Telangana Group-2 Exam Schedule 2024 : తెలంగాణ రాష్ట్ర పబ్లిక్ సర్వీస్ కమిషన్ గ్రూప్-2కు సన్నద్ధమవుతున్న అభ్యర్థులకు శుభవార్త చెప్పింది. గ్రూప్-2 పరీక్ష షెడ్యూల్ను తాజాగా విడుదల చేసింది. డిసెంబర్ 15, 16వ తేదీల్లో పరీక్షలు నిర్వహించనున్నట్లు తెలిపింది. ఈ పరీక్షలకు మొత్తం నాలుగు పేపర్లు రాయాల్సి ఉండగా.. ఉదయం, మధ్యాహ్నం సెషన్లలో పరీక్షలు నిర్వహించనున్నట్లు టీజీపీఎస్సీ ప్రకటించింది. గతంలో అభ్యర్థుల విజ్ఞప్తి మేరకు గ్రూప్ 2 పరీక్షలను ప్రభుత్వం వాయిదా వేసిన సంగతి తెలిసిందే.
Telangana Group-2 Exam Dates : మొత్తం 783 గ్రూప్- 2 పోస్టుల భర్తీకి షెడ్యూల్ ప్రకారమైతే ఈనెల 7, 8 తేదీల్లో పరీక్షలు నిర్వహించాల్సి ఉంది. అయితే, డీఎస్సీ, గ్రూప్ -2 పరీక్షల మధ్య వారం రోజులు మాత్రమే వ్యవధి ఉండటంతో అభ్యర్థుల విజ్ఞప్తి మేరకు పోస్ట్పోన్ అయ్యాయి. దీంతో గ్రూప్-2 పరీక్షల తాజా షెడ్యూల్ను ఇవాళ ప్రకటించారు. రాష్ట్రంలో గ్రూప్ -2 ఉద్యోగాలకు 5.51లక్షల మంది అభ్యర్థులు దరఖాస్తు చేసుకున్న విషయం తెలిసిందే. ఈ నోటిఫికేషన్ 2022 డిసెంబర్ 29న ఇవ్వగా, అప్పటినుంచి వేర్వేరు కారణాలతో పరీక్షలు పలుమార్లు వాయిదాపడగా ఈసారి డిసెంబర్ 15, 16 తేదీల్లో నిర్వహించేందుకు టీజీపీఎస్సీ సిద్ధమవుతోంది.
రెండు సెషన్స్లో పరీక్షలు : కొత్త షెడ్యూల్ ప్రకారం, రెండు సెషన్లలో గ్రూప్ 2 పరీక్ష నిర్వహించనున్నారు. ఉదయం 10గంటల నుంచి 12.30గంటల వరకు ఒక సెషన్‌, మధ్యాహ్నం 3గంటల నుంచి సాయంత్రం 5.30గంటలవరకు రెండో సెషన్‌లో పరీక్షలు జరుగుతాయని టీజీపీఎస్సీ సెక్రటరీ డా.ఇ. నవీన్‌ నికోలస్‌ వెల్లడించారు. ఈ ఎగ్జామ్స్ ప్రారంభానికి వారం రోజుల ముందునుంచి హాల్‌టికెట్లను డౌన్‌లోడ్‌ చేసుకోవచ్చని పేర్కొన్నారు.
గత ప్రభుత్వం నుంచి నేటి వరకు వేర్వేరు కారణాలతో పరీక్షల వాయిదా పర్వం కొనసాగుతూనే ఉంది. దీంతో నిరుద్యోగ యువత గందరగోళానికి గురికావాల్సి వచ్చింది. వీటన్నింటికీ చెక్ పెడుతూ రేవంత్ సర్కార్ ఇటీవల సంపూర్ణ పరీక్షల సమాచారంతో జాబ్ క్యాలెండర్ రిలీజ్ చేసింది. వేర్వేరు పోస్టుల భర్తీకి నోటిఫికేషన్‌లు విడుదల చేసే నెల, ఎప్పుడు పరీక్షలు నిర్వహిస్తారనే వివరాలను జాబ్ క్యాలెండర్‌లో పొందుపర్చింది. నియామకాలు నిర్వహించే ఏజెన్సీ, ఉద్యోగానికి కావాల్సిన క్వాలిఫికేషన్స్ను వివరించింది.
జాబ్ క్యాలెండర్ ప్రకారం తెలంగాణ పబ్లిక్ సర్వీస్ కమిషన్ ఆధ్వర్యంలో గ్రూప్-1, గ్రూప్-2, గ్రూప్-3 ఎగ్జామ్స్ జరుగుతాయి. గ్రూప్-1 పరీక్షలను అక్టోబర్‌లో నిర్వహిస్తామని, గ్రూప్-2 పరీక్షలను డిసెంబర్‌లో, గ్రూప్-3 పరీక్షలు నవంబర్‌లో నిర్వహించనున్నట్లు తెలిపారు. కాగా ఈ ఖాళీలకు ఇప్పటికే నోటిపికేషన్లు విడుదలై ఎగ్జామ్స్ మాత్రమే నిర్వహించాల్సి ఉంది. గ్రూప్-1 ప్రాథమిక పరీక్ష నిర్వహించి మెయిన్స్‌కు అర్హత పొందిన వారి జాబితాను ఇప్పటికే విడుదల చేశారు.
నిరుద్యోగులకు బిగ్ అలర్ట్ - ఆ పోస్టులన్నీ ఇకపై గ్రూప్-3లోకి - Telangana Job Notification Reforms
జాబ్ క్యాలెండర్పై ఎన్నో సందేహాలు - పరీక్షల షెడ్యూల్పై అయోమయం - TELANGANA JOB CALENDAR 2024
