Nagarjuna Sagar Main Left Canal Cut Off : ఖమ్మం జిల్లాలో నాగార్జున సాగర్ ప్రధాన ఎడమ కాలువకు భారీగా గండి పడింది. నడిగూడెం మండలం కాగిత రామచంద్రాపురం వద్ద కాలువకు గండి పడటంతో, పంట పొలాల్లోకి ఉద్ధృతంగా వరద నీరు చేరింది. అదేవిధంగా పరిసర గ్రామాల్లోకి భారీగా వరద ముంచెత్తింది. ఉద్ధృతి పెరగడంతో సమీప ఊళ్లు ఖాళీ చేసేందుకు ప్రజలు ప్రయత్నిస్తున్నారు. గండిపడటంతో హుటాహుటిన ఎడమ కాలువకు నీటి విడుదలను అధికారులు నిలిపివేశారు. ఈ గండితో ఖమ్మం - సూర్యాపేట జాతీయ రహదారిపై వాహనరాకపోకలకు అంతరాయం ఏర్పడింది.
నాగార్జున సాగర్కు ఇన్ ఫ్లో ఐదు లక్షల క్యూసెక్కులు వస్తుండగా ఔట్ ఫ్లో 4.70 లక్షల క్యూసెక్కులుగా ఉందని అధికారులు మంత్రి ఉత్తమ్ కుమార్ రెడ్డికి వివరించారు. ఈ మేరకు సాగర్ నుంచి పాలేరు రిజర్వాయర్కు నీటిని నిలిపి వేశారు. అయితే అప్పటికే వర్షపు నీటితో పాలేరు రిజర్వాయర్ నిండి పోవడంతో చేరిన బ్యాక్ వాటర్తో 133.06 కిలో మీటర్ల వద్ద గండి పడినట్లు అధికారులు మంత్రి ఉత్తమ్ దృష్టికి తీసుకొచ్చారు. ఇప్పటికే భారీ వర్షాలు, ఎగువ నుంచి వస్తున్న వరదతో పాలేరు నిండుకుండలా మారింది.
