Good News for Anganwadi Workers : అంగన్వాడీలకు ప్రభుత్వం శుభవార్త చెప్పింది. అంగన్వాడీలకు పదవీ విరమణ ప్రయోజనాలు అందిస్తామని మంత్రి సీతక్క ప్రకటించారు. అంగన్వాడీ టీచర్కు రూ.2 లక్షలు, హెల్పర్కు రూ.1 లక్ష రిటైర్మెంట్ బెనిఫిట్స్ అందించనున్నట్లు వివరించారు. హైదరాబాద్లోని రహమత్నగర్లో 'అమ్మ మాట - అంగన్వాడీ బాట' కార్యక్రమంలో మంత్రి సీతక్క పాల్గొన్నారు. ఈ బెనిఫిట్స్కు సంబంధించి ప్రభుత్వ ఉత్తర్వులు రెండు, మూడు రోజుల్లో జారీ చేయనున్నట్లు ఆమె వివరించారు. జూబ్లీహిల్స్ నియోజకవర్గంలోని రహమత్ నగర్ డివిజన్ పరిధిలో ఉన్న కొన్ని అంగన్వాడీ కేంద్రాల్లో "అమ్మ మాట-అంగన్వాడీ బాట" కార్యక్రమం నిర్వహించారు. ఈ కార్యక్రమంలో మహిళాభివృద్ధి, శిశు సంక్షేమ శాఖ మంత్రి సీతక్క పాల్గొన్నారు.
ఈ కార్యక్రమంలో మంత్రి సీతక్క మాట్లాడుతూ, పిల్లలు అమ్మ ఒడిలో ఎంత సురక్షితంగా ఉంటారో, అంగన్వాడీల్లో కూడా అంతే సురక్షితంగా ఉంటారని పేర్కొన్నారు. అంగన్వాడీ కేంద్రాలు డిపార్టుమెంట్ సేవలు అందిస్తున్నాయని అన్నారు. అందుకే అందరు పిల్లలను అంగన్వాడీ కేంద్రంలో చదువుకోవడానికి పంపించాలని సూచించారు. ప్రభుత్వం అందరికీ అనుకూలంగా ఉండేలా సిలబస్ ప్రకారం పాఠాలు రూపకల్పన చేయించిందని మంత్రి సీతక్క వెల్లడించారు.
నా మొక్క-నా భవిష్యత్తు కార్యక్రమం : ప్రస్తుతం పిల్లలకు యూనిఫాం కూడా ఇవ్వాలనే ఆలోచనలో ప్రభుత్వం ఉందని మంత్రి సీతక్క పేర్కొన్నారు. భావి తరాలకు మొక్కల విలువ తెలియజేస్తూ "నా మొక్క-నా భవిష్యత్తు" అనే భావన ప్రతి ఒక్కరిలో రావాలని, మొక్కను అంగన్వాడీ కేంద్రంలో నాటడం జరిగిందని అన్నారు. తర్వాత పిల్లలతో, తల్లులతో ర్యాలీ చేయడం జరిగింది. ఈ కార్యక్రమంలో వాకాటి కరుణ, ఉమెన్ అండ్ ఛైల్డ్ వెల్ఫేర్ సెక్రటరీ కాంతి వెస్లీ, ఈశాఖ డైరెక్టర్ అక్కేశ్వరరావు పాల్గొన్నారు. అలాగే అంగన్వాడీ కార్యకర్తలు, పిల్లలు పాల్గొన్నారు.
"అంగన్వాడీ టీచర్లు, హెల్పర్లకు శుభవార్త. పదవీ విరమణ పొందే అంగన్వాడీ టీచర్లకు రూ.2 లక్షలు, సహాయకుడికి రూ.1లక్ష చొప్పున రిటైర్మెంట్ బెనిఫిట్స్ ఇవ్వడం జరుగుతుంది. అలాగే అమ్మ మాట-అంగన్వాడీ బాట కార్యక్రమాన్ని ప్రారంభిస్తున్నాం. రెండు, మూడు రోజుల్లో ఇందుకు సంబంధించిన ప్రభుత్వ జీవో విడుదల చేస్తాం. అంగన్వాడీ సిబ్బందికి ఇచ్చిన మాట నిలబెట్టుకున్నాం." - సీతక్క, మంత్రి
అంగన్వాడీల సమ్మెను నిషేధిస్తూ ఎస్మా అస్త్రం - వేతనాల్లో కోతలు విధించిన ప్రభుత్వం
మినీ అంగన్వాడీలకు మహర్దశ - ప్రధాన కేంద్రాలుగా ఉన్నతీకరిస్తూ ఉత్తర్వులు
