ఉమ్మడి వరంగల్​లో గవర్నర్ పర్యటన - కాకతీయుల శిల్పకళా అందాలకు ఫిదా - Jishnu Dev Varma visit to Warangal

Governor Jishnu Dev Varma Visit 1000 Pillar Temple : కాకతీయుల శిల్ప సంపద రమణీయంగా ఉందని, ఇదంతా భారతదేశ చారిత్రక సంపదకు నిలయమన్నారు గవర్నర్​ జిష్ణుదేవ వర్మ. మరుగున పడుతున్న వారసత్వ సంపదను వెలుగులోకి తీసుకురావడమే అతి పెద్ద సవాల్​ అని పేర్కొన్నారు. ఉమ్మడి వరంగల్ జిల్లా పర్యటనలో ఉన్న గవర్నర్, ఇవాళ వేయి స్తంభాల గుడి, రామప్ప ఆలయం, లక్నవరం సరస్సును తిలకించారు.

Telangana Governor Jishnu Dev Varma visit to Warangal : ఉమ్మడి వరంగల్​ జిల్లా పర్యటనలో ఉన్న రాష్ట్ర గవర్నర్​ జిష్ణు దేవ్​వర్మ మంగళవారం లక్నవరం సరస్సులో బస చేశారు. ములుగు జిల్లాలో కళాకారులు, క్రీడాకారులు, రచయితలు, గిరిజన ప్రాంతం ముఖ్యులతో విందులో పాల్గొన్నారు. అనంతరం వెంకటాపూర్​ మండలం రామప్ప దేవాలయంలో రామలింగేశ్వర స్వామిని దర్శించుకున్నారు. ఆలయంలో ఉన్న శిల్పాలను గైడ్​ ద్వారా తెలుసుకున్నారు. ఆలయ శిల్పాలను చూసి గవర్నర్​ ఆశ్చర్యం వ్యక్తం చేశారు.

ఆ తర్వాత భూపాలపల్లి జిల్లా ఘనపూర్​ మండల కేంద్రంలో ఉన్న కోటగులను సందర్శించి సాయంత్రం లక్నవరం సరస్సుకు బయలుదేరి అక్కడే బస చేశారు. బుధవారం ఉదయం లక్నవరం సరస్సులో బోటులో గవర్నర్​తో పాటు రాష్ట్ర మంత్రి సీతక్క, కలెక్టర్​ దివాకర్​ టీఎస్​, ఎస్పీ శబరీశ్​ లక్నవరం సరస్సులో బోటు షికారు చేశారు. ఈ కొండల మధ్య ఉన్న సరస్సులో చుట్టూ పచ్చటి అడవి అందాలను తిలకిస్తూ ఆనందపడ్డారు. ఇంతటి ప్రకృతి అందాల మధ్య సరస్సు ఉండడం ఎంతో ఆహ్లాదకరంగా ఉందన్నారు. సరస్సులో అక్కడక్కడ ఉన్న దీవులను పరిశీలించారు. ఈ సరస్సును అభివృద్ధి చేసి పర్యాటకులకు అన్ని సౌకర్యాలు కల్పించాలని అన్నారు.

అనంతరం హనుమకొండకు విచ్చేసిన గవర్నర్​ జిష్ణుదేవ్​ వర్మకు జిల్లా ఇంఛార్జి మంత్రి పొంగులేటి శ్రీనివాసరెడ్డి, అధికారులు సాదర స్వాగతం పలికారు. అనంతరం జిల్లా కలెక్టరేట్​ కార్యాలయంలో ఉన్నతాధికారులతో గవర్నర్​ సమావేశమయ్యారు. రెండు జిల్లాల్లో చేపడుతున్న అభివృద్ధి, సంక్షేమ కార్యక్రమాలను పవర్​ పాయింట్​ ప్రజెంటేషన్​ ద్వారా కలెక్టర్లు గవర్నర్​కు వివరించారు. మధ్యాహ్నం పద్మాక్షి, వేయిస్తంభాల గుడి భద్రకాళీ ఆలయం, వరంగల్​ కోటను సందర్శించారు. గవర్నర్​ పర్యటన సందర్భంగా పోలీసులు పటిష్ఠ బందోబస్తు ఏర్పాటు చేశారు.

వేయి స్తంభాల గుడిని సందర్శించిన గవర్నర్ : హనుమకొండ వేయిస్తంభాల ఆలయాన్ని రాష్ట్ర గవర్నర్​ జిష్ణుదేవ శర్మ సందర్శించారు. గవర్నర్​కు ఆలయ అర్చకులు పూర్ణకుంభంతో స్వాగతం పలికారు. రుద్రేశ్వరస్వామికి ప్రత్యేక పూజలు చేశారు. ఆలయ విశిష్టతను, శిల్పాల ప్రాముఖ్యతను విశ్రాంత ఆచార్యులు పాండురంగారావు తెలియజేశారు. ఇటీవలే పునర్నిమించిన కల్యాణ మండపాన్ని గవర్నర్​ వీక్షించారు. మండపం నిర్మాణ పనులకు సంబంధించిన వీడియోను తిలకించారు.

ఈ సందర్భంగా అర్చకులు, ఆలయ అధికారులు గవర్నర్​కు స్వామి శేషవస్త్రాలను బహుకరించి, వేదాశీర్చచనాలు పలికారు. కాకతీయ కట్టడాలు అద్భుతంగా ఉన్నాయని గవర్నర్​ అన్నారు. శిల్ప సంపద రమణీయంగా ఉందని కొనియాడారు. భారతదేశం చారిత్రక సంపదకు నిలయమని, మరుగున పడుతున్న వారసత్వ సంపదను వెలుగులోకి తీసుకురావడమే సవాల్​ అని పేర్కొన్నారు. వాటిని పరిరక్షించుకోవాల్సిన బాధ్యత మనపైన ఉందని గవర్నర్​ జిష్ణు దేవ వర్మ అన్నారు.