MAA Association Warning to YouTubers and Trollers : ఇన్ఫ్ల్యూయెనర్స్, మీమర్స్, యూట్యూబర్స్కు ఇది చేదువార్త. ఇకపై నటీనటుల వ్యక్తిగత జీవితాల పట్ల తప్పుగా వీడియోలు ట్రోల్స్ చేస్తే కటకటాలు లెక్కపెట్టాల్సిందే. ఆ దిశగా కఠిన చర్యలు తీసుకునేందుకు తెలుగు మూవీ ఆర్టిస్ట్ అసోసియేషన్ సిద్ధమైంది. ఇప్పటికే 25 యూట్యూబ్ ఛానల్స్ను పూర్తిగా టెర్మినేట్ చేయించిన మా అసోసియేషన్, మరో 200కు పైగా ఛానల్స్ను గుర్తించినట్లు వెల్లడించింది. ఈ మేరకు ఆయా యూట్యూబర్స్, ట్రోలర్స్పై మా అసోసియేషన్ తెలంగాణ డీజీపీకి ఫిర్యాదు చేసింది. మా సభ్యులు, సీనియర్ నటులు శివకృష్ణ, రాజీవ్ కనకాల, శివబాలాజీ లక్డీకాపూల్లోని డీజీపీ కార్యాలయంలో డీజీపీ జితేందర్ను కలిసి ఫిర్యాదు చేశారు.
ఇటీవల హనుమంతు సంఘటనను ఉదాహరిస్తూ సినీ పరిశ్రమ నటీనటులపై, వారి కుటుంబ సభ్యులపై అనుచితంగా ప్రవర్తిస్తున్న వారిపై చర్యలు తీసుకోవాలని డీజీపీని వారు కోరారు. అలాగే మా అసోసియేషన్లోని సోషల్ మీడియా విభాగం గుర్తించిన 200కు పైగా యూట్యూబ్ ఛానల్స్ వివరాలను డీజీపీకి అందజేశారు. అనంతరం మా అసోసియేషన్ ట్రెజరర్ శివబాలాజీ మాట్లాడుతూ అనుచిత వ్యాఖ్యలు చేసే యూట్యూబర్స్, ట్రోలర్స్పై కఠినంగా వ్యవహరిస్తామని తెలిపారు.
"కొందరు యూట్యూబర్స్ వల్ల ఏది తప్పు? ఏది కరెక్ట్ అనేది తెలియకుండా పోతుంది. ఈ విషయాన్ని చాలా సీరియస్గా తీసుకున్నాం. ఇటీవల మా అసోసియేషన్ తరఫున అధ్యక్షుడు మంచు విష్ణు కూడా ట్వీట్ చేశారు. ఇప్పుడు చాలా మంది ఛానల్స్ను డౌన్ చేస్తున్నాం. 200 ట్రోలింగ్ ఛానల్స్ లిస్టును డీజీపీకి పంపించాం. సైబర్ క్రైంలో మేము కూడా ఒక వింగ్గా ఉండనున్నాం. వారితో కలిసి పని చేయనున్నాం. ఇప్పటివరకు 25 యూట్యూబ్ ఛానల్స్ను టెర్మినేట్ చేశాం." - శివబాలాజీ, మా అసోసియేషన్ ట్రెజరర్
ట్రోలర్స్ను ఉపేక్షించేది లేదు : ఇప్పటికే మా అధ్యక్షుడు మంచు విష్ణు ఈ విషయంపై యూట్యూబర్స్ను హెచ్చరించినా పెడచెవిన పెట్టడంతో మా కఠిన చర్యలు తీసుకుంటోంది. అందులో భాగంగా ట్రోలర్స్ను ఉపేక్షించేదే లేదని స్పష్టం చేసింది. ముఖ్యంగా నటీమణుల విషయంలో అసభ్యకరంగా వ్యవహరిస్తున్న ట్రోలర్స్తో పాటు సినిమా ప్రాజెక్టులను దిగజార్చేలా వ్యాఖ్యానిస్తున్న వారిపై కూడా చర్యలు తప్పవని సూచించింది. ఇందుకోసం ప్రత్యేకంగా సైబర్ క్రైం పోలీసులతో కలిసి త్వరలోనే కో ఆర్డినేషన్ కమిటీని ఏర్పాటు చేయబోతుంది.
కొంతమంది యూట్యూబర్స్ తీరుపై సీనియర్ నటులు శివకృష్ణ, రాజీవ్ కనకాల అసహనం వ్యక్తం చేశారు. సినిమా వాళ్లను ట్రోలింగ్ చేస్తూ పైశాచికత్వానికి పాల్పడుతున్నారని మండిపడ్డారు. ట్రోల్స్, మీమ్స్ శ్రుతిమించిపోయాయని, అది సినీ పరిశ్రమకు, ప్రజలకు మంచిది కాదని రాజీవ్ కనకాల హితవు పలికారు. నెగిటివ్ ట్రోల్స్ మానేయాలని విజ్ఞప్తి చేశారు. నటీనటుల కోసమే కాకుండా సమాజ శ్రేయస్సు కోసం ఇకపై కఠినంగా వ్యవహరించనున్నట్లు తెలిపారు.
ఆ ఐదు యూట్యూబ్ ఛానళ్లు రద్దు చేసిన 'మా' - అవేంటో తెలుసా? - Five YouTube Channels Terminated
