Woman Video Blackmail Case In Hyderabad : సామాజిక మాధ్యమాల్లో పరిచయమైన మహిళల వద్ద ఫోన్‌ నంబర్‌ తీసుకొని మాటలు కలిపి పోకిరీలు వలపు వల విసురుతున్నారు. నగ్న వీడియోలను ఆయుధంగా మలచుకొని డబ్బులు వసూలు చేస్తున్నారు. విశ్రాంత ఉద్యోగులు, వయోధికులు లక్ష్యంగా మోసాలకు దిగుతున్నారు. గౌరవంగా ఉన్నచోట సున్నిత అంశాలు బయటపడతాయనే భయంతో అడిగినంత ఇచ్చి బాధితులు బయటపడుతున్నారు. విశ్రాంత ఐఏఎస్‌ అధికారి, మల్టీఫ్లెక్స్‌ మాల్‌ యజమాని, జైలు ఉన్నతాధికారి వంటి ప్రముఖులు ఈ ఉచ్చులో చిక్కుకున్నారు. కొద్ది మంది మాత్రమే కేటుగాళ్ల బెదిరింపులకు లొంగకుండా ఫిర్యాదు చేస్తున్నారు.
యువతి ఫొటోలను మార్ఫింగ్‌ : తాజాగా చాంద్రాయణగుట్టలో ఉంటున్న కుర్రాడు దగ్గర బంధువనే భరోసాతో ఆస్తుల్లేకున్నా అదే ప్రాంతానికి చెందిన కుటుంబం అల్లుడిని చేసుకునేందుకు సిద్ధమైంది. కొద్దిరోజులకు అతడి వ్యవహారాలు బయటపడటంతో పెళ్లి రద్దు చేసుకుంది. పరువు పోయిందనే అక్కసుతో అతడు ఆ యువతి ఫొటోలను మార్ఫింగ్‌ చేసి రూపొందించిన నగ్నవీడియోలను ఆమె తల్లిదండ్రులకు పంపాడు. అవి బయటకు రాకుండా ఉండేందుకు డబ్బులివ్వాలని, కుదరకుంటే ఆ యువతినిచ్చి పెళ్లి చేయాలని డిమాండ్‌ చేశాడు. 2 నెలల మనోవేదన తర్వాత సైబర్‌ క్రైమ్‌ పోలీసులకు ఫిర్యాదు చేయటంతో పరిష్కారం దొరికింది.
నగ్నవీడియోలు తీసి బెదిరించి : హైదరాబాద్కు చెందిన ప్రైవేటు వసతిగృహ నిర్వాహకుడు హాస్టల్‌లో ఉండే తూ.గో జిల్లాకు చెందిన ఐటీ నిపుణురాలిని నగ్న వీడియోలు తీసి బెదిరించి రూ.2.53 కోట్లు కాజేశాడు. నాలుగు గోడల మధ్య ఉండాల్సిన గుట్టు నలుగురి నోళ్లలో చేరుతుందనే ఆలోచన భయపెడుతుంది. గౌరవంగా బతికేచోట అప్రతిష్ఠ పాలవుతామనే గుబులు ఉక్కిరిబిక్కిరి చేస్తుంది. ఈ బలహీనతలను ఆసరా చేసుకొని సైబర్‌ నేరస్థుల నుంచి ప్రేమికుల వరకూ సొమ్ము చేసుకుంటున్నారు.
మ్యాట్రిమొనీ వెబ్‌సైట్లలో నకిలీ ప్రొఫైల్స్‌ : మ్యాట్రిమొనీ వెబ్‌సైట్లలో నకిలీ ప్రొఫైల్స్‌తో వధువు కోసం వెతికే నిత్యపెళ్లికొడుకు బాగోతాన్ని రాయదుర్గం పోలీసులు బయటపెట్టారు. ఒక్కతే కుమార్తె ఉన్న కుటుంబాలను లక్ష్యంగా చేసుకొని వివాహ ముసుగులో దగ్గరవుతాడు. ఎలాగూ పెళ్లి చేసుకోబోతున్నామంటూ ఆడపిల్లలను హోటల్‌గదికి తీసుకెళ్లి శీతలపానీయంలో మత్తుమాత్రలు కలిపి తాగిస్తాడు.
ఆపై వారి ఒంటిపై దుస్తులు తొలగించి సెల్‌పోన్‌తో చిత్రీకరిస్తాడు. నిలదీస్తే నగ్నవీడియోలు ఆన్‌లైన్‌లో ఉంచుతానంటూ బెదిరిస్తాడు. ఇతడి బారిన 40మంది మోసపోయినట్టు దర్యాప్తులో తేలింది. సామాజిక మాధ్యమాల ద్వారా ఆడపిల్లలకు మిత్రులుగా పరిచయమైన ప్రబుద్ధులు తాము అమ్మాయిలమేనంటూ నగ్న, అర్ధనగ్న ఫొటోలు సేకరిస్తారు. వాటిని స్నేహితులు, బంధువులకు పంపుతామంటూ రూ.లక్షలు కొట్టేస్తున్నారు. గతేడాది మూడు పోలీసు కమిషనరేట్ల పరిధిలో ఇలా 70 మంది నుంచి రూ.3.5 కోట్లు కాజేశారు.
మ్యాట్రిమోనీ సైట్లో మాయ లేడి.. నగ్న వీడియోలతో బ్లాక్మెయిల్.. టెకీకి రూ. కోటికిపైగా టోకరా
