TG Govt help Flood Victims RS 16500 : వారం రోజుల నుంచి కురుస్తున్న వర్షాలు రాష్ట్రానికి తీవ్ర నష్టాన్నే తెచ్చాయి. తీవ్ర వర్షాలకు ఎన్నో కుటుంబాలు రోడ్డున పడ్డాయి. ఈ క్రమంలో వారికి అండగా నిలిచేందుకు రాష్ట్ర ప్రభుత్వం ప్రతి కుటుంబానికి రూ.16,500 చొప్పున సాయం అందిస్తున్నట్లు వెల్లడించింది. ఈ సాయం చివరి బాధితుడి వరకూ అందుతుందని రెవెన్యూ, సమాచార, పౌర-సంబంధాల శాఖ మంత్రి పొంగులేటి శ్రీనివాసరెడ్డి భరోసా కల్పించారు. వర్షాల వల్ల నష్టపోయామని ఏ ఒక్క కుటుంబం ఆందోళన చెందాల్సిన అవసరం లేదని అన్నారు. భారీ వర్షాలపై సోమవారం సచివాలయంలో ఆయన ఉన్నత స్థాయి సమీక్ష నిర్వహించారు.
ఈ సందర్భంగా మంత్రి పొంగులేటి మాట్లాడుతూ, రాష్ట్రం వర్షాలు, వరదలతో తీవ్రంగా నష్టపోయిందని అన్నారు. దీంతో అన్ని జిల్లాలను వర్షాలు, వరదలు ప్రభావిత ప్రాంతాలుగా ప్రకటిస్తున్నామని పేర్కొన్నారు. ఈ వరదల వల్ల జరిగిన నష్టాలను అధికారులు పక్కాగా అంచనా వేయాలని ఆదేశించారు. ఒక్కో శాఖ పరిధిలో ఎంత నష్టం జరిగింది, ఎన్ని నిధులు కావాలనే దానిపై పూర్తిస్థాయిలో నివేదిక రూపొందించి ఇవ్వాలన్నారు. ఈ నివేదికలో కేంద్రానికి పంపాల్సిన అంశాలను పొందుపర్చాలని చెప్పారు. వరద ప్రభావిత ప్రాంతాల్లో బాధికులకు యుద్ధ ప్రాతిపదికన సాయం అందించాలన్నారు.
రాష్ట్రవ్యాప్తంగా ఇప్పటివరకు 33 మంది మృతి చెందారని అధికారులు తెలపగా, ఆ కుటుంబాలకు రూ.5 లక్షల ఆర్థిక సాయంతో పాటు ఇందిరమ్మ ఇల్లు మంజూరు పత్రాన్ని అందజేయాలని తెలిపారు. పాక్షికంగా దెబ్బతిన్న ఇళ్లకు ఇందిరమ్మ ఇళ్లు మంజూరు చేయాలని మంత్రి పొంగులేటి కలెక్టర్లను ఆదేశించారు. ఈ సమావేశానికి ముఖ్యమంత్రి సలహాదారు వేం నరేందర్రెడ్డి, సీఎస్ శాంతికుమారి, విపత్తు నిర్వహణ శాఖ ముఖ్య కార్యదర్శి అరవింద్ కుమార్తో పాటు వ్యవసాయ, విద్యుత్, మున్సిపల్, పంచాయతీరాజ్, విద్య, హౌసింగ్, రోడ్లు, నీటి పారుదల శాఖల ముఖ్య అధికారులు పాల్గొన్నారు.
వరద సాయం నేరుగా బ్యాంకు ఖాతాల్లోకి : 'వర్షాలు, వరదలు వల్ల నష్టపోయిన ప్రతి కుటుంబానికి రూ.16,500 చొప్పున అందించి, వాటిని నేరుగా బాధితుల బ్యాంకు ఖాతాల్లోకే జమ చేయనున్నాం. అయితే అప్పుడు సీఎం వరద ప్రభావిత ప్రాంతాల్లో పర్యటించి రూ.10వేలు సాయం ప్రకటించారు. కానీ విధ్వంసాన్ని చూసిన తర్వాత ఆ మొత్తానికి మరో రూ.6,500 జోడించి మొత్తం రూ.16,500కు పెంచారు. వెంటనే ఈ సాయం అందాలని అధికారులు ఆదేశించాం. ప్రాథమికంగా లక్షల ఎకరాల్లో పంట నష్టం జరగ్గా ప్రతి ఎకరానికి రూ.10 వేలు సాయం అందేలా చర్యలు తీసుకుంటాం.' అని మంత్రి పొంగులేటి శ్రీనివాసరెడ్డి స్పష్టం చేశారు. రాష్ట్రంలో వరద బాధితులు 2 లక్షల మందిగా ఉన్నారు.
పత్రాల కోసం పోలీస్ స్టేషన్లలో ప్రత్యేక కౌంటర్లు : వరదల కారణంగా చాలా ఇళ్లలోకి నీరు చేరి భూ, ఆస్తి పత్రాలు, ఆధార్, రేషన్ కార్డులతో పాటు విలువైన అనేక పత్రాలు తడిసిపోవడం, కొట్టుకుపోవడం జరిగాయి. దీంతో బాధితులు ఆందోళన చెందుతున్నారు. దీంతో ప్రభుత్వం ఓ నిర్ణయానికి వచ్చింది? ఈ పత్రాల కోసం స్థానిక పోలీస్ స్టేషన్లో ప్రత్యేక కౌంటర్లు ఏర్పాటు చేసిన చోట దరఖాస్తు చేసుకోవాలని సూచించింది. అలా ఆ దరఖాస్తును పరిశీలించి డూప్లికేట్ పత్రాలను అందిస్తామని, తడిసిన ధాన్యాన్ని పౌర సరఫరాల సంస్థ ద్వారా కనీస మద్దతు ధరకు కొనుగోలు చేస్తామని ప్రభుత్వం భరోసా కల్పించింది.
వర్షం పడితే వణుకే : బిక్కుబిక్కుమంటూ జీవిస్తున్న ఆ ఊరు ప్రజలు - Flood Affects in Telangana
