'తెలంగాణ తల్లి విగ్రహం ప్రతిపాదించిన చోట రాజీవ్​గాంధీ విగ్రహం - కాంగ్రెస్ ప్రభుత్వం కుసంస్కారంతో వ్యవహరిస్తోంది' - KTR Fires On Rajiv Gandhi Statue

KTR Fires On Rajiv Gandhi Statue : సచివాలయం ముందు తెలంగాణ తల్లి విగ్రహం ప్రతిపాదించిన చోట రాజీవ్ గాంధీ విగ్రహాన్ని ఏర్పాటు చేస్తున్నారని బీఆర్ఎస్ కార్యనిర్వాహక అధ్యక్షుడు కేటీఆర్ ఆగ్రహం వ్యక్తం చేశారు. బీఆర్ఎస్ అధికారంలోకి వచ్చిన వెంటనే, ఆ స్థానంలో తెలంగాణ తల్లి విగ్రహాన్ని ప్రతిష్టిస్తామని తెలిపారు.

KTR Fires On Rajiv Gandhi Statue : సచివాలయం ముందు తెలంగాణ తల్లి విగ్రహం ప్రతిపాదించిన చోట రాజీవ్ గాంధీ విగ్రహాన్ని ఏర్పాటు చేయాలన్న ప్రభుత్వ నిర్ణయాన్ని బీఆర్ఎస్ కార్యనిర్వాహక అధ్యక్షుడు కేటీఆర్ తప్పుబట్టారు. బీఆర్ఎస్ అధికారంలోకి వచ్చిన వెంటనే ఆ స్థానంలో తెలంగాణ తల్లి విగ్రహాన్ని ప్రతిష్టిస్తామని తెలిపారు. తెలంగాణ పౌరుషం, వైభవాన్ని చాటేలా అద్భుతంగా నిర్మించిన సచివాలయం సమీపంలో అతిపెద్ద అంబేడ్కర్ విగ్రహాన్ని ఏర్పాటు చేశామని, పాలకులకు అమరవీరుల త్యాగాలను, స్ఫూర్తిని జ్వలింపజేస్తూ అమరజ్యోతి స్మారకాన్ని నిర్మించినట్లు వివరించారు.

తెలంగాణ అస్తిత్వం, ఆత్మ గౌరవానికి ప్రతీకైన తెలంగాణ తల్లిని ఆ మధ్యలో ప్రతిష్టించాలన్న ఉద్దేశంతో ఒక ఐలాండ్​ను అభివృద్ధి చేసినట్లు పేర్కొన్నారు. తెలంగాణ తల్లికి కేటాయించిన స్థలంలో కాంగ్రెస్ పార్టీ రాజీవ్ గాంధీ విగ్రహాన్ని పెడుతోందని మండిపడ్డారు. వందలాది మంది తెలంగాణ ప్రజల ప్రాణాలు తీసిన కాంగ్రెస్ పార్టీ, మరోసారి తెలంగాణ ఆత్మ గౌరవాన్ని దెబ్బతీసేలా తెలంగాణ తల్లి విగ్రహాన్ని పక్కకు పెట్టి, రాహుల్ గాంధీ విగ్రహాన్ని పెడుతోందని మండిపడ్డారు.

ముఖ్యమంత్రి రేవంత్ రెడ్డి జై తెలంగాణ అనరని, అతి పెద్ద అంబేడ్కర్​కు కనీసం పూలదండ వేయరని, అమరజ్యోతిలోకి ఇప్పటి వరకు సందర్శకులను అనుమతించ లేదని ఆక్షేపించారు. తెలంగాణ బిడ్డ అంజయ్యను అవమానించిన రాజీవ్ గాంధీ విగ్రహం పెడుతున్నారని, ఆయనకు తెలంగాణతో ఏం సంబంధమని కేటీఆర్ ప్రశ్నించారు. గత పదేళ్లలో తాము ఏనాడూ పేర్ల మార్పుపై ఆలోచించలేదన్న ఆయన, కాంగ్రెస్ పార్టీ పెడుతున్న రాజీవ్ గాంధీ విగ్రహాన్ని అధికారంలోకి రాగానే అక్కడి నుంచి తరలిస్తామని చెప్పారు.

రాహుల్ గాంధీ దగ్గర మార్కులు కొట్టేయాలనుకుంటే గాంధీ భవన్​లో లేదా రేవంత్ రెడ్డి ఇంట్లో రాజీవ్ గాంధీ విగ్రహం పెట్టుకోవాలని సూచించారు. నాలుగేళ్లలో తెలంగాణలో కేసీఆర్ నాయకత్వంలో బీఆర్ఎస్ ప్రభుత్వం వస్తుందని, రాజీవ్ గాంధీ విగ్రహాన్ని సకల మర్యాదలతో తొలగించి, కాంగ్రెస్ పార్టీ కోరుకున్న చోటికి పంపిస్తామని అన్నారు. ఇవాళ తెలంగాణ తల్లికి కాంగ్రెస్ పార్టీ చేసిన అవమానాన్ని మరచిపోలేమని వ్యాఖ్యానించారు. ఇతర రాష్ట్రాల్లో ఉన్నట్లుగానే తెలంగాణ మహనీయుడి పేరును అంతర్జాతీయ విమానాశ్రయానికి పెడతామని కేటీఆర్ చెప్పారు. తెలంగాణ ఆత్మగౌరవం, అమరవీరుల త్యాగాలను అవమానపరిచేలా రాజీవ్ గాంధీ విగ్రహం పెడుతున్న కాంగ్రెస్ పార్టీ తీరు మార్చుకోవాలని డిమాండ్ చేశారు.

"తెలంగాణ తల్లి విగ్రహానికి అవమానం జరిగితే ఊరుకోం. సచివాలయంలో రాజీవ్‌ గాంధీ విగ్రహం ఏర్పాటు చేయొద్దు. రాజీవ్‌ విగ్రహం ఏర్పాటు చేస్తే, అధికారంలోకి వచ్చాక తొలగిస్తాం. శంషాబాద్‌ విమానాశ్రయానికి కూడా రాజీవ్‌ పేరు తొలగిస్తాం."- కేటీఆర్, బీఆర్ఎస్ కార్యనిర్వాహక అద్యక్షుడు