పాలమూరులో ట్రాఫిక్‌తో బేజారు - సమస్యలపై దృష్టి సారించాలని విజ్ఞప్తి - Traffic Problems in Mahabubnagar

Traffic Problems : వాహనాల సంఖ్య రోజురోజుకూ పెరగడంతో ప్రజలకు ట్రాఫిక్‌ ఇక్కట్లు తప్పడంలేదు. ఎక్కడపడితే అక్కడ యూటర్న్‌లు, వ్యతిరేకదిశలో వాహనాలు నడపడం, నిబంధనలకు పాటించకపోవడంతో ట్రాఫిక్‌ కష్టాలు తీవ్రమవుతున్నాయి. పాలమూరులో అయితే ట్రాఫిక్ సిగ్నలింగ్ వ్యవస్థ లేక సరైన సమయానికి గమ్యాన్ని చేరుకోలేకపోతున్నామంటూ ప్రజలు తీవ్ర ఇబ్బందులు పడుతున్నారు.

Traffic Problems in Telangana : మహబూబ్‌నగర్‌లో అప్పనపల్లి నుంచి బండమీదిపల్లి వరకూ కోదాడ-రాయచూరు జాతీయ రహదారి విస్తరించి ఉంది. ఈ దారిలో గడియారం కూడలి, మార్కెట్ రోడ్డు వద్ద నిత్యం వాహనాల రద్దీ ఎక్కువగా ఉంటుంది. ముఖ్యంగా ఉదయం ఉద్యోగాలకు వెళ్లే వేళ, సాయంత్రం జనం ఇంటికి తిరిగి వచ్చే సమయం, పాఠశాలలు, కళాశాలలు వదిలే వేళల్లో వాహనాలు కిక్కిరిసిపోతాయి. రద్దీ అధికంగా మారడంతో నిత్యం రాకపోకలకు అంతరాయం ఏర్పడుతోందని వాహనదారులు ఆవేదన వ్యక్తం చేస్తున్నారు.

కూడళ్లు వాహనాలతో నిండి రాకపోకలు ఆలస్యమవుతోందని, ట్రాఫిక్ నియంత్రించేందుకు ఎక్కడా సిగ్నల్స్ లేవని ఆందోళన చెందుతున్నారు. ట్రాఫిక్ పోలీసులు వాహనాలను నియంత్రిస్తున్నా, ఆ చర్యలు ఏ మాత్రం చాలడంలేదని వాహనదారులు వాపోతున్నారు. ట్రాఫిక్ అస్తవ్యస్తం కావడానికి సిగ్నల్స్ మాత్రమే కాదు, మరిన్ని కారణాలున్నాయి. మున్సిపాలిటీ ఆధ్వర్యంలో పేరుకు పార్కింగ్ స్థలాలు ఏర్పాటు చేసినా వాటిని ఎవరూ వినియోగించడం లేదు.

'ట్రాఫిక్​ వల్ల చాలా ఇబ్బందులు పడుతున్నాం. పిల్లలను స్కూల్​కు తీసుకెళ్లేటప్పుడు ఇబ్బందులకు గురవుతున్నాం. సిగ్నల్​ వ్యవస్థను ఏర్పాటు చేయాలి. ముఖ్యంగా వాహనాలు రోడ్లపై పార్కింగ్​ చేయడంతో ట్రాఫిక్​ జామ్​ అవుతుంది. అధికారులు దీనిపై దృష్టి సారించాలి'- స్థానికులు

దీంతో వాహనాల్ని రోడ్డుమీదే ఆపడంతో ట్రాఫిక్​కు ఇబ్బంది ఏర్పడుతోంది. నిబంధనలు పాటించకుండా దూరాన్ని తగ్గించుకునేందుకు చాలా మంది వ్యతిరేక దిశలో ప్రయాణిస్తున్నారు. గడియారం కూడలి, మార్కెట్ రోడ్డు లాంటి వ్యాపార కేంద్రాలకు వెళ్లేందుకు, వచ్చేందుకు ప్రత్యామ్నాయ మార్గాలు లేవని వాహనదారులు వాపోతున్నారు.

ఉన్నతాధికారులు ట్రాఫిక్ సమస్యలపై దృష్టి సారించాలని, సిగ్నల్ వ్యవస్థ ఏర్పాటు చేసేలా చర్యలు తీసుకోవాలని వాహనదారులు కోరుతున్నారు. మహబూబ్​నగర్ పట్టణంలో ట్రాఫిక్ కష్టాలు తీరాలంటే ముందు ట్రాఫిక్ సిగ్నల్ వ్యవస్థను అందుబాటులోకి తీసుకు రావాలి. సుమారు 2 కోట్లతో ట్రాఫిక్ సిగ్నల్ వ్యవస్థ ఏర్పాటుకు నిధులు మంజూరైనా, మున్సిపాలిటీ అనుమతుల కోసం పనులు ఆగినట్లు తెలుస్తోంది.

'ట్రాఫిక్​ ఫుల్​ ఉంది. గడియారం కూడలి, మార్కెట్​ వద్ద నిత్యం వాహనాల రద్దీ ఉంది. పెద్ద వాహనాలు కూడా అతివేగంతో వెళుతున్నాయి. సిగ్నల్స్​ ఉన్నాయి కానీ అవి పని చేయడంలేదు. ఉదయం సాయంత్రం ట్రాఫిక్​ ఇంకా ఎక్కువగా ఉంటుంది. ట్రాఫిక్​పై అధికారులు అవగాహన కార్యక్రమాలు కూడా చేయాలని అనుకుంటున్నా'- స్థానికులు