Problems in Medaram : 'అందరికీ శుభోదయం. నేను మీ మేడారాన్ని. సమక్క- సారక్క తల్లులకు (Sammakka Saralamma Jatara 2024) నెలవై, అన్ని వర్గాలకు కొలువై, కోటిన్నర మందిని అక్కున చేర్చుకున్నాను. నా చెంత విధులు నిర్వహించిన ప్రభుత్వ యంత్రాంగానికి, అమ్మల దర్శనానికి వచ్చిన ప్రముఖులతో పాటు భక్త జనానికి అసౌకర్యం కలగకుండా జాగ్రత్తపడ్డాను. ఆర్టీసీ బస్సులు, ప్రైవేట్ వాహనాలు, హెలికాప్టర్లు, కాలినడకన ఇలా ఎవరెలా చేరుకున్నా, అందరినీ మళ్లీ సురక్షితంగా ఇళ్లకు పంపాను.
మహాజాతర (Medaram Jatara 2024) అంగరంగ వైభవంగా జరిగింది. గత బుధవారం తిరుగువారం పండుగతో జాతర ముగిసింది. అలాగని నన్ను ఇప్పుడు పట్టించుకోకుండా అనాథను చేయకండి. ఇప్పుడిక నన్నే నమ్ముకుని ఉంటున్న గ్రామస్థుల బాగోగులు చూసుకోవాల్సిన గురుతర బాధ్యత నాపై ఉంది. ఇందుకు అధికార గణం, స్వచ్ఛంద సంస్థల సహకారం కావాలి. తిరుగువారం ముగిసినందున నాలుగు మాటలు చెబుదామని మీ ముందుకు వచ్చాను. నా సూచనలు, సలహాలు పాటిస్తూ నన్ను బాగు చేస్తారని ఆశిస్తున్నాను.
బాధ్యతగా పరిసరాలు శుభ్రం : ఈసారి నా జాతరకు కోటిన్నర మంది వచ్చిపోయారు. అలాంటి చోట మురుగు కాలువల స్వరూపం ఎలాగుంటుందనేది మీరూ ఊహించండి. చెత్తాచెదారం పేరుకుపోయింది. కొన్నిచోట్ల దుర్వాసన వస్తోంది. దోమల బెడద అధికంగా ఉంది. ఇక్కడి నా ప్రజలు తీవ్ర అవస్థలను ఎదుర్కొంటున్నారు. పారిశుద్ధ్య కార్మికులందరికీ నాదొక విన్నపం. పరిసరాలు శుభ్రం చేయండి. జాతరకు ముందు ఎలా ఉందో, ఇప్పుడలా తయారు చేయాలని మనవి.
సమ్మక్క సారలమ్మ జాతరలో గిరిజన మ్యూజియం - వారి జీవన విధానాన్ని విశ్వవ్యాప్తం చేసేందుకు కృషి
జంపన్న వాగును చూడండి : జంపన్న వాగులో లక్షలాది మంది పుణ్య స్నానాలు ఆచరించారు. జలకాలాటలాడారు. దీంతో పరిసరాలు అపరిశుభ్రంగా మారాయి. వెంటనే బాగు చేయండి. భవిష్యత్‌ తరాలను నేను సమాధానపరచాలి. ఇందుకు మీ తోడ్పాటు తప్పనిసరి కావాలి.
ఇంటింటా వైద్య పరీక్షలు తప్పనిసరి : మేడారం జాతరప్పుడు ప్రత్యేకంగా ఒక ఆసుపత్రి నడిపారు. పరిసరాల్లో వైద్య శిబిరాలు నిర్వహించారు. ఆపదలో ఉన్న వారికి అత్యవసర చికిత్స అందించారు. ఇప్పుడిక ఎల్లవేళలా నా దగ్గర ఉండే ప్రజల బాగోగులు చూడాలి. ముందుగా అందరిని ఆరోగ్యవంతులు చేయాలి. ఇందకోసం ఇంటింటా వైద్య పరీక్షలు జరిపి అవసరమైన వారికి మందులను ఉచితంగా పంపిణీ చేస్తే ఇది సాధ్యమవుతుంది. గ్రామంలో అందరికీ అందుబాటులో ఉండే విధంగా వైద్య శిబిరాలు నిర్వహించండి.
ప్లాస్టిక్‌తోనూ ముప్పుంది : పర్యావరణ పరిరక్షణలో (Environmental Protection)భాగంగా వస్త్ర సంచులు వినియోగించిన వారికి రుణ పడి ఉంటాను. ప్లాస్టిక్‌తో పొంచి ఉన్న ముప్పు గురించి మీకు తెలియంది కాదు. ఏ మాత్రం ఆలస్యం చేయకుండా ఎక్కడ ప్లాస్టిక్ ఉన్నా తొలగించాలి. మీరు మేల్కొంటే అందరికి మంచి చేసిన వారవుతారు.
మేడారం వీరవనితలు సమ్మక్క సారలమ్మల ఖ్యాతి చాటేలా కళాకారుడి పాట
క‘న్నీటి’ కష్టాలు తొలగించండి : జాతర సమయంలో నీటి కోసం భక్తులు ఇబ్బందులు ఎదుర్కొన్నారు. కొన్ని ప్రాంతాల్లో భూగర్భ జలం ఇంకి నీటికి కొరత ఏర్పడింది. ఇంకొన్ని ప్రదేశాల్లో నీరు వృథాగా పోయింది. ఇప్పుడు ఎండాకాలంలోకి అడుగు పెట్టాం. నా ప్రజల కన్నీటి కష్టాలు తొలగించండి. ఎక్కడైనా లీకేజీలుంటే నివారించండి. నీటి సరఫరా జరగని ప్రాంతాలుంటే గుర్తించి, తగు చర్యలు చేపట్టండి. దాహార్తికి తోడు గ్రామస్థుల అవసరాలకు సరిపడే నీరు ఉండేలా చూడండి. ఆ తల్లుల దీవెనలు ఎప్పటికీ మీకు ఉండాలని మనస్పూర్తిగా కోరుకుంటూ మీ మేడారం.'
