Telangana Police NRI Wing : వివాహం అనంతరం భార్యను భారత్లో వదిలేసి విదేశాల్లో మకాం వేస్తున్న ప్రవాస అల్లుళ్లకు వార్నింగ్. ప్రవాస అల్లుళ్ల కుటుంబాలు భారత్లో కోడళ్లపై పాల్పడుతున్న గృహహింస విషయంలో కూడా స్వీట్ వార్నింగ్. ఎందుకంటే వారు ఎలాంటి చర్యలకు పాల్పడినా ఎన్ఆర్ఐ సెల్ ఉందనే విషయాన్ని మరవకూడదు. ఆడవాళ్లకు ఏదైనా జరిగితే ఇక ఎన్ఆర్ఐకి, ఎన్ఆర్ఐ కుటుంబానికి తాట తీస్తారు. బాధిత మహిళలకు న్యాయ సహాయం చేస్తూ ఎన్నో కేసులకు పరిష్కారం చూపింది ఈ సెల్.
విదేశాల్లో మహిళలు ఉన్నప్పటికీ గృహ హింసను ఎదుర్కొంటున్న బాధితురాళ్ల తరఫున వారి కుటుంబసభ్యులు ఇక్కడ ఫిర్యాదు చేస్తున్న కేసులకు ఎన్ఆర్ఐ సెల్ పరిష్కారం అందిస్తోంది. ఇలా తెలంగాణలోని 23 మహిళా పోలీస్ స్టేషన్లలో నమోదైన కేసుల ఆధారంగా దర్యాప్తులో స్థానిక పోలీసులకు సహకరిస్తోంది. అలాగే ప్రవాస అల్లుళ్లపై లుక్ అవుట్ నోటీసులు, పని చేస్తున్న కంపెనీల ద్వారా ఒత్తిళ్లు, నాన్ బెయిలబుల్ వారంట్ల జారీ, పాస్ పోర్టులు రద్దు చేయడంలో కీలకంగా వ్యవహరిస్తోంది.
నిందితులను ఇక్కడకు తీసుకు రావడానికి ఎంత శ్రమిస్తున్నారో, తీసుకొచ్చాక సీడీఈడబ్ల్యూ సంస్థ ద్వారా నిపుణులతో వారికి కౌన్సెలింగ్ చేయించడం, కాపురాలు నిలబెట్టడంతో కూడా అంతే శ్రమిస్తున్నారు. కలిపిన తర్వాత వదిలేయకుండా వారి బాగోగులు సైతం తరచూ అడిగి తెలుసుకుంటున్నారు.
ఆస్ట్రేలియాలో విభేదాలు - హైదరాబాద్లో రాజీ : హైదరాబాద్ అల్వాల్కు చెందిన యువతికి 2011లో వివాహం అయింది. భార్యాభర్తలిద్దరూ ఏడేళ్ల పాటు ఆస్ట్రేలియాలో ఉన్నారు. వారికి అక్కడే అమ్మాయి జన్మించింది. భర్త వేరొకరితో వివాహేతర సంబంధం నెరపుతున్నారనే కారణంతో ఇద్దరి మధ్య విభేదాలు వచ్చాయి. వెంటనే ఆమె అక్కడి నుంచి హైదరాబాద్ తిరిగొచ్చి అల్వాల్ పోలీస్ స్టేషన్లో ఫిర్యాదు చేసింది. వెంటనే తెలంగాణ మహిళ భద్రత విభాగంలోని ఎన్ఆర్ఐ సెల్ను సంప్రదించగా, భర్తకు లుక్ అవుట్ సర్క్యూలర్ను పోలీసులు జారీ చేశారు. వెంటనే అతడిని భారత్కు రప్పించారు. నిపుణుల సమక్షంలో కౌన్సెలింగ్ ఇవ్వగా, భార్యభర్తలిద్దరూ కలిసిపోయారు. ఆయన అక్కడి ఉద్యోగాన్ని ఆస్ట్రేలియా నుంచి హైదరాబాద్కు మార్పించుకున్నారు. ఇప్పుడు సుఖంగా ఉన్నారు.
