Minister uttam on Sitarama project Launch : సీతారామ ప్రాజెక్టు ప్రారంభోత్సవం స్వాతంత్ర దినోత్సవం రోజు జరగనుంది. ఈ నెల 15వ తేదీన ముఖ్యమంత్రి రేవంత్ రెడ్డి ప్రాజెక్టును జాతికి అంకితం చేయనున్నారు. ప్రాజెక్టులో భాగంగా నిర్మించిన రెండో పంప్ హౌస్ను సీఎం ప్రారంభం చేస్తారని నీటిపారుదల శాఖ మంత్రి ఉత్తమ్ కుమార్ రెడ్డి తెలిపారు. సీతారామ ప్రాజెక్టు ప్రారంభోత్సవ ఏర్పాట్లపై అధికారులు, ఇంజినీర్లతో మంత్రి హైదరాబాద్ జలసౌధలో సమీక్ష నిర్వహించారు. నీటిపారుదల శాఖ కార్యదర్శి రాహుల్ బొజ్జా, ప్రత్యేక కార్యదర్శి ప్రశాంత్ పాటిల్, ఈఎన్సీలు అనిల్ కుమార్, నాగేందర్ రావు, డిప్యూటీ ఈఎన్సీ శ్రీనివాస్ తదితరులు సమీక్షలో పాల్గొన్నారు.
సీతారామ ప్రాజెక్టు మొదటి పంప్ హౌస్లో వెట్ రన్, రెండో పంప్ హౌస్లో డ్రైరన్ ఇప్పటికే పూర్తయ్యాయి. దీంతో రెండో పంప్ హౌస్ వద్ద పంపులను ముఖ్యమంత్రి రేవంత్ రెడ్డి ప్రారంభిస్తారు. 15వ తేదీన హైదరాబాద్లో స్వాతంత్ర దినోత్సవ వేడుకల అనంతరం సీఎం హెలికాప్టర్లో బయల్దేరి ఖమ్మం జిల్లా వైరా వెళ్తారు. ప్రాజెక్టును ప్రారంభించి, అనంతరం అక్కడే ఏర్పాటు చేసిన బహిరంగ సభలో ముఖ్యమంత్రి రేవంత్ రెడ్డి పాల్గొంటారని మంత్రి ఉత్తమ్ చెప్పారు. సీఎం కార్యక్రమ పర్యవేక్షణ కోసం నోడల్ అధికారిని నియమించనున్నట్లు తెలిపారు.
ప్రారంభోత్సవం నేపథ్యంలో ఈ నెల 11వ తేదీన సీతారామ ప్రాజెక్ట్ ట్రయిల్ రన్ నిర్వహించనున్నారు. ట్రయల్ రన్ కార్యక్రమానికి మంత్రి ఉత్తమ్ కుమార్ రెడ్డి హాజరవుతారు. ప్రాజెక్టులోని రెండో పంప్ హౌస్ వద్ద ట్రయిల్ రన్ నిర్వహిస్తారు. అనంతరం మూడో పంప్ ట్రయల్ రన్ పూర్తి చేసుకొని వైరాలో ముఖ్యమంత్రి పాల్గొనే బహిరంగ సభాస్థలిని మంత్రి ఉత్తమ్ పరిశీలిస్తారు. ఆ తర్వాత నల్గొండ జిల్లా మిర్యాలగూడ నియోజకవర్గ పరిధిలోని దున్నపోతుల గండి వద్ద నిర్మించ తలపెట్టిన ఎత్తిపోతల పథకం స్థలాన్ని ఆయన పరిశీలిస్తారు. స్థల పరిశీలన అనంతరం మిర్యాలగూడలో నీటిపారుదల శాఖ సమీక్షా సమావేశంలో మంత్రి ఉత్తమ్ కుమార్ రెడ్డి పాల్గొంటారు.
ఏటా ఆరున్నర లక్షల ఎకరాలకు కొత్త ఆయకట్టు సృష్టిస్తాం : ఉత్తమ్ - Uttam Released Sagar Water
