బ్యాంకులకే బురిడి - నకిలీ బంగారంతో రూ.కోట్లల్లో రుణాలు

నకిలీ బంగారం తాకట్టు పెట్టి రుణాలు - రూ.కోట్లు దోచుకున్న నిందితులు - పరిశీలనలో పడ్డ బ్యాంకులు

Gold Loan Frauds in Khammam : నకిలీ బంగారం తాకట్టుపెట్టి ఓ ముఠా కోట్లు కొట్టేసిన వైనమిది. ఖమ్మం జిల్లాలోని పది రకాల బ్యాంకులకు చెందిన శాఖలను మోసగించినట్లు సమాచారం. వీటిలో ప్రముఖ బ్యాంకులు ఉన్నట్లు తెలుస్తోంది. ఈ ఘటనపై ఆయా బ్యాంకుల ఉన్నతాధికారులు ఒక్కసారిగా ఉలిక్కిపడ్డారు. ప్రస్తుతం వారి బ్యాంకుల ఆధీనంలో ఉన్న ఆభరణాలను పరిశీలించే పనిలోపడ్డారు.

ఖమ్మంలోని కొన్ని గ్రామాలకు చెందిన వ్యక్తులు పథకం ప్రకారం బ్యాంకులను మోసగించినట్లు తెలిసింది. బంగారంలా కనిపించే రోల్డ్‌గోల్డ్‌ బ్రేస్‌లెట్లు తాకట్టుపెట్టి డబ్బులు తీసుకున్నట్లు సమాచారం. ఈ ముఠాకు చెందిన వ్యక్తుల ఆధార్‌, పాన్‌కార్డులను పరిశీలించినప్పుడు వెలుగులోకి వచ్చిన వివరాలతో బ్యాంకర్లు షాక్‌ అవుతున్నారు. ఇంత పెద్దమొత్తంలో ఎలా మోసం చేశారనే విషయంపై ఆరా తీస్తున్నారు. ఒక్కో బ్యాంకు శాఖలో నకిలీ బంగారు తాకట్టుపెట్టి రూ. 1-1.20 లక్షల వరకు రుణాలు తీసుకున్నట్లు అంచనా వేస్తున్నారు.

పరిశీలించిన తర్వాత కూడా మోసం : బ్యాంకులో ఏదైనా ఆభరణం తాకట్టుపెట్టినప్పుడు దాన్ని అప్రైజర్‌ పరిశీలించి బంగారం అని నిర్ధారించినప్పుడే మేనేజర్‌ లోన్‌ మంజూరు చేయాల్సి ఉంటుంది. స్థానిక అప్రైజర్లు, బ్యాంకు అధికారుల హస్తం ఇందులో ఏమైనా ఉన్నాయా అనే కోణంలోనూ ఉన్నతాధికారులు ఆరా తీస్తున్నారు. ఇతర అప్రైజర్లతో తాకట్టు పెట్టిన బంగారు ఆభరణాలను పరిశీలింపజేస్తున్నారు. చాలా బ్యాంకుల్లో బ్రేస్‌లెట్లపై బంగారం పూత లేకపోవడంతో భావించి బ్యాంకర్లు ఆందోళన చెందుతున్నారు. దీంతో ప్రైవేటు ఫైనాన్స్‌ బ్యాంకులు సైతం తమ శాఖల్లో అంతర్గత తనిఖీలు చేపట్టాయి.

పలు బ్యాంకులు సమాచారం తెలియనివ్వకుండా : తొలుత నకిలీ బంగారం తాకట్టు రుణాల విషయం ఓ బ్యాంకు అధికారి ద్వారా ఇతరులకు తెలిసింది. సంబంధిత బ్యాంకు ఉన్నతాధికారులు ఖమ్మం నగరంలోని ప్రతి బ్రాంచిలోనూ నకిలీ బంగారం తాకట్టు రుణాల గురించి ఆరా తీశారు. ఇప్పటికే కొన్ని బ్యాంకులు ఈ విషయంపై పోలీసులకు ఫిర్యాదు చేసినట్లు సమాచారం. ముఠాతో మొత్తం పది మంది వ్యక్తులు ఉన్నట్లు ప్రచారం జరుతుండగా, మోసపోయిన విషయం బయటకు పొక్కకుండా పలు బ్యాంకుల ముఖ్యాధికారులు జాగ్రత్తలు తీసుకుంటున్నారు. కొంతమంది అప్రైజర్లు అక్రమాలకు పాల్పడ్డామని ఒప్పుకున్నట్లు సమాచారం. వారి నుంచి సొత్తును రికవరీ చేసేందుకు అధికారులు యత్నిస్తున్నారు.

ఖమ్మం నగరంలోని రోటరీనగర్, గట్టయ్యసెంటర్, అంబేడ్కర్‌ మార్గ్, ఎన్‌ఎస్‌టీ రోడ్డు డీసీసీబీ బ్రాంచీల్లో ఇలాంటి మోసాలు జరిగినట్లు తమకు ప్రాథమిక సమాచారమందిందని డీసీసీబీ సీఈవో వసంతరావు తెలిపారు. ఈ నాలుగు శాఖల్లో 24 ఆభరణాలను తాకట్టుపెట్టి రూ.28లక్షల రుణాలు తీసుకున్నారని చెప్పారు. వీటితో పాటు ఇతర శాఖల్లోనూ ఇలాంటి ఘటనలపై విచారణ జరిపేందుకు రెండు బృందాలను నియమించామని వివరించారు.