లగచర్ల ఘటన అప్​డేట్​ - పోలీసుల అదుపులో మరో 8 మంది

లగచర్ల ఘటనలో పోలీసుల అదుపులో మరో 8 మంది - వారందరినీ విచారించిన పోలీసులు - వైద్య పరీక్షల అనంతరం కోర్టులో హాజరుపర్చనున్న పోలీసులు

Lagacharla Incident Update : లగచర్ల ఘటనలో పోలీసులు దూకుడు పెంచారు. తాజాగా మరో 8 మందిని అదుపులోకి తీసుకొని విచారించారు. అనంతరం వీరందరినీ పరిగి పోలీస్ స్టేషన్​కు తరలించారు. తొలుత వైద్య పరీక్షలు నిర్వహించి, అనంతరం కోర్టులో హాజరుపరచనున్నారు. ఈ కేసులో ఇప్పటికే పోలీసులు 17 మందిని అరెస్టు చేసి రిమాండ్​కు తరలించారు. అందులో 16 మంది గ్రామస్థులు కాగా, ఇంకొకరు కొడంగల్​ మాజీ ఎమ్మెల్యే పట్నం నరేందర్​ రెడ్డి. వీరిలో పట్నం నరేందర్​ రెడ్డిని చర్లపల్లి జైలుకు పంపించగా, మిగతా 16 మందిని పరిగి నుంచి సంగారెడ్డి జైలుకు తరలించారు. ఈ నెల 11వ తేదీన లగచర్లలో అధికారులపై గ్రామస్థులు దాడి చేశారు. ఈ దాడి కేసును పోలీసులు దర్యాప్తు చేస్తున్న సంగతి తెలిసిందే.

ఘటనపై వివరాలు సేకరిస్తున్న డీజీ మహేశ్​ భగవత్ : మరోవైపు లగచర్ల ఘటనపై వికారాబాద్​ జిల్లా పోలీసు కార్యాలయంలో డీజీ మహేశ్​ భగవత్ వివరాలను సేకరిస్తున్నారు. లగచర్లతో పాటు పరిసర గ్రామాల్లోనూ పరిస్థితిపై ఆరా తీస్తున్నారు. పరారీలో ఉన్నవారి కోసం పోలీసులు ప్రత్యేక బృందాలుగా ఏర్పడి గాలిస్తున్నారు.

అసలేం జరిగిందంటే : ఈ నెల 11వ తేదీన కొడంగల్​లోని లగచర్లలో ఫార్మా కంపెనీ ఏర్పాటు సంబంధించి అక్కడి గ్రామాల్లో భూసేకరణ నిమిత్తం ఆ జిల్లా కలెక్టర్, ఇతర అధికారులు అక్కడి వెళ్లారు. తాము భూములు ఇచ్చే ప్రసక్తే లేదని, అసలు తమకు ఫార్మా కంపెనీనే వద్దని గ్రామస్థులు తేల్చి చెప్పారు. ఈ క్రమంలోనే కలెక్టర్​, ఇతర అధికారులపై విచక్షణారహితంగా దాడులు చేశారు. కలెక్టర్​ కారుపై రాళ్లు రువ్వారు. అక్కడే ఉన్న ఇతర అధికారులపై మూకుమ్మడి దాడి చేశారు. ఈ ఘటనతో దుద్యాల మండలం లగచర్ల, పులిచర్ల కుంట, రోటిబండ తండాలు వార్తల్లో నిలిచాయి.

అధికారులపై దాడి ఘటనను డీజీపీ సీరియస్​గా తీసుకున్నారు. దాడికి పాల్పడిన నిందితులను ఎట్టి పరిస్థితుల్లోనూ విడిచిపెట్టే ప్రసక్తే లేదని చెప్పారు. ఆ క్రమంలో ఆ గ్రామాలను పోలీసులు చుట్టుముట్టారు. అలా ఆ అర్ధరాత్రి 50 మందిని పోలీసులు అదుపులోకి తీసుకొని ప్రశ్నించారు. వారిలో 34 మందిని విడిచిపెట్టగా, 16 మందిని అదుపులోకి తీసుకున్నారు. వారిని రిమాండ్​కు తరలించారు. మిగిలిన వారు పరారీలో ఉన్నారు. ఈ కేసుతో సంబంధం ఉందని భావించి కొడంగల్​ మాజీ ఎమ్మెల్యే పట్నం నరేందర్​ రెడ్డిని అదుపులోకి తీసుకున్నారు. ప్రస్తుతం ఆరు రోజుల నుంచి అక్కడ పోలీసులు రెక్కీ నిర్వహిస్తున్నారు. దీంతో గ్రామస్థులు భయంభయంగా గడుపుతున్నారు.