ఈ వేసవికి ఢోకా లేదు - భాగ్యనగరవాసులకు ప్రభుత్వం భరోసా - hyderabad Water board

Jalamandali review on Drinking Water : హైదరాబాద్ మహానగరంలో ఈ వేసవిలో తాగునీటికి ఎలాంటి ఢోకా లేదని రాష్ట్ర ప్రభుత్వం స్పష్టం చేసింది. నగరానికి నీటిని సరఫరా చేసే జలాశయాల్లో తగినంత నీటి నిల్వలున్నాయని వెల్లడించింది. గత వేసవి కంటే ఈ వేసవిలో 139 ఎంఎల్​డీల నీటిని అదనంగా సరఫరా చేస్తున్నట్లు పేర్కొంది. నాగార్జునసాగర్​లో 15 నుంచి, ఎల్లంపల్లి ప్రాజెక్టులో మే 1 నుంచి అత్యవసర పంపింగ్ ద్వారా నగరానికి తాగునీటిని సరఫరా చేయనున్నట్లు రాష్ట్ర ప్రభుత్వం తెలిపింది.

Jalamandali review on Drinking Water : రాష్ట్ర రాజధానిలో తాగునీటి సరఫరాపై విమర్శలు వెల్లువెత్తున్న నేపథ్యంలో ప్రభుత్వం స్పందించింది. నగర పౌరుల గొంతెండకుండా తాగునీటిని సరఫరా చేస్తున్నట్లు తెలిపింది. నగర ప్రజలకు తాగునీటి సరఫరా చేయడంలో ఎలాంటి సమస్య లేదని స్పష్టం చేసింది. ఈ మేరకు జలమండలి(Jalamandali) ద్వారా నివేదిక తెప్పించుకున్న ప్రభుత్వం, నగరంలో నీటి సరఫరా తీరు, జలాశయాల్లో నీటి మట్టాలు, అత్యవసర సరఫరాకు సంబంధించిన వివరాలను వెల్లడించింది.

నగరానికి ఉస్మాన్ సాగర్, హిమాయత్ సాగర్, మంజీర, కృష్ణా ఫేజ్ 1, 2, 3, గోదావరి ఫేజ్-1 ద్వారా తాగునీరు సరఫరా జరుగుతోంది. వాటిలో నుంచి ప్రస్తుతం 2 వేల 559 ఎంఎల్​డీల నీటిని సేకరిస్తున్న జలమండలి, జీహెచ్ఎంసీ(GHMC) పరిధిలో 1082.62 ఎంఎల్​డీలు, జీహెచ్ఎంసీ అవతలి ప్రాంతాలకు 1049.58 ఎంఎల్​డీలు, ఓఆర్ఆర్ వరకు ఉన్న మున్సిపాలిటీలు, కార్పొరేషన్లు, గ్రామపంచాయతీలు, గ్రేటెడ్​ కమ్యునిటీలు, కాలనీలకు 277.21 ఎంఎల్​డీలు, మిషన్ భగీరథకు 149.47 ఎంఎల్​డీల నీటిని సరఫరా చేస్తున్నట్లు ప్రభుత్వం ప్రకటించింది.

Hyderabad Water Board : అలాగే హైదరాబాద్ సమీపంలో ఉన్న ఉస్మాన్ సాగర్, హిమాయత్​సాగర్ జలాశయాల్లో సమృద్ధిగా నీటి లభ్యత ఉందని, వాటి నుంచి 24 ఎంఎల్​డీల నీరు మాత్రమే సరఫరా చేస్తున్నామని పేర్కొంది. వచ్చే నెలలో 40 ఎంల్​డీల వరకు జంట జలాశయాల నుంచి సేకరించేందుకు జలమండలి ప్రణాళిక రూపొందించినట్లు తెలిపింది. గతేడాది ఏప్రిల్ 3 నాటికి 2270 ఎంఎల్​డీల నీటి సరఫరా జరిగితే ఈ ఏడాది ఏప్రిల్ 3 నాటికి 2409.53 ఎంఎల్​డీల నీటిని సరఫరా చేస్తున్నామని వివరించింది.

గతంతో పోల్చితే అదనంగా మరో 139.53 ఎంఎల్​డీ నీటిని ప్రజలకు సరఫరా చేస్తున్నట్లు వెల్లడించింది. నాగార్జున సాగర్​లో(Nagarjuna sagar) హైదరాబాద్​లో తాగునీటి అవసరాల కోసం వచ్చే 4 నెలలకుగాను 5.60 టీఎంసీల నీరు అవసరం ఉందని అంచనా. ఈ లెక్కన సాగర్​లో 136.47 టీఎంసీల నీరు ఉంది. 131.66 టీఎంసీల వరకు డెడ్ స్టోరేజీ లభ్యత ఉంది. అయినా సరే అందులో 4.81 టీఎంసీల నీటిని వాడుకునే అవకాశం ఉంది.

అలాగే ఎల్లంపల్లి రిజర్వాయర్​లో నగర తాగునీటి అవసరాల కోసం వచ్చే 4 నెలలకు 3.33 టీఎంసీల నీరు అవసరం ఉండగా, ప్రస్తుతం 7.71 టీఎంసీల నీరు రిజర్వాయర్​లో అందుబాటులో ఉంది. డెడ్ స్టోరేజీ 3.31 టీఎంసీల వరకు వెళ్లినా నీటి లభ్యత ఉండనుంది. అందులో 4.40 టీఎంసీల నీటిని నగరానికి సరఫరా చేసుకోవచ్చని జల మండలి ప్రభుత్వానికి సూచించింది.