భార్యతో రాజీపడి దుబాయ్కు : 2019లో దుబాయ్లో పని చేసే వ్యక్తితో జగిత్యాల జిల్లా కోరుట్లకు చెందిన మహిళకు వివాహం అయింది. కుమారుడు పుట్టిన తర్వాత అతడు దుబాయ్ వెళ్లిపోయాడు. అక్కడికి వెళ్లిన దగ్గర నుంచి రూ.2 లక్షల కట్నం కోసం వేధించేవాడు. ఆమె 2022లో కోరుట్ల పోలీస్ స్టేషన్లో గృహ హింస చట్టం కింద కేసు పెట్టింది. ఎన్ఆర్ఐ సెల్ను సంప్రదించారు. అతనిపై లుక్ అవుట్ సర్క్యులర్ జారీ చేసి, అతడు పని చేసే దుబాయ్ కంపెనీకి నోటీసును పంపించింది. అతడిని ఇక్కడికి రప్పించి, కౌన్సెలింగ్ ఇవ్వగా భార్యతో రాజీపడి దుబాయ్కు కాపురానికి తీసుకెళ్లాడు.
భార్యను వదిలేసి కువైట్ వెళ్లిపోయిన భర్త : హైదరాబాద్ పాతబస్తీకి చెందిన మహిళా అసిస్టెంట్ ప్రొఫెసర్ ఓ వ్యక్తిని రూ.20 లక్షల కట్నం ఇచ్చి పెళ్లి చేసుకుంది. కొన్నాళ్ల తర్వాత మళ్లీ అదనపు కట్నం కోసం వేధించడం ప్రారంభించాడు. అదే సమయంలో ఆమె భర్త కువైట్ వెళ్లి ఉద్యోగంలో స్థిరపడ్డాడు. తనను గృహహింస కింద హింసిస్తున్నారని, మహిళా పోలీసు స్టేషన్లో అత్తమామలపై కూడా కేసు పెట్టింది. లుక్ అవుట్ నోటీసులు జారీ చేసిన పోలీసులు పాస్పోర్టును రద్దు చేశారు. భారత్కు రప్పించి న్యాయస్థానంలో హాజరుపర్చగా, ప్రస్తుతం ఇరువర్గాల మధ్య రాజీకి కౌన్సెలింగ్ నిర్వహిస్తున్నారు.
కేసుల వివరాలు : తెలంగాణ మహిళ భద్రత విభాగంలో 2019లో ఎన్ఆర్ఐ సెల్ ఏర్పాటు అయింది. నాటి నుంచి ఇప్పటివరకు 463 కేసులు నమోదు కాగా, వాటిల్లో 153 కేసులను పరిష్కరించారు. 224 మంది ప్రవాస అల్లుళ్లపై లుక్ అవుట్ సర్క్యులర్ (ఎల్వోసీ)లు జారీ అయ్యాయి. ప్రవాస అల్లుళ్లపై 139 నాన్ బెయిలబుల్ వారంట్లు జారీ చేశారు. 19 కేసుల్లో నిందితుల పాస్పోర్టులు రద్దు చేశారు. 94 కేసుల్లో నిందితుల పాస్పోర్టు వివరాలను హైదరాబాద్ ప్రాంతీయ పాస్పోర్టు కార్యాలయం పాలసీ డేటాలో నమోదు చేశారు. 62 కేసుల్లో నిందితులను విదేశాల నుంచి వెనక్కి రప్పించేందుకు భారతీయ ఎంబసీలతో సంప్రదింపులు జరిపారు. 53 కేసుల్లో ప్రవాస అల్లుళ్లను భారత్కు రప్పించి న్యాయ విచారణకు హాజరు పరిచారు.
ఈ నంబర్లను సంప్రదించండి : తెలంగాణ మహిళ భద్రత విభాగం ఎన్ఆర్ఐ సెల్ను బాధితులు నేరుగానే కాకుండా ఈ-మెయిల్, రిజిస్టర్ పోస్ట్, వాట్సప్ ద్వారా ఫిర్యాదు చేయవచ్చు. యూట్యూబ్లోనూ వివరాలు తెలుసుకోవచ్చు. Women Safety Wing, Telangana Police అనే వీడియోల్లోనూ వివరాలను తెలుసుకోవచ్చు.
- వాట్సప్ : +91 8712656858
- ఎక్స్‌: @ts_womensafety
- ఫోన్‌ నంబర్‌: 040 27852246
- Mail Id : tsnricell.wsw@gmail.com & nricell-ts-wsw@tspolice.gov.in
NRI Marriage Frauds : తొలి రాత్రే ఆ రహస్యం తెలిసింది..
అందాల పోటీల్లో గెలిస్తే ఎన్ఆర్ఐతో పెళ్లి.. వెరైటీ ఆఫర్ ఇచ్చిన వారు అరెస్ట్
