Telangana Assembly Budget Session 2024 2nd Day : తెలంగాణ అసెంబ్లీ సమావేశాలు రెండో రోజు కొనసాగనున్నాయి. ఉదయం 10 గంటలకు సభ ప్రారంభంకాగానే ప్రశ్నోత్తరాల కార్యక్రమం కొనసాగనుంది. శాసనసభలో ప్రశ్నలు అడిగేందుకు మొత్తం పది ప్రశ్నలకు ఆమోదం లభించింది. ఇప్పటికే ఆయా శాఖలకు ఈ ప్రశ్నలను పంపించి సంబంధిత శాఖల మంత్రులు సమాచారం తెప్పించుకున్నారు. సభలో ఇందుకు సంబంధించిన సమాధానాలు ఇవ్వనున్నారు. మరోవైపు నేటి సమావేశాల్లో కేంద్ర సర్కార్ బడ్జెట్లో తెలంగాణకు చేసిన అన్యాయం గురించి కూడా చర్చ జరగనుంది. మరోవైపు ఇవాళ్టి నుంచి శాసనమండలి సమావేశాలు ప్రారంభం కానున్నాయి.
అసెంబ్లీలో అడిగే 10 ప్రశ్నలు ఇవే :
- పాఠశాలలు, కళాశాలల బస్సుల ఫిట్నెస్ తనిఖీలు
- తండాలు గ్రామపంచాయతీలుగా ఉన్నతీకరణ
- ఆర్టీసీ సిబ్బందిని ప్రభుత్వ ఉద్యోగులుగా గుర్తింపు
- వాణిజ్య పన్నుల శాఖలో అవకతవకలు
- నిజామాబాద్ పట్టణ అసెంబ్లీ నియోజకవర్గంలో క్రీడా సముదాయం
- తెలంగాణ రాష్ట్రంలో ఎన్ఐటీ ఉద్యోగులుగా గుర్తింపు
- ఆరోగ్యశ్రీ పెండింగ్‌ బిల్లుల చెల్లింపు
- ఫీజు రీఎంబర్స్‌మెంట్‌ బకాయిలు
- జాతీయ రహదారి విస్తరణ పనులు
- మూసీనదికి ఉస్మాన్‌ సాగర్‌, హిమాయత్‌ సాగర్‌ చెరువుల అనుసంధానం
ఈ ప్రశ్నలు ముగిసిన అనంతరం మంగళవారం బీఏసీలో తీసుకున్న నిర్ణయాలను సభా నాయకుడు సీఎం రేవంత్ రెడ్డి వెల్లడించనున్నారు. అనంతరం 2022-23 ఆర్థిక సంవత్సరానికి సంబంధించి నార్తన్ పవర్ డిస్ట్రిబ్యూషన్ కంపెనీ, ట్రాన్స్మిషన్ కార్పొరేషన్ ఆఫ్ తెలంగాణ లిమిటెడ్ వార్షిక నివేదికలను ఉపముఖ్యమంత్రి భట్టి విక్రమార్క సభ ముందు ఉంచనున్నారు. అదేవిధంగా తెలంగాణ రాష్ట్ర ట్రేడ్ ప్రమోషన్ కార్పొరేషన్ లిమిటెడ్ 4,5 6 వార్షిక నివేదికలను శాసనసభ వ్యవహారాల మంత్రి దుద్దిళ్ల శ్రీధర్‌బాబు సభ ముందు ఉంచుతారు.
ఈనెల 31 వరకు అసెంబ్లీ సమావేశాలు - ఆదివారం మాత్రం బ్రేక్ - TELANGANA ASSEMBLY SESSSIONS 2024
సభలో పలువురికి సంతాపం : తర్వాత వరంగల్‌ జిల్లా చెన్నూరు అసెంబ్లీ మాజీ ఎమ్మెల్యే నెమరగొమ్ముల సుధాకర్‌రావు, హైదరాబాద్‌ నాంపల్లి మాజీ శాసనసభ్యుడు మహ్మద్‌ విరాసత్‌ రసూల్‌ ఖాన్‌, నిజామాబాద్ అసెంబ్లీ నియోజకవర్గ మాజీ శాసనభ్యుడు ధర్మపురి శ్రీనివాస్‌, నిర్మల్‌ జిల్లా ఖానాపూర్‌ మాజీ ఎమ్మెల్యే రమేశ్ రాఠోడ్‌ల మృతి పట్ల శాసనసభ తన ప్రగాఢ సంతాపాన్ని తెలియజేస్తుంది. ఆ తర్వాత హైదరాబాద్‌ మెట్రో సిటీలో స్థిరమైన పట్టణాభివృద్ధికి చర్యలపై లఘు చర్చ జరగనుంది.
కేంద్ర బడ్జెట్పై అభ్యంతరం, అభిప్రాయాలు సేకరణ : కేంద్రం ప్రవేశపెట్టిన బడ్జెట్లో రాష్ట్రానికి మొండి చేయి చూపించడంపై సీఎం రేవంత్ రెడ్డి తీవ్ర అభ్యంతరం వ్యక్తం చేసిన విషయం తెలిసిందే. ఇదే విషయాన్ని అసెంబ్లీలో ప్రవేశపెట్టి అందరి అభిప్రాయాలు సేకరించి ఏకగ్రీవ తీర్మానం చేసి కేంద్రానికి పంపాలని నిర్ణయించారు. ఈ మేరకు శాసనసభ వ్యవహారాల శాఖ మంత్రి శ్రీధర్ బాబుకు సీఎం సూచించారు. ఇందుకు బీజేపీ, బీఆర్ఎస్, ఎంఐఎం పార్టీల వైఖరి ఏంటో తెలపాలని సీఎం కోరారు. రాష్ట్ర ప్రయోజనాల కోసం భేషజాలాలకు పోకుండా అన్ని పార్టీలు కలిసి వస్తాయని ప్రభుత్వం భావిస్తోంది.
