కొనసాగుతున్న మహబూబ్‌నగర్‌ ఎమ్మెల్సీ ఎన్నిక ఓట్ల లెక్కింపు - సాయంత్రం తేలనున్న అభ్యర్థుల భవితవ్యం - Mahabubnagar MLC Vote Counting

Mahabubnagar MLC Vote Counting : మహబూబ్‌నగర్‌ స్థానిక సంస్థల ఎమ్మెల్సీ ఉపఎన్నిక ఓట్ల లెక్కింపు కొనసాగుతోంది. లోక్‌సభ ఎన్నికల ఫలితాలకు ముందు ప్రకటించే ఫలితం కావడంతో సర్వత్రా ఆసక్తి నెలకొంది. ఈ స్థానం నుంచి ఎమ్మెల్సీగా పనిచేసిన కసిరెడ్డి నారాయణరెడ్డి రాజీనామా చేయడంతో ఉపఎన్నిక అనివార్యమైంది. కాంగ్రెస్‌ నుంచి మన్నె జీవన్‌రెడ్డి, బీఆర్ఎస్ నుంచి నవీన్‌ కుమార్‌ రెడ్డి, స్వతంత్ర అభ్యర్థిగా సుదర్శన్‌ గౌడ్‌ పోటీ పడ్డారు. వీరిలో ఎవరి భవితవ్యం ఏమిటో ఈరోజు సాయంత్రం తేలనుంది.

Mahabubnagar MLC Vote Counting 2024 : మహబూబ్‌నగర్‌ స్థానిక సంస్థల శాసనమండలి నియోజకవర్గం ఉపఎన్నిక ఫలితం నేడు తేలనుంది. జిల్లా కేంద్రంలోని బాలుర జూనియర్‌ కళాశాలలో ఓట్ల లెక్కింపు కొనసాగుతుంది. ఈ ఎమ్మెల్సీ స్థానానికి మార్చి 28న ఉపఎన్నిక జరిగింది. కాంగ్రెస్‌ నుంచి మన్నె జీవన్‌రెడ్డి, బీఆర్ఎస్ నుంచి నవీన్‌ కుమార్‌ రెడ్డి, స్వతంత్ర అభ్యర్థిగా సుదర్శన్‌ గౌడ్‌ పోటీలో నిలిచారు.

Mahabubnagar MLC Results Today : ఈ ఉపఎన్నికలో పోటీకి బీజేపీ దూరంగా ఉంది. నియోజకవర్గం పరిధిలో మొత్తం 1,439 మంది ఓటర్లుండగా 1,437 మంది ఓటింగ్‌లో పాల్గొన్నారు. 14 అసెంబ్లీ నియోజకవర్గాల పరిథిలోని ఇద్దరు ఎంపీటీసీలు మినహా ఎమ్మెల్యేలు, ఎమ్మెల్సీలు, ఎంపీలు, జెట్పీటీసీలు, కౌన్సిలర్లు, ఎంపీటీసీలు తమ ఓటు హక్కును వినియోగించుకున్నారు. సార్వత్రిక ఎన్నికల కోడ్‌ అమలులో ఉండటంతో కౌంటింగ్‌ను ఈసీ ఇవాళ్టికి వాయిదా వేసింది.

ఉపఎన్నిక లెక్కింపు : కౌంటింగ్ కోసం 5 టేబుళ్లు ఏర్పాటు చేశారు. ముందుగా 10 పోలింగ్ కేంద్రాలకు సంబంధించిన బ్యాలెట్లను రెండు రౌండ్లలో లెక్కిస్తారు. ఆ తర్వాత చెల్లుబాటు కాని ఓట్లను వేరుచేస్తారు. చెల్లుబాటయ్యే ఓట్ల ఆధారంగా కోటా నిర్ణయిస్తారు. అనంతరం మొదేటి ప్రాధాన్యత ఓట్లను లెక్కిస్తారు. ఏ అభ్యర్ధికైనా మొదటి ప్రాధాన్యత ఓటులో కోటా కన్నా ఒక్క ఓటు అధికంగా వచ్చినా వారినే విజేతగా నిర్ణయిస్తారు. ఏ అభ్యర్థికీ కోటాకు కావలసిన ఓట్లు రానట్లయితే ఎలిమినేషన్ ప్రక్రియ చేపట్టి తదుపరి ప్రాధాన్యత క్రమం ఆధారంగా ఓట్ల లెక్కింపు జరుపుతారు. ఏ అభ్యర్థికీ కోటా రానట్లయితే చివరికి మిగిలిన అభ్యర్థి గెలుపొందినట్లుగా ప్రకటిస్తారు.

ఓట్ల లెక్కింపునకు పోలీసుల భారీ బందోబస్తు : మహబూబ్‌నగర్‌ స్థానిక సంస్థల ఎమ్మెల్సీ ఉపఎన్నిక ఓట్ల లెక్కింపు జరుగుతుంది. దీంతో పోలీసు శాఖ భారీ బందోబస్తు చేపట్టింది. ఓట్ల లెక్కింపు ప్రక్రియ ముగిసే వరకు అవాంఛనీయ ఘటనలు జరగకుండా ఎస్పీ పర్యవేక్షణలో పోలీసులు అన్ని జాగ్రత్తలు తీసుకున్నారు. 275 మంది సిబ్బందితో ఓట్ల లెక్కింపు కేంద్రంలో, పరిసరాల్లో, ప్రభుత్వ బాలుర జూనియర్‌ కళాశాల పరిసరాల్లో మూడంచెల భద్రత ఏర్పాటు చేశారు.

కాంగ్రెస్‌ పార్టీ అధికారంలోకి వచ్చిన తర్వాత జరిగిన మొదటి ఎన్నిక, సీఎం రేవంత్‌రెడ్డి ప్రాతినిధ్యం వహిస్తున్న జిల్లా కావడంతో ఫలితంపై రాష్ట్రవ్యాప్తంగా ఆసక్తి నెలకొంది. ఎలాగైనా సిట్టింగ్‌ స్థానాన్ని కాపాడుకోవాలని బీఆర్ఎస్, ఆ స్థానాన్ని చేజిక్కించుకోనాలని అధికార కాంగ్రెస్‌ గట్టిగా ప్రయత్నం చేశాయి. ఇటీవల ఉమ్మడి జిల్లాలో జరిగిన రాజకీయ హత్యలు, దాడులు కలకలం రేపుతున్నాయి. ఈ నేపథ్యంలో పోలీసు ఉన్నతాధికారులు ముందస్తుగానే కట్టుదిట్టమైన భద్రత ఏర్పాట్లకు సిద్ధమయ్యారు.