Minister Uttam Reaction On Union Budget 2024 : కేంద్రంలోని ఎన్డీఏ ప్రభుత్వం నిధుల కేటాయింపులో ప‌క్షపాత ధోర‌ణిని అవ‌లంభిస్తోంద‌ని నీటిపారుద‌ల శాఖ మంత్రి ఉత్తమ్ కుమార్ రెడ్డి ఆరోపించారు. కేంద్ర బ‌డ్జెట్‌పై ఉత్తమ కుమార్ రెడ్డి తీవ్రంగా స్పందించారు. తెలంగాణ, ఆంధ్రప్రదేశ్ రాష్ట్రాల‌కు రాష్ట్ర పునర్వ్యవస్థీకరణ చ‌ట్టంలో ఉన్న హామీలను తప్పనిసరిగా నెరవేర్చాల‌ని ఉత్తమ్ డిమాండ్ చేశారు. కేంద్ర బడ్జెట్లో తెలంగాణను బీజేపీ ప్రభుత్వం నిర్లక్ష్యం చేసిందని ఉత్తమ్ మండిపడ్డారు.
కేంద్ర బడ్జెట్లో రాష్ట్రాన్ని పూర్తిగా విస్మరించింద‌ని ఆందోళ‌న వ్యక్తం చేశారు. బడ్జెట్‌ను రాజకీయ ప్రేరేపితమైందిగా ఉత్తమ్ కుమార్ రెడ్డి అభివ‌ర్ణించారు. ప్రజల కోసం ప్రవేశ పెట్టిన బడ్జెట్ కాద‌ని ధ్వజ‌మెత్తారు. బీజేపీ మిత్ర ప‌క్షాలైన జేడీయూ, టీడీపీల‌ను ప్రసన్నం చేసుకోడానికి రూపొందించిన బడ్జెట్ అని విమర్శించారు. బిహార్‌కు రూ.41,000 కోట్లు, ఆంధ్రప్రదేశ్‌కు రూ.15,000 కోట్లు ఆర్థిక స‌హాయం ప్రక‌టించిన కేంద్రం పోలవరం ప్రాజెక్టు పూర్తికి నిధులు కేటాయించ‌నున్నట్లు వెల్లడించిందని పేర్కొన్నారు.
కేంద్ర బడ్జెట్లో రాష్ట్రానికి తీవ్ర అన్యాయం జరిగింది : కాంగ్రెస్ పాలిత రాష్ట్రాలు, ముఖ్యంగా తెలంగాణను పూర్తిగా నిర్లక్ష్యం చేశారని ఆరోపించారు. తెలంగాణ ఏర్పడిన తర్వాత 11వ బడ్జెట్ ప్రవేశ పెట్టిన కేంద్రం మొద‌టిసారి బడ్జెట్లో 'ఆంధ్రప్రదేశ్ పునర్వ్యవస్థీకరణ చట్టం' పేరుతో ప్రత్యేక అధ్యయాన్ని పొందుపరిచారని పేర్కొన్నారు. కానీ 58 పేజీలు, 14,692 పదాలున్న కేంద్ర ఆర్థిక మంత్రి నిర్మలా సీతారామన్ తన మొత్తం ప్రసంగంలో తెలంగాణ అనే పదాన్ని ప్రస్తావించలేద‌ని ఆందోళ‌న వ్యక్తం చేశారు.
ఆర్థిక మంత్రి నిర్మలా సీతారామన్ తన బడ్జెట్ ప్రసంగంలో ఆంధ్రప్రదేశ్ పునర్వ్యవస్థీకరణ చట్టం గురించి మాట్లాడినప్పుడు తెలంగాణ ప్రస్తావనను పూర్తిగా దాటవేయడాన్ని ఉత్తమ్ కుమార్ రెడ్డి ఖండించారు. ఆంధ్రప్రదేశ్‌కు కేంద్రం ప్రత్యేక నిధులు ఇవ్వడాన్ని తాము వ్యతిరేకించనప్పటికీ, తెలంగాణ పట్ల చూపుతున్న వివక్షతను తీవ్రంగా ఖండిస్తున్నట్లు తెలిపారు.
కాంగ్రెస్ పాలిత రాష్ట్రాలను పూర్తిగా నిర్లక్ష్యం చేశారు : సీఎం రేవంత్‌రెడ్డి నేతృత్వంలోని తెలంగాణ మంత్రుల బృందం గత ఏడు నెలలుగా అన్ని మంత్రిత్వ శాఖలకు నిధులు ఇవ్వాలని కోరుతూ పలుసార్లు విజ్ఞప్తి చేసినా ప్రయోజ‌నం లేద‌ని విమర్శించారు. పోలవరం ప్రాజెక్టుకు నిధులు ఇస్తామని హామీ ఇచ్చిన బీజేపీ ప్రభుత్వం, పాలమూరు రంగారెడ్డి లిఫ్ట్‌ ఇరిగేషన్‌ పథకానికి ఎలాంటి హామీ ఇవ్వలేద‌ని ఆరోపించారు.
పాలమూరు రంగారెడ్డి ప్రాజెక్టుకు అప్పటి కేంద్ర జలవనరుల శాఖ మంత్రి గజేంద్ర సింగ్‌ షెకావత్‌ ఇచ్చిన హామీ మేరకు కేంద్రంలోని బీజేపీ ప్రభుత్వం నిధులు మంజూరు చేస్తుందని ఆశిస్తున్నట్లు పేర్కొన్నారు. ఏపీ పునర్వ్యవస్థీకరణ చట్టంలోని హామీలను బీజేపీ ప్రభుత్వం నిలబెట్టుకుంటుందన్న ఆశతో తెలంగాణ ప్రజలు పదేళ్లుగా ఎదురుచూస్తున్నార‌న్నారు. కాజీపేట రైల్వే కోచ్‌ ఫ్యాక్టరీ, బయ్యారం స్టీల్‌ ఫ్యాక్టరీ, గిరిజన యూనివర్సిటీ త‌దిత‌ర అర్హమైన వాటికి నిధులు ఇవ్వలేద‌ని ఆందోళ‌న వ్యక్తం చేశారు.
Central Budget 2024 : రాయలసీమ, ప్రకాశం, ఉత్తర కోస్తాంధ్రలోని వెనుకబడిన ప్రాంతాలకు ఆర్థిక మంత్రి ఎంపిక చేసి గ్రాంట్లు మంజూరు చేశారని, తెలంగాణలోని వెనుకబడిన ప్రాంతాల ప్రస్తావనను దాట వేశార‌ని ఆరోపించారు. ఏపీ పునర్వ్యవస్థీకరణ చట్టంలోని హామీలను నెరవేరుస్తామని ఆర్థిక మంత్రి చేసిన ప్రకటనను స్వాగతిస్తున్నామని, తెలంగాణ, ఆంధ్రప్రదేశ్‌ల హామీలు నెరవేరుతాయని భావిస్తున్నట్లు తెలిపారు. ఇద్దరు కేంద్రమంత్రులు జీ కిషన్‌రెడ్డి, బండి సంజయ్‌ సహా ఎనిమిది మంది బీజేపీ ఎంపీలు కేంద్ర బడ్జెట్లో తెలంగాణకు తగిన వాటాను పొందలేక‌పోవ‌డం దుర‌దృష్టక‌ర‌మ‌న్నారు.
కేంద్ర బడ్జెట్లో తెలంగాణ ప్రస్తావన లేకపోవడం బాధాకరం : కేటీఆర్‌ - KTR On Central Budget Funds
