CBN TEAM OATH CEREMONY : ఆంధ్రప్రదేశ్ ముఖ్యమంత్రిగా నారా చంద్రబాబు నాయుడు ప్రమాణస్వీకారం చేశారు. గవర్నర్‌ అబ్దుల్ నజీర్ చంద్రబాబుతో ప్రమాణం చేయించారు. సీఎంగా చంద్రబాబు ప్రమాణం చేయడం ఇది నాలుగోసారి కాగా, వేదికపై ప్రధాని మోదీ ఆత్మీయ ఆలింగనం చేసుకుని అభినందించారు. అనంతరం మంత్రులుగా పవన్‌కల్యాణ్‌, నారా లోకేష్‌ ప్రమాణస్వీకారం చేశారు. కేసరపల్లిలో సీఎం చంద్రబాబు ప్రమాణస్వీకార కార్యక్రమం జాతీయ గీతాలాపనతో వైభవంగా ప్రారంభమైంది. ప్రధాని మోదీ, చంద్రబాబు నాయడు గన్నవరం విమానాశ్రయం నుంచి నేరుగా వేదికపైకి చేరుకున్నారు.
పవన్ కల్యాణ్, నారా లోకేశ్ ప్రమాణ స్వీకారం అనంతరం మంత్రిగా కింజరాపు అచ్చెన్నాయుడు 24 మంది ఎమ్మెల్యేలు మంత్రులుగా ప్రమాణ స్వీకారం చేశారు. వీరిలో పవన్ కల్యాణ్, నారా లోకేశ్, అచ్చెన్నాయుడు, కొల్లు రవీంద్ర, నాదెండ్ల మనోహర్‌, పి.నారాయణ, వంగలపూడి అనిత, సత్యకుమార్‌ యాదవ్‌, నిమ్మల రామానాయుడు, ఎన్‌ఎండీ ఫరూక్‌, ఆనం రామనారాయణరెడ్డి, పయ్యావుల కేశవ్‌, అనగాని సత్యప్రసాద్‌, కొలుసు పార్థసారథి, బాలవీరాంజనేయస్వామి, గొట్టిపాటి రవి, కందుల దుర్గేష్‌, గుమ్మడి సంధ్యారాణి, బి.సి.జనార్దన్‌రెడ్డి, టీ.జీ.భరత్‌, ఎస్‌.సవిత, వాసంశెట్టి సుభాష్‌, కొండపల్లి శ్రీనివాస్, రామ్‌ప్రసాద్‌రెడ్డి ప్రమాణ స్వీకారం చేశారు.
ప్రమాణ స్వీకారోత్సవం అనంతరం ప్రధాని మోదీ (Prime Minister Modi) ని చంద్రబాబు, పవన్‌కల్యాణ్‌ శాలువాతో సత్కరించారు. ఈ సందర్భంగా వేదికపై ఉన్న అందరినీ పేరుపేరునా ప్రధాని మోదీ పలకరించారు. ప్రధాని, గవర్నర్‌తో కలిసి నూతన మంత్రివర్గం గ్రూప్ ఫొటో తీయించుకున్నారు. ప్రధాని మోదీకి సీఎం చంద్రబాబు, పవన్‌కల్యాణ్‌ జ్ఞాపిక అందించారు. వేదికపై మెగాస్టార్ చిరంజీవి, పవన్‌తో కలిసి ప్రధాని మోదీ ప్రజలకు అభివాదం చేశారు.
ఏపీలో నూతన ప్రభుత్వ ఏర్పాటుపై ప్రధాని మోదీ ఎక్స్‌లో పోస్టు చేశారు. మంత్రుల ప్రమాణ స్వీకారోత్సవానికి హాజరయ్యానని పేర్కొన్నారు. సీఎంతో పాటు ప్రమాణం చేసిన మంత్రులందరికీ అభినందనలు తెలిపారు. టీడీపీ, జనసేన, బీజేపీ కూటమి ఏపీ కీర్తిని ఉన్నత శిఖరాలకు చేరుస్తుందని, రాష్ట్ర యువత ఆకాంక్షలు నెరవేర్చేందుకు కూటమి ప్రభుత్వం కట్టుబడి ఉందని ప్రధాని స్పష్టం చేశారు.
చంద్రబాబుకు పట్టాభిషేకం - ముఖ్యమంత్రిగా నాలుగోసారి ప్రమాణం - CHANDRABABU TOOK OATH AS AP CM
