Medigadda Barrage Repairs in Telangana : మేడిగడ్డ ఆనకట్టకు సంబంధించి జాతీయ డ్యాం సేఫ్టీ అథారిటీ నిపుణుల కమిటీ సిఫార్సుల మేరకు మరమ్మతుల విషయమై ప్రభుత్వం దృష్టి సారించింది. ఇందుకు సంబంధించిన అంశాలపై నిర్మాణ సంస్థ ఎల్ అండ్ టీ(L&T) కంపెనీ ప్రతినిధులతో నీటిపారుదల శాఖ ఈఎన్స్సీ అనిల్ కుమార్ సమావేశమయ్యారు. ఎన్డీఎస్ఏ కమిటీ మధ్యంతర నివేదికలో చేసిన సూచనలకు అనుగుణంగా చేయాల్సిన పనులపై సమావేశంలో చర్చించారు. 'ఓ అండ్ ఎం(O & M)' ఈఎన్సీ నాగేందర్ రావు, ఇతర ఇంజినీర్లు పాల్గొన్నారు. ఈ సమావేశానికి ఎల్ అండ్ టీ సంస్థ ప్రతినిధులు సురేశ్, చౌహాన్ తదితరులు హాజరయ్యారు.
ఈ సమావేశంలో మరమ్మతులకు సంబంధించిన అంశాలు, చేయాల్సిన పనులపై చర్చ జరిగింది. పని పూర్తి అయినట్లు గతంలో తమకు ధ్రువీకరణ పత్రం ఇచ్చారన్నారు. ఇప్పుడు మరమ్మతులు చేయాలంటే అనుబంధ ఒప్పందం చేసుకోవాలని తెలిపారు. డబ్బులు అధికంగా చెల్లించాల్సి ఉంటుందని ఎల్ అండ్ టీ(L&T) ప్రతినిధులు పునరుద్ఘాటించినట్లు తెలిసింది. అయితే ఒప్పందం, చెల్లింపుల విషయంలో నిబంధనలకు లోబడే ఉంటాయని స్పష్టం చేశారు. ఒప్పందం ప్రకారమే పనులు చేయాలని నీటి పారుదల శాఖ స్పష్టం చేసినట్లు తెలిసింది.
కొనసాగుతోన్న జస్టిస్ ఘోష్ కమిషన్ దర్యాప్తు : ఇప్పటికే మేడిగడ్డ ఆనకట్టపై రాష్ట్ర ప్రభుత్వం ఏర్పాటు చేసిన జస్టిస్ పీసీ ఘోష్ కమిషన్ విచారణ కొనసాగుతోంది. ఇప్పటికే ఈ కమిషన్ రెండు దఫాలుగా రాష్ట్ర పర్యటనకు వచ్చి మేడిగడ్డను సందర్శించి వెళ్లారు. అలాగే నీటిపారుదల శాఖ అధికారులు, ఈఎన్సీలతో కూడా చర్చించారు. ఆనకట్టకు తదుపరి నష్టం జరగకుండా వర్షాకాలం లోపు చేయాల్సిన మరమ్మతులపైనా కమిషన్ దృష్టి సారించింది.
జాతీయ డ్యాం సేఫ్టీ అథారిటీ ఏర్పాటు చేసిన చంద్రశేఖర్ అయ్యర్ నేతృత్వంలోని నిపుణుల కమిటీ నుంచి మధ్యంతర నివేదికను జస్టిస్ ఘోష్ కమిషన్ తెప్పించుకుంది. ఎన్డీఎస్ఏ కమిటీ ఇచ్చిన సూచనలు పాటించాలని కోరింది. వాటి ఆధారంగా తగు చర్యలు తీసుకోవాలని కమిషన్ రాష్ట్ర నీటిపారుదల శాఖకు ఆదేశించింది. ముఖ్యమంత్రి, మంత్రి ఆమోదం అనంతరం ఈ పనులకు సంబంధించి ఉత్తర్వులు జారీ చేయనున్నారు. అసెంబ్లీ ఎన్నికలకు నెల రోజుల ముందు మేడిగడ్డ బ్యారేజీలోని పలు పిల్లర్లుకు బీటలు బారాయి. ఈ విషయం నాటి నుంచి నేటి వరకు హాట్టాఫిక్గా మారింది.
