KTR Tweet on Warangal MGMH Issue : వరంగల్ ఆస్పత్రిలో మంగళవారం రాత్రి విద్యుత్ సరఫరాకు అంతరాయం కలిగి రోగులు ఆరు బయటే చికిత్స పొందడంపై బీఆర్ఎస్ కార్యనిర్వాహక అధ్యక్షుడు కేటీఆర్ స్పందించారు. ఆస్పత్రిలో రోగుల దీనావస్థను ఈనాడు పత్రికలో ప్రచురితమైన కథనం ద్వారా ఆయన తెలుసుకున్నారు. ఈ క్రమంలో ఆ పేపర్ కట్ను ఎక్స్ వేదికగా పోస్టు చేసి ఈ ఘటనపై ప్రభుత్వాన్ని ప్రశ్నించారు.
KTR Reaction on Warangal Power Cut Issue : వరంగల్ ఎంజీఎం ఆస్పత్రిలో సుమారు 5 గంటల పాటు విద్యుత్ సరఫరాకు అంతరాయం కలిగిందని కేటీఆర్ తెలిపారు. అనారోగ్యంతో చికిత్స పొందుతున్న చిన్నారులు, వృద్దులు తీవ్ర ఇబ్బందులు ఎదుర్కొవడం బాధాకరమని ఆవేదన వ్యక్తం చేశారు. రాష్ట్రంలో ఉన్న ఆస్పత్రులను కూడా కాంగ్రెస్ ప్రభుత్వం సరిగ్గా నిర్వహించలేకపోతోందని మండిపడ్డారు. కరెంట్ కోతలు లేవని పదే పదే చెబుతున్న కాంగ్రెస్ నాయకులు ఈ ఘటనకు ఎవరు బాధ్యత వహిస్తారో చెప్పాలని నిలదీశారు. ఆస్పత్రిలో మంగళవారం రాత్రి చీకటిలో చికిత్స పొందుతున్న మహిళ ఫొటోను షేర్ చేశారు.
అసలు ఏమి జరిగిందంటే : ఉత్తర తెలంగాణకు పెద్ద దిక్కైన వరంగల్ ఎంజీఎం ఆసుపత్రిలో మంగళవారం సాయంత్రం సుమారు అయిదు గంటలపాటు విద్యుత్తు సరఫరాలో అంతరాయం కలిగింది. ఆసుపత్రిలోని అత్యవసర వైద్యవిభాగం ఏఎంసీ, ఆర్‌ఐసీయూ, నవజాత శిశువుల వార్డుల్లో వెంటిలేటర్లపై చికిత్స పొందుతున్న రోగులు, చిన్నారులు ఊపిరాడక తీవ్ర ఇబ్బంది పడ్డారు. ఆసుపత్రిలో నాలుగు జనరేటర్లు ఉండగా అందులో ఒకటి మాత్రమే పనిచేస్తోంది. దీనివల్ల విద్యుత్ ఆగిపోతే ఒక్క జనరేటర్తో ఆస్పత్రి మొత్తానికి కరెంట్ సరఫరా సాధ్యం కాదు. విద్యుత్ ఆగిపోవడంతో వెనువెంటనే ఒక్క జనరేటర్కు మరమ్మతు చేశారు. దీంతో ఐసీయూ రోగులకు ప్రాణాపాయం తప్పింది.
విద్యుత్ సరఫరా ఎందుకు ఆగిపోయిందని కారణాలు వెతకగా ఆసుపత్రిలోని నర్సింగ్ స్కూల్ వసతి గృహం వెనక ఉన్న విద్యుత్ స్తంభంపై తీగలకు గాలిపటం దారం తగలడంతో అంతరాయం కలిగిందని అధికారులు భావించారు. దానికి మరమ్మతులు చేసినా విద్యుత్ సరఫరా అవ్వలేదు. తర్వాత సబ్స్టేషన్ నుంచి ఆసుపత్రిలో వచ్చే విద్యుత్ దగ్గరే లోపం ఉందని గుర్తించి మరమ్మతు చేశారు. చివరికి విద్యుత్ వచ్చింది. సుమారు సాయంత్రం 4.30 గంటలకు పోయిన కరెంట్ రాత్రి 9.30 గంటలకు పునరుద్ధరించారు.
కాంగ్రెస్ అరచేతిలో వైకుంఠం చూపించి అధికారంలోకి వచ్చింది : కేటీఆర్ - MLC Election KTR Campaign
