Phone Tapping Case News Latest : ఫోన్‌ట్యాపింగ్ కేసులో స్పెషల్ ఇంటెలిజెన్స్ బ్రాంచ్ కేంద్రంగా కేవలం 15 రోజుల వ్యవధిలో 4 వేల 5 వందలకుపైగా ఫోన్లను ట్యాప్ చేసినట్లు వెల్లడైంది. ఈ కేసులో నాలుగో నిందితుడు మేకల తిరుపతన్న బెయిల్ పిటిషన్‌పై జరిగిన వాదనల సందర్భంగా పబ్లిక్ ప్రాసిక్యూటర్ ఈ విషయాన్ని హైకోర్టు దృష్టికి తీసుకెళ్లారు. నవంబరు 15 నుంచి 30వ తేదీల మధ్యనే అన్ని ఫోన్లను ట్యాప్ చేసినట్లు చెప్పారు. రేవంత్రెడ్డి సహా ఇతర నేతలు, వ్యాపారుల ఫోన్ ట్యాపింగ్కు సంబంధించి సుమారు 340జీబీ సమాచారాన్ని పోలీసులు వెలికితీసినట్లు తెలుస్తోంది. ఈ కేసులో హైదరాబాద్ పోలీసులు ఇప్పటికే అభియోగపత్రం నమోదు చేశారు.
మరికొన్ని రోజుల్లో అనుబంధ ఛార్జ్‌షీట్‌ దాఖలు చేయనున్నారు. ఇప్పటికే ఈ కేసులో ఆరోపణలు ఎదుర్కొంటున్న ఎస్ఐబీ మాజీ చీఫ్ ప్రభాకర్‌రావు, శ్రవణ్‌రావును విదేశాల నుంచి రప్పించే ప్రయత్నాలు ముమ్మరం చేశారు. వారిద్దరిపై రెడ్ కార్నర్ నోటీసుల జారీ కోసం సీబీఐ ద్వారా ఇంటర్‌పోల్‌కు నివేదిక పంపించారు. ఈ క్రమంలో రెడ్కార్నర్ నోటీసులు జారీ అయి నిందితులిద్దరినీ భారత్‌కు డిపోర్ట్‌ (బలవంతంగా స్వదేశానికి తిప్పిపంపడం) చేస్తారని పోలీసులు భావిస్తున్నారు. ఈ విధంగా నిందితులు దొరికితే వారిని సైతం విచారించి ఫోన్ ట్యాపింగ్ కేసులో ఎవరెవరి ప్రమేయం ఉందన్న సమాచారం తెలుస్తుందనే నమ్మకంతో ఉన్నారు. సమాచారం సేకరించిన వెంటనే దర్యాప్తు వివరాలతో అనుబంధ అభియోగపత్రం దాఖలు చేయాలని భావిస్తున్నారు.
ప్రభాకర్‌రావు, శ్రవణ్‌రావు చుట్టూ బిగుస్తున్న ఉచ్చు : ప్రభాకర్‌రావు ఆదేశాలతోనే తాము ఈ అక్రమానికి పాల్పడినట్లు నిందితులంతా పోలీసులకు దర్యాప్తులో వెల్లడించారు. దీంతో కేసు తదుపరి దర్యాప్తు అంతా ప్రభాకర్‌రావు, శ్రవణ్‌రావుల విచారణ పైనే కేంద్రీకృతమైంది. చివరిగా వారిని విచారిస్తేనే దర్యాప్తు ముందుకు సాగడంతోపాటు పొలిటికల్ సంబంధాలు వెలుగులోకి వచ్చే అవకాశం కనిపిస్తోంది. ఈ నేపథ్యంలో హైదరాబాద్ గత పోలీస్ కమిషనర్‌ కొత్తకోట శ్రీనివాసరెడ్డి కొద్దిరోజుల క్రితం దిల్లీకి వెళ్లి కేసు ప్రాధాన్యాన్ని సీబీఐ అధికారులకు వివరించారు. ఈ క్రమంలోనే తాజాగా రెడ్ కార్నర్ నోటీసుల జారీ కోసం సీబీఐ ద్వారా ఇంటర్‌పోల్‌కు నివేదిక పంపించారు.
ఎస్ఐబీ మాజీ చీఫ్పై త్వరలో రెడ్కార్నర్ నోటీస్ : హైదరాబాద్ సీపీ
