లారీని ఢీకొట్టిన ప్రైవేట్ ట్రావెల్స్ బస్సు - ఐదుగురు కూలీల దుర్మరణం

సూర్యాపేట జిల్లాలో ఆగి ఉన్న లారీని ఢీకొన్న ప్రైవేటు బస్సు - ఐదుగురు మృతి - మృతులు ఒడిశాకు చెందిన కార్మికులుగా గుర్తింపు

Several People Died in Road Accident in Suryapet District : ఇసుక లారీని ప్రైవేట్‌ బస్సు ఢీకొట్టడంతో ఐదుగురు మృతి చెందారు. ఈ ఘటన సూర్యాపేట జిల్లాలో చోటు చేసుకుంది. పూర్తి వివరాల్లోకి వెళితే, సూర్యాపేట జిల్లాలో ఘోర రోడ్డు ప్రమాదం చోటు చేసుకుంది. ఒడిశా నుంచి హైదరాబాద్ వస్తున్న ప్రైవేట్‌ బస్సు సూర్యాపేట జిల్లా చివ్వెంల మండలం ఐలాపురం వద్ద ఆగి ఉన్న ఇసుక లారీని ఢీ కొట్టింది.

ఈ ఘటనలో ఒడిశాకు చెందిన ఐదుగురు వలస కూలీలు మృతి చెందారు. ఘటనా స్థలంలోనే నలుగురు మృతి చెందగా, ఆస్పత్రిలో చికిత్స పొందుతూ మరొకరు చనిపోయారు. మరో 17 మందికి గాయాలయ్యాయి. బస్సులో మొత్తం 32 మంది ప్రయాణికులు ఉన్నారు. ఘటనా స్థలానికి చేరుకున్న పోలీసులు క్షతగాత్రులను చికిత్స నిమిత్తం సూర్యాపేట ఏరియా ఆసుపత్రికి తరలించారు. భారీ క్రేన్ సాయంతో బస్సును రోడ్డుపై నుంచి పక్కకు తొలగించారు.