Hydra Crossed ORR Limits and Focus on Ibrahimpatnam : హైదరాబాద్ మహానగరంలో ప్రభుత్వ స్థలాల పరిరక్షణ, విపత్తుల నిర్వహణ కోసం రెండు నెలల కిందట ఏర్పాటైన హైడ్రా ఆక్రమణదారుల్లో దడ పుట్టిస్తోంది. చెరువుల ఎఫ్టీఎల్, బఫర్ జోన్లతోపాటు పార్కులు, ప్రభుత్వ స్థలాలను ఆక్రమించి నివాసం కోసం కాకుండా వ్యాపార నిమిత్తం చేపట్టిన నిర్మాణాలను నేలమట్టం చేస్తోంది. ఇప్పటి వరకు గ్రేటర్ పరిధితోపాటు శివారు ప్రాంతాల్లో 26 చోట్ల అక్రమ నిర్మాణాలను తొలగించి కోట్లాది రూపాయలు విలువ చేసే 119 ఎకరాలకుపైగా ప్రభుత్వ భూములను కబ్జాదారుల చెర నుంచి విడిపించింది.
ఈ క్రమంలోనే రాష్ట్ర ప్రభుత్వం హైడ్రాకు పూర్తి స్వేచ్ఛనిస్తూ విశేషాధికారాలు కల్పించింది. త్వరలోనే ప్రత్యేక ఆర్డినెన్స్ ద్వారా హైడ్రాకు చట్టబద్ధత కల్పించేందుకు సన్నాహాలు చేస్తోంది. అలాగే ఇటీవల ఔటర్‌ను ఆనుకొని ఉన్న 51 గ్రామాలను సమీపంలోని మున్సిపాలిటీల్లో విలీనం చేశారు. వాటి వరకు హైడ్రా పరిధి ఉంటుందని ప్రభుత్వం తెలిపింది. రోజురోజుకు మరింత బలాన్ని పుంజుకుంటున్న హైడ్రా, ఎన్ని విమర్శలు ఎదురైనా ముందుకు సాగుతోంది. హెచ్ఎండీఏ పరిధిలో ఉన్న చెరువులన్నింటిపై దృష్టి సారించిన హైడ్రా, గ్రేటర్ పరిధిలోని 185, హెచ్ఎండీఏలోని 3 వేలకుపైగా చెరువుల పరిస్థితిని ఎప్పటికప్పుడు సమీక్షిస్తోంది.
ఇబ్రహీంపట్నం చెరువులపై హైడ్రా దృష్టి : వాటిలో ఇప్పటికే 60 శాతంపైగా చెరువులు పూర్తిగా ఆక్రమణలకు గురికాగా అందులో అత్యంత దారుణంగా కుంచించుకుపోయిన వాటిని గుర్తించి తొలి ప్రాధాన్యతగా ఆక్రమణలు తొలగించేందుకు కృషి చేస్తోంది. రాజేంద్రనగర్, కూకట్‌పల్లి, శేరిలింగంపల్లితోపాటు సంగారెడ్డిలో పెద్దఎత్తున ఆక్రమ నిర్మాణాలను కూల్చివేస్తోంది. ఓవైపు కూల్చివేతలు, మరోవైపు క్షేత్ర స్థాయిలో అధికారుల సర్వేలతో ఎప్పటికప్పుడు ఆక్రమణలకు అడ్డుకట్ట వేసే ప్రయత్నం చేస్తోంది. ఇప్పటివరకు గ్రేటర్ పరిధిలోనే సాగిన హైడ్రా కూల్చివేతల ప్రక్రియ ఇకపై ఔటర్ దాటనున్నట్లు తెలుస్తోంది.
ఔటర్ రింగు రోడ్డుకు అతి సమీపంలోని ఇబ్రహీంపట్నం పెద్ద చెరువును హైడ్రా అధికారులు పరిశీలించారు. స్థానిక మున్సిపాలిటీ, నీటిపారుదల శాఖ అధికారులతో కలిసి ఇబ్రహీంపట్నం పెద్దచెరువు, చిన్న చెరువు పరిధిలోని ఆక్రమణలపై ఆరా తీశారు. వాటి సమీపంలో ఉన్న ఉప్పరిగూడ, పోచారం, చర్లపటేల్ గూడా గ్రామాల్లోని ఎఫ్టీఎల్, బఫర్ జోన్లలో ఉన్న నిర్మాణాలను తనిఖీ చేశారు. చెరువులోకి వరద నీరు మోసుకొచ్చే ఫిరంగినాలా సహా ఇతర వరద కాలువల వివరాలను స్థానిక నీటిపారుదల శాఖ అధికారులను అడిగి తెలుసుకున్నారు. వారంలోగా సమగ్ర వివరాలు హైడ్రాకు సమర్పించాలని ఆదేశించారు.
హైడ్రా రాకతో ఓఆర్ఆర్ అవతలివైపు అలజడి : ఇబ్రహీంపట్నం చెరువు ప్రాంతాన్ని హైడ్రా పరిశీలించిందని తెలియడంతో సమీప ప్రాంతాల్లో నివసిస్తున్న ప్రజల్లో ఆందోళన మొదలైంది. ఓఆర్ఆర్ వరకు మాత్రమే హైడ్రా చర్యలు ఉంటాయని భావించిన వారికి అనూహ్యంగా ఔటర్ దాటి హైడ్రా రంగంలోకి దిగడంతో ఒక్కసారిగా గుబులు మొదలైంది. హైదరాబాద్, రంగారెడ్డి, సంగారెడ్డి జిల్లాల పరిధిలోని ఓఆర్ఆర్ వరకు 2500 చదరపు కిలోమీటర్ల వరకు మాత్రమే హైడ్రా పరిధి ఉంటుందని ప్రభుత్వం జీవోలో స్పష్టం చేసింది.
సమయానుకూలంగా పరిధి పెంచుకోవచ్చని కూడా సూచించింది. ఈ క్రమంలోనే ఔటర్ దాటి ఉన్న జంట జలాశయాలపై కూడా దృష్టి సారించి పలు నిర్మాణాలను కూల్చివేసింది. దీంతో ఇతర ప్రాంతాల నుంచి కూడా పెద్ద ఎత్తున డిమాండ్లు, వందల్లో ఫిర్యాదులు రావడంతో వాటిని పరిశీలిస్తోన్న హైడ్రా, ఔటర్ అవతలివైపు ఉన్న చెరువులు, ప్రభుత్వ స్థలాలను కూడా పరిరక్షించాలని భావిస్తోంది. తాజాగా ఇబ్రహీంపట్నం చెరువుపై దృష్టి సారించడంతో హైడ్రా ఔటర్ దాటి కూడా పనిచేస్తుందనే విషయం మరింత బలపడింది.
