Ration Card E KYC Last Date : బోగస్ కార్డుల ఏరివేతకు ప్రభుత్వం చేపట్టిన రేషన్కార్డు ఈకేవైసీ ప్రక్రియకు గడువు ముగియనుంది. ఈ నెల 31వరకు గడువు ఉండగా మేడ్చల్, మల్కాజిగిరి జిల్లా మినహా హైదరాబాద్, రంగారెడ్డి జిల్లాల్లో ప్రక్రియ మాత్రం మెల్లగా సాగుతోంది. ఈ రెండు జిల్లాల్లో కలిపి 20-30శాతం మేర కార్డు దారులు ఈ-కేవైసీ చేయించుకోలేదని అధికారులు తెలిపారు. మరణించినవారి పేర్లు, వివాహాలు చేసుకొని వెళ్లిపోయిన ఆడపిల్లల పేర్లు తొలగించకుండా బియ్యం కోటాను తీసుకుంటున్నవారు ఉంటున్నారు.
ఈ నేపథ్యంలోనే దీనికి సంబంధించిన వివరాలు అప్డేట్ కొరకు గతేడాది సెప్టెంబరులో ఈ ప్రక్రియను ప్రారంభించింది. లబ్ధిదారుల వివరాలతో పాటు వేలిముద్రలను మరోసారి సేకరిస్తున్నారు. దూర ప్రాంతాల్లో ఉంటున్నవారు అక్కడి చౌకధరల దుకాణానికి వెళ్లి ప్రక్రియ పూర్తిచేసుకునే వెసులుబాటు కల్పించినట్టు అధికారులు చెప్పారు.
రేషన్ కార్డు కావాలా? - కేవైసీ చేయకపోతే ఏం జరుగుతుంది?
బోగస్ రేషన్ డీలర్లకు చెక్: ఈకేవైసీతో పాటు బోగస్ రేషన్ డీలర్లకు సంబంధించిన తనిఖీలు జరుగుతున్నాయని హైదరాబాద్, రంగారెడ్డి జిల్లాల పౌరసరఫరాల అధికారులు తెలిపారు. రంగారెడ్డి జిల్లాలో ఇద్దరిని గుర్తించినట్లు పేర్కొన్నారు. గత బీఆర్ఎస్ ప్రభుత్వ హయాంలోనే రేషన్ కార్డుదారులు ఈ-కేవైసీ నమోదు చేసే కార్యక్రమం మొదలు పెట్టారు. గడిచిన రెండు నెలలుగా ఈ కార్యక్రమం కొనసాగుతోంది. అయితే ఇప్పటికి చాలా చోట్ల రేషన్కార్డుల ఈ-కేవైసీ అప్డేట్ చేయాల్సింది ఉందని సమాచారం. గడువు ఉంది కదా అని కొందరు లైట్ తీసుకుంటుండగా ఆధార్ అప్డేట్ సమస్యలతో చాలా మంది ఈ-కేవైసీ పూర్తి చేయలేకపోతున్నారని అధికారులు తెలిపారు.
రాష్ట్రంలో రేషన్ తీసుకోని వారు అంతమంది ఉన్నారా - మరి వారి పరిస్థితి ఏంటి?
రేషన్ కేంద్రాల్లో చాలా మంది ఈ-కేవైసీ పూర్తికావడం లేదు. దీనికి రేషన్కార్డు దారులు ఆధార్ అప్డేట్ చేసుకోకపోవడమే కారణమని డీలర్లు చెబుతున్నారు. దీంతో జనాలు ఆధార్ కేంద్రాలకు అప్డేట్ కోసం పరుగులు తీస్తున్నారు. అయితే ఆధార్ సెంటర్స్ తగినన్ని లేకపోవడంతో ఉన్న కొద్దిపాటి కేంద్రాల వద్ద జనాలు క్యూ కడుతున్నారు. చాలా మంది ఒకటి కన్నా ఎక్కువ సార్లు ఇటు రేషన్ కేంద్రాల చుట్టూ అటు ఆధార్ సెంటర్స్ చుట్టూ అప్డేట్ కోసం తిరుగుతున్నారు.
