ఆర్టీసీ బస్సులో పుట్టిన ఆ చిన్నారికి 'లైఫ్‌టైం ఫ్రీ బస్‌పాస్‌' - పురుడు పోసిన నర్సుకు బంపర్ ఆఫర్ - Lifetime Free Bus Pass For Baby

RTC Bumper Offer For Child Born in Bus : రాఖీ పండుగ రోజున ఆర్టీసీ బస్సుల్లో జన్మించిన ఆడపిల్లకు టీజీఎస్ఆర్టీసీ ఎండీ సజ్జనార్‌ జన్మదిన కానుక ప్రకటించారు. జీవితకాలం ఆ చిన్నారి ఆర్టీసీ బస్సుల్లో ఉచితంగా ప్రయాణించేలా 'లైఫ్‌టైం ఫ్రీ బస్‌పాస్‌' ఇచ్చినట్లు ఎండీ సజ్జనార్‌ ట్విటర్​ వేదికగా తెలిపారు. గద్వాల డిపోకు చెందిన ఆర్టీసీ బస్సు గద్వాల-వనపర్తి రూట్​ పల్లెవెలుగు బస్సులో సోమవారం సంధ్య అనే గర్భిణీ ఆడపిల్లకు జన్మనిచ్చిన సంగతి తెలిసిందే.

Lifetime Free Bus Pass For Baby Born in RTC : రాఖీ పౌర్ణమి రోజున గ‌ద్వాల డిపోకు చెందిన ఆర్టీసీ బ‌స్సులో జ‌న్మించిన చిన్నారికి జీవితకాలం పాటు రాష్ట్రవ్యాప్తంగా ఉచితంగా ప్రయాణించేలా బస్‌పాస్‌ను అందిస్తున్నట్లు టీజీఎస్‌ ఆర్టీసీ యాజమాన్యం ప్రకటించింది. ఆర్టీసీ బస్సులు, బస్ స్టేషన్‌లో పుట్టిన పిల్లలకు జీవిత కాలపు ఉచిత బస్ పాస్‌ను ఇవ్వాలని గతంలో యాజమాన్యం తీసుకున్న నిర్ణయం మేరకు ఈ ఆడపిల్లకు పుట్టినరోజు కానుగా జీవితకాలం ఉచిత బస్ పాస్​ను మంజూరు చేస్తున్నట్లు పేర్కొంది.

కండక్టర్​తో పాటు గర్భిణీ డెలివరీకి సాయం చేసిన వనపర్తిలోని మదర్‌ అండ్‌ చైల్డ్‌ ప్రభుత్వ ఆసుపత్రి స్టాఫ్‌ నర్స్‌ అలివేలు మంగమ్మకు డీలక్స్‌, సూపర్‌ లగ్జరీ సర్వీసుల్లో ఏడాది పాటు ఉచితంగా ప్రయాణించే బస్‌పాస్​ను యాజమాన్యం అందించింది. బ‌స్సులో ప్రయాణిస్తున్నప్పుడు పురిటినొప్పుల‌తో బాధ‌ప‌డుతున్న గ‌ర్బిణికి కాన్పు చేసి మాన‌వ‌త్వం చాటుకున్న గ‌ద్వాల్ డిపోకు చెందిన కండ‌క్టర్ భార‌తి, డ్రైవ‌ర్ అంజిల‌తో పాటు న‌ర్సు అలివేలు మంగ‌మ్మను హైదరాబాద్ బస్ భవన్‌లో ఇవాళ టీజీఎస్ఆర్టీసీ యాజ‌మాన్యం అభినందించింది.

MD Sajjanar Appreciates Lady Conductor : టీజీఎస్ఆర్టీసీ సంస్థ ఉన్నతాధికారులతో కలిసి సంస్థ ఎండీ వీసీ సజ్జనార్ వారిని ఘనంగా సన్మానించి, న‌గ‌దు బ‌హుమ‌తులు అంద‌జేశారు. అనంత‌రం డీల‌క్స్, సూప‌ర్ ల‌గ్జరీ బ‌స్సుల్లో ఏడాది పాటు ఫ్రీ ట్రావెల్ బ‌స్ పాస్‌ను న‌ర్సు అలివేలు మంగ‌మ్మకు, చిన్నారి జీవితకాలం ఉచిత బ‌స్ పాస్‌ను గ‌ద్వాల డిపో మేనేజ‌ర్ ముర‌ళీకృష్ణకు అంద‌జేశారు.

▶️ఆర్టీసీ బస్‌లో జ‌న్మించిన చిన్నారికి జీవితకాలం రాష్ట్ర‌వ్యాప్తంగా ఉచిత బస్ పాస్

▶️సాయ‌ప‌డిన న‌ర్సుకు డీల‌క్స్, సూప‌ర్ ల‌గ్జ‌రీ స‌ర్వీసుల్లోనూ ఉచిత ప్ర‌యాణ సౌక‌ర్యం

▶️ప్రకటించిన టీజీఎస్ఆర్టీసీ యాజమాన్యం

▶️డెలివరీ చేసి ఉదార‌త చాటిన వారికి ఘన సన్మానం.. న‌గదు బ‌హుమ‌తుల‌ అంద‌జేత… pic.twitter.com/LPWreP9109

— VC Sajjanar - MD TGSRTC (@tgsrtcmdoffice) August 20, 2024

గద్వాల-వనపర్తి రూట్‌ పల్లె వెలుగు బస్సులో రాఖీ పండుగ రోజున సంధ్య అనే గర్భిణి రక్షాబంధన్‌ సందర్భంగా తన సోదరులకు రాఖీ కట్టేందుకు వనపర్తికి వెళ్లారు. ఈ క్రమంలోనే బస్సు నాచహల్లి సమీపంలోకి రాగానే గర్బిణికి ఒక్కసారిగా పురిటినొప్పులు వచ్చాయి. వెంటనే అప్రమత్తమైన మహిళా కండక్టర్‌ జి.భారతి బస్సును ఆపించారు. అదే బస్సులో ప్రయాణిస్తోన్న నర్సు అలివేలు మంగ‌మ్మ సాయంతో గర్భిణికి పురుడు పోశారు. అనంతరం 108 సాయంతో తల్లీబిడ్డను స్థానిక ఆస్పత్రికి తరలించారు.