మగవాళ్లూ మారాలి - బాధను పంచుకోకున్నా తప్పదు మరణముప్పు!

ఆరోగ్య సమస్యలను ఇతరులతో పంచుకోక బాధ పడే మగవాళ్లలో ఎక్కువగా గుండెజబ్బులు - యూనివర్సిటీ ఆఫ్‌ షికాగో శాస్త్రవేత్తలు తేల్చిన నిజాలు ఇవే!

This Habits Causes Heart Disease in Men : పలు విషయాల్లో ఆడవాళ్లు బేలగా మారి, ఏదైనా ఉంటే పైకి చెప్పుకుని బాధపడతారు. దాంతో ఆ విచారం నుంచి ఉపశమనం కూడా పొందుతారు. పురుషులు అలా కాదు. గుంభనంగా ఉంటారు. ఏ విషయాన్నీ పైకి డైరెక్ట్​గా చెప్పరు. నోరు తెరిచి హెల్ప్​ అడగలేరు. ఇలా చేస్తే ఎక్కడ తమను నలుగురూ చిన్నచూపు చూస్తారోననే భయం. ఇదిగో ఈ అలవాటే మగవాళ్లలో ముఖ్యంగా గుండెజబ్బులు పెరగడానికి కారణం అంటోంది యూనివర్సిటీ ఆఫ్‌ షికాగో శాస్త్రవేత్తలు చేసిన ఓ అధ్యయనం.

చిన్న అనారోగ్యమేగా? అన్న నిర్లక్ష్యపు ధోరణి.. ‘ఇది మనల్ని ఏం చేస్తుందిలే అనే ధీమా వాళ్లని సకాలంలో ట్రీట్​మెంట్​ తీసుకోనివ్వకుండా చేస్తున్నాయట. ఒక వేళ వాళ్లకి నిజంగా ఏదైనా సమస్య ఉందని తెలిసినా, దాని గురించి చర్చించడానికీ పెద్దగా ఇష్టపడరట. 24 సంవత్సరాల కాలంలో సుమారు 1400 మందిపైన చేసిన రీసెర్చ్​లో ఈ వాస్తవాలు వెల్లడయ్యాయి. అనారోగ్య సమస్యలు తలెత్తినప్పుడు ఎవరేమనుకుంటారో అనే విషయాన్ని పూర్తిగా పక్కన పెట్టి, ఉన్నది ఉన్నట్టుగా చెప్పడం చాలా కీలకం అంటున్నారు అధ్యయనవేత్తలు.

ఈ అలవాటుతోనూ మగవాళ్లలో గుండెజబ్బులు

మగవారిలో గుండె జబ్బులు పెరుగుతున్న సంఖ్య ఆందోళన కలిగిస్తోంది. దీనికి ప్రధాన కారణం ఆధునిక జీవనశైలిలోని కొన్ని అలవాట్లు. ఈ అలవాట్లను మార్చుకోవడం ద్వారా గుండె జబ్బులను నివారించుకోవచ్చు.

ధూమపానం : సిగరెట్, బీడీ వంటివి తాగడం గుండెకు పెద్ద శత్రువు. ఇది రక్తనాళాలను కుంచించుకుపోయేలా చేసి, గుండెపోటుకు ప్రధాన కారణం.

అధిక ఆల్కహాల్ సేవనం : అధికంగా మద్యం తాగడం కూడా గుండెకు హాని కలిగిస్తుంది. ఇది రక్తపోటును పెంచి, గుండె కండరాలను దెబ్బతీస్తుంది.

అనారోగ్యకరమైన ఆహారం : ఎక్కువగా జంక్ ఫుడ్, కొవ్వు ఆహారాలు, తీపి పదార్థాలు తీసుకోవడం కొలెస్ట్రాల్ స్థాయిని పెంచి, గుండె జబ్బులకు దారితీస్తుంది.

శారీరక శ్రమ లేకపోవడం : వ్యాయామం చేయకపోవడం వల్ల శరీరంలో కొవ్వు పెరిగి, బ్లడ్​ ప్రెజర్, షుగర్ వంటి సమస్యలు వచ్చి గుండెపోటుకు దారితీస్తుంది.

ఒత్తిడి : అధిక ఒత్తిడి గుండెపోటుకు ప్రధాన కారణాలలో ఒకటి.

నిద్ర లేమి : సరిపడా నిద్ర పోకపోవడం కూడా గుండె ఆరోగ్యాన్ని ప్రభావితం చేస్తుంది.

అధిక బరువు : స్థూలకాయం గుండెపోటు, షుగర్, రక్తపోటు వంటి అనేక రోగాలకు దారితీస్తుంది.

గుండె జబ్బులను నివారించడానికి చేయవలసినవి

• ధూమపానం, మద్యపానం వంటి అలవాట్లను వెంటనే మానుకోవడం చాలా ముఖ్యం.
• పండ్లు, కూరగాయలు, తృణధాన్యాలు, చేపలు వంటి ఆహారాలను ఎక్కువగా తీసుకోవాలి.
• రోజూ కనీసం 30 నిమిషాలు పాటు వ్యాయామం చేయడం ప్రధానం.
• యోగా, ధ్యానం వంటివి చేయడం ద్వారా ఒత్తిడిని నియంత్రించవచ్చు.
• రోజూ 7-8 గంటలు నిద్రపోవడం చాలా ముఖ్యం.
• ఆరోగ్యకరమైన ఆహారం తీసుకోవడం సహా వ్యాయామం చేయడం ద్వారా బరువును నియంత్రించుకోవచ్చు.
• ఏదైనా సమస్య ఉంటే వెంటనే గుర్తించి చికిత్స తీసుకోవడం చాలా ముఖ్యం.

NOTE : పైన తెలిపిన వివరాలు కేవలం సాధారణ సమాచారం కోసం మాత్రమే. ఏదైనా వైద్య సమస్య ఉంటే వెంటనే డాక్టర్​ను సంప్రదించండి.