Mothers Day Special Story 2024 : ఏ అమ్మకైనా బిడ్డను చూస్తే గర్వంగా అనిపిస్తుంది. నాకు నా పాపని చూస్తే, రెట్టింపు గర్వంగా ఉందని ఆ మాతృమూర్తి అంటోంది. ఎందుకంటే ఆ చిన్నారి తనకున్న సమస్యని జయించి క్రీడాకారిణిగా, చిత్రకారిణిగా ఎదిగింది మరి. ఈ క్రమంలో తన సాయం కొంతే అయితే మా అమ్మాయి పట్టుదలే ఎక్కువని చెబుతోంది అరుణ భాస్కర్. అలా కుమార్తెను ఛాంపియన్‌గా మార్చింది. మరి ఆ విజయగాథ గురించిన మరిన్ని విషయాలు మనమూ తెలుసుకుందామా?
అరుణ భాస్కర్‌ది గుంటూరు. ఆమెకు ఆటలంటే ఎంతో ఇష్టం. చదువుకుంటూనే వాలీబాల్‌, కబడ్డీల్లో రాష్ట్రస్థాయి పోటీలవరకూ వెళ్లారు. వివాహం కావడంతో ఆటలకు గుడ్‌బై చెప్పారు. అరుణ భర్త విజయ్‌భాస్కర్‌ డిఫెన్స్‌లో అకౌంటెంట్‌గా విధులు నిర్వహిస్తున్నారు. ఆయన ఉద్యోగరీత్యా పదేళ్లపాటు అండమాన్‌, షిల్లాంగ్‌ల్లో ఉన్నారు. మొదట వీరికి బాబు పుట్టాడు. పేరు విజయ్‌తేజ్‌. ఆ తర్వాత పాప. అమ్మాయి కడుపులో ఉన్నప్పుడే స్కానింగ్‌లో కాళ్లలో ఏదో ఒక వంకర ఉందని వైద్యులు గమనించారు.
ఆ చిన్నారికి బ్రిటెల్‌ బోన్‌ డిసీజ్‌ : దీంతో ఆర్థోపెడిక్‌ డాక్టర్‌ని దగ్గర పెట్టుకుని, అరుణ భాస్కర్‌కు సిజేరియన్‌ చేశారు. అంత జాగ్రత్త పడినా, బయటకు తీసేప్పుడు రెండు కాళ్లూ ఫ్రాక్చర్‌ అయ్యాయి. రెండు రోజులయ్యాక ఆ చిన్నారికి బ్రిటెల్‌ బోన్‌ డిసీజ్‌ ఉందని అసలు విషయం తెలిసింది. ఈ సమస్య ఉన్నవాళ్లకి, సుద్ద ఎలా విరుగుతుంది? అలా చిన్నపాటి గాయాలకే ఎముకలు విరిగిపోయి, పిండిలా అయిపోతాయి. దీంతో దంపతులిద్దరూ కుమిలిపోయారు.
Mother's Day Special 2023 : ఒంటి చేత్తో అన్నింటినీ చక్కబెట్టే అమ్మ.. ఒక యోధ
అరుణ భాస్కర్ పాలివ్వడం కోసం తన పాపను అటూ, ఇటూ మార్చినా చేయివిరిగేది. పాకుతూ పాకుతూ పడిపోయి కాళ్లూ, చేతులకు ఫ్రాక్చర్లు అయ్యేవి. శరీరాన్ని తడిమిచూస్తే ఎక్కడో వాపు కనిపించేది. అది ఫ్రాక్చర్‌ అన్నమాట. దానికి ఒక బట్టముక్క చుట్టేవాళ్లు. అంతకుమించి వైద్యం లేదా అంటే? ఏడాదిన్నర వయసులో ఒకసారి ప్రయత్నించారు. ఎముకల్లో పట్టులేదని సర్జరీ మధ్యలో ఆపేశారు. ఎంత జాగ్రత్తగా చూసుకున్నా నడుస్తూ నడుస్తూ పడిపోయేది. అలా 45 సార్లు ఫ్రాక్చర్లు అయ్యాయి.
పాప పట్ల అరుణ భాస్కర్ ఎంతో జాగ్రత్తగా ఉండేవారు. తనతో ప్రయాణాలు చాలా కష్టం. రైలు ఎక్కించడం, బెర్త్‌పై పడుకోబెట్టడంలోనూ తనకి గాయాలవుతాయి. అలాగని తను నిరాశలో ఉండిపోవడం ఆమెకిష్టం లేదు. అందుకే తనకిష్టమైన రంగంలో ప్రోత్సహించాలనుకున్నారు. వారి బాబుకి టెన్నిస్‌ అంటే ఇష్టం. తనకి నేర్పించే క్రమంలో దంపతులిద్దరూ కూడా టెన్నిస్‌ నేర్చుకున్నారు. అరుణ భర్త శాయ్‌ కోచ్‌గా శిక్షణ తీసుకున్నారు.
అతి చిన్నవయసులోనే ఛాంపియన్‌షిప్‌ : అరుణ భాస్కర్ రాష్ట్రస్థాయిలో ఆడేవారు. పాపను బడికి పంపించకుండా ఇంట్లోనే విద్యను భోదించేవారు. మొదట్లో తనూ టెన్నిస్‌ ఆడటం నేర్చుకుంది. ఆ తరవాత తేలిగ్గా ఉండే టేబుల్‌ టెన్నిస్‌వైపు మళ్లించారు. చక్రాల కుర్చీలో ఆడుతూనే, ఆటపై పట్టు సాధించింది. జాతీయ స్థాయిలో ఆడుతూ ఇందౌర్‌లో జరిగిన యూటీటీ పారా టేబుల్‌ టెన్నిస్‌ నేషనల్‌ ఛాంపియన్‌షిప్‌ని అతి చిన్నవయసులోనే గెలుచుకుంది.
యూటీటీ పారా టీటీ నేషనల్‌ ర్యాంకింగ్‌ టోర్నమెంట్‌లో డబుల్స్‌లోనూ ఆ అమ్మాయి పతకం సాధించింది. చిన్నప్పుడు అన్నయ్యతో పోల్చుకుని తనలా తాను ఆడుకోలేనా? అని బాధపడేది. అప్పుడు అరుణ భాస్కర్ చూడు మాకు కాళ్లూ చేతులూ బాగానే ఉన్నాయి. కానీ నీలా ఆడలేం. ఛాంపియన్లం కాదు. నువ్వు అలా కాదని తన పాపకు చేప్పేది. అలాగే బొమ్మలు వేస్తావ్‌, కథలు రాస్తావు. ఎవరి టాలెంట్‌వాళ్లది. నువ్వు మా కంటే గొప్ప అంటూ ఆ చిన్నారిని ప్రోత్సహించేంది. అలా ఆటపై దృష్టిపెట్టేట్టు చేసింది. తనని గొప్ప క్రీడాకారిణి చేయాలన్నది అరుణ భాస్కర్ కల. అందుకు తగిన ఆర్థిక సాయం కోసం ఆమె ఎదురు చూస్తున్నారు. ప్రభుత్వం, క్రీడాసంస్థలు, స్పాన్సర్లు ముందుకొస్తే తన కల, పాప కల సాకారం అవుతాయని అంటున్నారు అరుణ భాస్కర్.
'మదర్స్ డే'ను ఆదివారమే ఎందుకు చేసుకుంటారు? దీని వెనుక ఇంత కథ ఉందా? - world mothers day date 2024
