సోషల్​ మీడియాలో అలాంటి పోస్టులు షేర్ చేస్తే చిప్పకూడే - బీ కేర్​ ఫుల్

సామాజిక మాధ్యమాల్లో అభ్యంతకర పోస్టులు పెట్టేవారిపై పోలీసుల ఫోకస్ - వివాదాస్పద వ్యాఖ్యలు చేసేవారిపై నిఘా

Police Action Social Media Posts : ఆధునిక సమాజంలో మాటలకంటే సెల్​ఫోన్​ మీటలే ప్రమాదకరంగా మారుతున్నాయి. ​ఫోన్‌ చేతిలో ఉంది కదా అని సోషల్ మీడియాలో అవసరం లేకున్నా అనాలోచితంగా అసభ్యకర పోస్టులను, వ్యంగ్యాస్త్రాలు సంధిస్తూ ఆ రోజుకి ఆనందం పొందుతున్నప్పటికీ చివరకు కటకటాలపాలవుతున్నారు. చట్టాలు ఏం చెబుతున్నాయి. ఈ నేపథ్యంలో సోషల్ మీడియా పోస్టుల విషయంలో ఎలాంటి జాగ్రత్తలు తీసుకోవాలి అనే విషయంతో పాటు తప్పుడు పోస్టులు పెడితే ఎలాంటి కేసులు నమోదు చేయవచ్చో తెలుసుకుందాం.

సోషల్ మీడియాలో అసభ్యకర పోస్టులు పెడితే : నల్గొండ జిల్లాకు చెందినటువంటి ఓ యువతి ఏపీ ముఖ్యమంత్రి కుటుంబసభ్యులను కించపరిచేలా వ్యాఖ్యలు చేస్తూ సోషల్ మీడియాలో పోస్ట్‌ చేశారు. సదరు యువతి వాడుతున్న ఫేస్‌బుక్‌ అకౌంట్​కు తన సోదరుడి సెల్​ఫోన్ నంబరు లింకై ఉండటంతో ఆ రాష్ట్ర పోలీసులు ఇటీవల గ్రామానికొచ్చి అతడిని అరెస్టుచేసి తీసుకెళ్లారు. ఇంజినీరింగ్ విద్య పూర్తి చేసి, ఉన్నత చదువుల కోసం విదేశాలకు వెళ్లే ఆలోచనలో ఉన్న ఆ యువకుడి భవిష్యత్తు ప్రస్తుతం ప్రశ్నార్థకంగా మారింది.’’

భవిష్యత్ అంధకారం : ముఖ్యంగా తెలుగు రాష్ట్రాలైన ఏపీ, తెలంగాణల్లో నెలకొన్న రాజకీయ పరిస్థితులపై పాలక, ప్రతిపక్ష పార్టీల సోషల్‌మీడియా టీమ్‌లు పరస్పర ఆరోపణలు చేసుకుంటున్నాయి. ఆ పోస్టులను చూసి స్పందిస్తున్న కొందరు తమ పార్టీ, నాయకుడిపై అభిమానం చాటుకోవాలన్న తపనతో విచక్షణ మరచి సోషల్ మీడియాలో పోస్టులు పెట్టి భవిష్యత్తును అంధకారం చేసుకుంటున్నారు. అనవసర విషయాల్లో తలదూర్చి ఆపద కొనితెచ్చుకుంటున్నారు.

కేసులతో నష్టమిలా :

• చదువులు, ఉద్యోగాల నిమిత్తం విదేశాలకు వెళ్లేవారు పోలీసుల నుంచి నిరభ్యంతర ధ్రువపత్రాన్ని (ఎన్‌వోసీ) తీసుకోవాలి. నో అబ్జెక్షన్ సర్టిఫికెట్ కోసం దరఖాస్తు చేసినప్పుడు హిస్టరీ ప్రొఫైల్‌ తీస్తారు. ఏవైనా కేసులుంటే ఎన్‌వోసీ ఇవ్వరు.
• ఒక్కసారి కేసు నమోదైందంటే వారిపై పోలీసుల నిఘా ఉంటుంది. దీనివల్ల పిల్లల తల్లిదండ్రులకూ ఇబ్బందే. కేసులు నమోదైతే వారు దొరకనిపక్షంలో కన్నవారిని స్టేషన్‌కు తీసుకొస్తారు.
• సోషల్​ మీడియాలో అసభ్యకర పోస్టులు పెట్టినా, అసత్య ప్రచారాలు చేసినా లైకులు కొట్టినా అంతే సంగతులు. పోలీసు యంత్రాంగం చట్టపరంగా చర్యలు తీసుకుంటుంది.

