May Day Celebrations in Telangana 2024 : రాష్ట్రవ్యాప్తంగా అంతర్జాతీయ కార్మిక దినోత్సవ వేడుకలను ఘనంగా నిర్వహించారు. ఊరూవాడా జెండాలను ఆవిష్కరించి, శ్రమజీవుల కృషిని గుర్తు చేసుకున్నారు. కార్మికుల హక్కులను సాధించే దిశగా సంఘటితం కావాలని పలువురు నేతలు పిలుపునిచ్చారు. ఈ సందర్భంగా కార్మికులందరికీ ముఖ్యమంత్రి రేవంత్‌రెడ్డి మే డే శుభాకాంక్షలు తెలిపారు. ప్రజాపాలనలో అంతర్జాతీయ కార్మిక దినోత్సవ స్ఫూర్తి అన్ని రంగాలకు విస్తరిస్తోందని, కార్మికులకు సముచిత గౌరవం లభిస్తోందని చెప్పారు.
CM Revanth wishes on May Day 2024 : రాష్ట్ర పునర్నిర్మాణానికి అలుపెరగకుండా శ్రమిస్తున్న కార్మికులందరికీ రేవంత్‌రెడ్డి శుభాకాంక్షలు తెలిపారు. శ్రామికులే అభివృద్ధిలో అసలైన భాగస్వాములని పేర్కొన్నారు. తెలంగాణ సర్కార్ అమలు చేసే నూతన పారిశ్రామిక విధానం వారి అభ్యున్నతికి తప్పకుండా దోహదపడుతుందని చెప్పారు. కార్మికుల శ్రేయస్సు, సంక్షేమానికి అత్యంత ప్రాధాన్యమిస్తున్నట్లు రేవంత్‌రెడ్డి స్పష్టం చేశారు.
కార్మికుల శ్రమ వల్లే సమస్త సంపదలు : శ్రామికుల విజయస్ఫూర్తిని చాటేరోజు మే డే అని బీఆర్ఎస్ అధ్యక్షుడు కేసీఆర్ అన్నారు. ఈ సందర్భంగా ఆయన ఎక్స్‌ వేదికగా తెలంగాణ కార్మిక లోకానికి శుభాకాంక్షలు తెలిపారు. కార్మికుల శ్రమ వల్లే సమస్త సంపదలు సమకూరుతాయని అన్నారు. వారికి శుభం చేకూరాలని మనసారా ఆకాంక్షిస్తున్నట్లు కేసీఆర్ వెల్లడించారు.
ఖమ్మం వ్యవసాయ మార్కెట్‌ వద్ద హమాలీల ఆధ్వర్యంలో ఏర్పాటు చేసిన మే డే వేడుకల్లో మంత్రులు పొంగులేటి శ్రీనివాస్‌రెడ్డి, తుమ్మల నాగేశ్వరరావు పాల్గొన్నారు. లక్షలాది మంది కార్మికుల త్యాగాలు ఈదేశ నిర్మాణంలో ఉన్నాయని మంత్రులు అన్నారు. కార్మికులు బీఆర్ఎస్‌ను వదిలించుకుని కాంగ్రెస్‌ను తెచ్చుకున్నారని చెప్పారు. ఇందిరమ్మ రాజ్యంలో కార్మికులకు మేలు చేసే విధంగా నిర్ణయాలు ఉంటాయని వివరించారు. ఈసందర్భంగా భారత్ రాష్ట్ర సమితి కార్మిక సంఘం నుంచి కొంత మంది ఐఎన్‌టీయుసీలో చేరారు. మంత్రులు వారికి పార్టీ కండువాలు కప్పి ఆహ్వనించారు.
ఘనంగా కార్మికుల దినోత్సవ వేడుకలు
కార్మిక హక్కులను కాలరాసే ప్రభుత్వాలను ప్రతిఘటించాలి : బీజేపీ ప్రభుత్వం తీసుకొచ్చిన కార్మిక కోడ్‌లకు వ్యతిరేకంగా జరిగిన పోరాటాన్ని స్ఫూర్తిగా తీసుకొని ముందుకు సాగాల్సిన అవసరం ఉందని సీపీఎం పోలిట్‌ బ్యూరో సభ్యుడు బీవీ రాఘవులు అన్నారు. మే డే దినోత్సవాన్ని పురస్కరించుకొని హైదరాబాద్ ఆర్టీసీ క్రాస్‌ రోడ్‌లోని ఎంబీ భవన్‌లో ఆయన జెండాను ఆవిష్కరించారు. పితృస్వామ్యం, దోపిడీకి వ్యతిరేకంగా పర్యావరణ పరిరక్షణకు కార్మిక వర్గం అనేక పోరాటాలు చేసిందని గుర్తు చేశారు. ప్రస్తుత లోక్‌సభ ఎన్నికల్లో మళ్లీ భారతీయ జనతా పార్టీ అధికారంలోకి వస్తే కార్మిక కోడ్‌ల ప్రభావం మరింత పెరుగుతుందని అన్నారు. ఈ నేపథ్యంలోనే ఆ పార్టీని నిరోధించడానికి కార్మికవర్గం నిర్మాణాత్మకంగా ముందుకు సాగాలని బీవీ రాఘవులు పిలుపునిచ్చారు.
వరంగల్ జిల్లా నర్సంపేట డివిజన్ పరిధిలో మే డే వేడుకలను ఘనంగా నిర్వహించారు. పట్టణంలోని కార్మిక సంఘాల నేతలు జెండాను ఎగురవేసి ప్రపంచ కార్మికుల ఐక్యత వర్ధిల్లాలని నినాదాలు చేస్తూ, ర్యాలీ నిర్వహించారు. కార్మికుల హక్కులను కాలరాసే విధంగా కేంద్ర ప్రభుత్వం వ్యతిరేక విధానాలను అవలంబిస్తుందని నాయకులు ఆరోపించారు. హక్కుల సాధన కోసం కార్మికులందరూ ఏకమై ఉద్యమాలు చేసే రోజే వస్తుందని అన్నారు.
