టకేలకు యూట్యూబర్​ ప్రణీత్​ హనుమంతు అరెస్ట్​ అయ్యాడు. సామాజిక మాధ్యమంలో తండ్రి-కుమార్తె వీడియోపై అసభ్యకర వ్యాఖ్యలు చేసిన విషయం తెలిసిందే. పరారీలో ఉన్న మరికొంత మంది నిందితుల కోసం పోలీసులు వేట సాగిస్తున్నారు.

YouTuber Praneeth Hanumanthu was Arrested : సామాజిక మాధ్యమంలో తండ్రి-కుమార్తె వీడియోపై అసభ్యకర వ్యాఖ్యలు చేసిన యూట్యూబర్​ను పోలీసులు అరెస్టు చేశారు. కేసులో కీలక నిందితుడిగా ఉన్న ప్రణీత్​ హనుమంతును సైబర్​ సెక్యూరిటీ బ్యూరో పోలీసులు పట్టుకున్నారు. బెంగళూరులో అరెస్టు చేసి స్థానిక కోర్టులో హాజరుపరిచి పోలీసులు హైదరాబాద్​కు తరలించారు. పరారీలో ఉన్న మరికొంత మంది నిందితుల కోసం గాలిస్తున్నట్లు పోలీసులు తెలిపారు.

అసలేం జరిగింది : యూట్యూబర్​ ప్రణీత్​ హనుమంతు ఓ యూట్యూబ్​ వీడియోలో తండ్రి, కుమార్తె బంధంలో అశ్లీలం ధ్వనించేలా మిత్రులతో చిట్​చాట్​ చేసిన విషయం తెలిసిందే. అతనితో పాటు మరో ముగ్గురు యువకులు కలసి వేర్వేరు చోట్ల కూర్చుని ఒక రీల్​ గురించి లైవ్​లో మాట్లాడారు. ఆ రీల్​లో ఒక తండ్రి, కుమార్తె ఉంటారు. తండ్రి కూతురు మధ్య అసభ్యకర సంబంధం అనే అర్థం వచ్చేలా సంభాషించారు.

ఆ వీడియో కాస్త సామాజిక మాధ్యమాల్లో వైరల్​ కావడంతో సినీనటుడు సాయిదుర్గ తేజ్​ దారుణంగా వీడియోలు చేస్తున్నారంటూ ఎక్స్​ వేదికగా స్పందించారు. ఇలాంటి వారిపై చర్యలు తీసుకోవాలంటూ తెలుగు రాష్ట్రాల ముఖ్యమంత్రులు రేవంత్​రెడ్డి, చంద్రబాబుతో పాటు మరికొందరికి ఆయన ట్యాగ్​ చేశారు. దీనిపై స్పందించిన తెలంగాణ సీఎం రేవంత్​ రెడ్డి స్పందించి వెంటనే చర్యలు తీసుకోవాలని టీజీ సైబర్​ సెక్యూరిటీ బ్యూరో అధికారులకు ఆదేశించారు. ఆ వెంటనే మంత్రి సీతక్క, సినీ నటుడు మంచు మనోజ్​ రియాక్టు అయి నిందితులను కఠినంగా శిక్షించాలని అన్నారు.

యూట్యూబర్లకు మంచు విష్ణు వార్నింగ్ : నటీనటులపై అసభ్యకర, అశ్లీల వీడియోలు చేస్తున్న యూట్యూబర్లను మా అధ్యక్షుడు మంచు విష్ణు హెచ్చరించారు. నటీనటులు, వారి కుటుంబ సభ్యులపై అశ్లీలంగా పెట్టిన వీడియోలు, పోస్టులను 48 గంటల్లో తొలగించాలని సూచించారు. లేదంటే ఆ యూట్యూబర్లపై క్రిమినల్​ కేసులు నమోదు చేసి ఛానల్స్​ను మూసివేస్తామని చెప్పారు. ఇటీవల ఓ చిన్నారిపై అసభ్యకరంగా మాట్లాడిన యూట్యూబర్​ ఉదంతంపై స్పందిస్తూ ప్రత్యేక వీడియోను మంచు విష్ణు విడుదల చేశారు.

మహిళలను కించపరిచేలా వ్యవహరించిన ఆ యూట్యూబర్​పై చర్యలు తీసుకున్నందుకు ప్రభుత్వానికి ప్రత్యేక కృతజ్ఞతలు తెలిపారు. ఈ ఘటనతో మా అసోసియేషన్​కు చాలా మంది నటీనటులు లేఖలు, మెయిల్స్​ రాస్తున్నారని, తమ వీడియోలు తొలగించేలా చర్యలు తీసుకోవాలని కోరుతున్నట్లు విష్ణు పేర్కొన్నారు. సామాజిక మాధ్యమాల ద్వారా నటీనటుల వ్యక్తిత్వాన్ని కించపరిస్తూ వీడియోలు చేస్తున్న యూట్యూబర్లకు హెచ్చరికలు పంపారు. తెలుగు రాష్ట్రాల ముఖ్యమంత్రులు అధికారులు ఈ విషయంలో కఠినంగా వ్యవహరించాలని మంచు విష్ణు కోరారు.