సోషల్ మీడియాలో ఇలా చేయడం నేరం : ఉద్దేశపూర్వకంగానో లేదా దురుద్దేశంతో సోషల్​ మీడియాలో వ్యక్తిత్వ హననానికి పాల్పడకూడదు. ఇలాంటి సమాచారాన్ని ప్రజలకు షేర్ చేయవద్దు. జనం మధ్య విద్వేషాలు రెచ్చగొట్టేలా పోస్టులు చేయకూడదు. క్షణికానందం కోసం రాజకీయ నాయకులు, ప్రత్యర్థులు, విరోధులపై సోషల్ మీడియాలో అసభ్యకర పోస్టులు పెడితే జీవితం అంధకారమవుతుంది.

చట్టాలు, శిక్షలు : భారతీయ న్యాయ సంహిత(బీఎన్‌ఎస్‌), ఐటీ చట్టం, సైబర్‌ క్రైమ్స్​ యాక్ట్​ ప్రకారం ఫేక్, మార్ఫింగ్‌ చిత్రాలు, వీడియోలు వ్యాప్తి చేసి, అవతలి వ్యక్తుల వ్యక్తిత్వ హననానికి పాల్పడినట్లయితే

• 67 ఆఫ్ ఐటీ చట్టం కింద కేసు
• నేరం రుజువైనట్లయితే మూడేళ్ల జైలుశిక్ష
• జరిమానా రూ.5 లక్షలు

అసభ్యకర పోస్టులు పెట్టినట్లయితే

• 67 ఏ ఆప్‌ ఐటీ చట్టం కింద కేసు
• 5 ఏళ్ల పాటు జైలు శిక్ష
• రూ.10 లక్షల జరిమానా విధించే అవకాశం

ప్రముఖ వ్యక్తుల పేర్లతో (ఇంపర్షన్‌)

• 66డీ ఆప్‌ ఐటీ చట్టం కింద కేసు
• 3 ఏళ్లు జైలు శిక్ష
• లక్ష రూపాయల జరిమానా

తప్పుడు డాక్యుమెంట్లు సృష్టించి

• బీఎన్‌ఎస్‌(భారత న్యాయ సంహిత) చట్టంలోని 336(4) సెక్షన్‌ కింద కేసు నమోదు చేస్తారు.
• సమాజంలో సంఘాలు, సమూహాల మధ్య విద్వేషాలను రెచ్చగొట్టేలా పోస్టులు పెట్టినట్లయితే
• భారత న్యాయ సంహిత చట్టంలోని 356(2) సెక్షన్‌తోపాటు పరువునష్టం కింద కేసులు నమోదు చేసే అవకాశం
• జుగుప్సాకరంగా ఉన్న ఫొటోలు, వీడియోలు ఆన్‌లైన్‌లో అప్‌లోడ్‌ చేస్తే
• ఎలక్ట్రానిక్స్‌ ఎవిడెన్స్‌గా పరిగణించి భారత న్యాయ సంహిత చట్టంలోని 353(2) సెక్షన్‌ కింద కేసు.

పోలీసులు ఏం చెబుతున్నారంటే? : చేతిలో సెల్​ఫోన్​ ఉంది కదా అని ఏవి పడితే అవి వైరల్‌ చేయకూడదు. అవమానకర, అసభ్యకర సమాచార మార్పిడికి అడ్మిన్లే బాధ్యులు. ఈ విషయాల్లో పిల్లలు భాగస్వాములు కాకుండా తల్లిదండ్రులు అప్రమత్తం చేయాల్సిన అవసరం ఉంది. పదే పదే తప్పుడు సోషల్​ మీడియా పోస్టులు పెడితే రౌడీషీట్, సస్పెక్ట్‌ షీట్, సైబర్‌ బుల్లీస్‌ షీట్​ను తెరుస్తారు. ఇవి ఒకసారి ఎవరిపైనైనా నమోదైతే ఉపసంహరించడం అంత సులువు కాదు.