మెట్రో రెండో దశ డీపీఆర్​లు సిద్ధం - 5 మార్గాల్లో కలిపి 78.6 కి.మీ. - Hyderabad Metro Phase 2 dprs ready

Hyderabad Metro Rail Phase 2 Project : హైదరాబాద్ మెట్రో రైలు రెండో దశ డీపీఆర్​లు దాదాపు సిద్ధమయ్యాయి. ఈ డీపీఆర్​లలో 5 మార్గాల్లో కలిపి 78.6 కిలోమీటర్లు ఉంది. ఈ నెలాఖరు నాటికి రాష్ట్ర మంత్రిమండలి ఆమోదం పొందిన తర్వాత కేంద్రం అనుమతి కోసం పంపనున్నారు.

Hyderabad Metro Phase 2 : హైదరాబాద్​ మహానగరానికి ఓఆర్​ఆర్ తర్వాత మణిహారం లాంటి మెట్రో రైలు రెండో దశ వేగం పుంజుకుంది. రెండో దశకు సంబంధించి సమగ్ర ప్రాజెక్ట్ నివేదిక (డీపీఆర్)లు దాదాపుగా సిద్ధం అయ్యాయి. రెండో దశ మెట్రో రైలు 5 మార్గాల్లో కలిపి 78.6 కి.మీ.గా ఉండనుంది. ఇదే విషయమై ప్రతిపాదనలు కూడా గతంలోనే జరిగాయి. 60కి పైగా స్టేషన్లు వచ్చి, రూ.24,042 కోట్ల వ్యయం అవుతుందని ప్రభుత్వం అంచనా వేసింది. ఇప్పటికే ఈ మార్గాలపై పలుమార్లు సీఎం సూచనలు చేశారు. ఈ మేరకు రెండో దశ డీపీఆర్​లు వేర్వేరుగా రూపుదిద్దుకున్నాయి. ఈ డీపీఆర్​లను ఈనెలాఖరు నాటికి ప్రభుత్వానికి సమర్పించే అవకాశం ఉందని అధికారులు అంటున్నారు. అనంతరం మంత్రిమండలిలో ఆమోదం తెలిపి, వాటిని కేంద్రం అనుమతి కోసం పంపిస్తారు.

కొత్త మార్గాలన్నీ కొనసాగింపే : ఈ రెండు డీపీఆర్​లో సీఎం సూచించిన కొత్త మార్గాలన్నీ కొనసాగించారు. రెండో దశలో ప్రతిపాదించిన మార్గాలన్నీ మొదటి దశలోని మూడు కారిడార్లకు కొనసాగింపుగా ఉన్నాయి.

• కారిడార్-3కి కొనసాగింపుగా నాగోల్ నుంచి ఎల్బీనగర్, మైలార్​దేవుపల్లి, జల్​పల్లి, శంషాబాద్ విమానాశ్రయం వరకు 33.1 కిలోమీటర్లను పొడిగిస్తారు. ఈ మార్గంలో 22 స్టేషన్లను ప్రతిపాదించారు. ఈ కారిడార్​నే మైలార్​దేవుపల్లి నుంచి ఆరాంఘర్, రాజేంద్రనగర్ వ్యవసాయ వర్సిటీ సమీపంలో నిర్మించే కొత్త హైకోర్టు వరకు పొడిగిస్తారు. మూడు స్టేషన్లలతో దాదాపు 5 కిలోమీటర్లు దూరం ఉండనుంది.
• అలాగే ఈ కారిడార్-3కి మరోవైపు రాయదుర్గం నుంచి కాజాగూడ, నానక్​రాంగూడ, విప్రో సర్కిల్, ఫైనాన్షియల్ డిస్ట్రిక్, యూఎస్ కాన్సులేట్ మీదుగా కోకాపేట నియో పోలీసు వరకు 11.3 కిలోమీటర్ల వరకు విస్తరించడానికి డీపీఆర్​ను సిద్ధం చేశారు.
• కారిడార్-1కి కొనసాగింపుగా ఎల్బీనగర్ నుంచి హయత్​నగర్ వరకు 8 కిలోమీటర్ల మార్గాన్ని పొడిగిస్తారు.
• మరోవైపు కారిడార్-1కి రెండోవైపు పొడిగింపుగా మియాపూర్ నుంచి పటాన్​చెరు వరకు 14 కిలోమీటర్లు పొడిగించి, చందానగర్ ప్రాంతంలో కొంతదూరం డబుల్ డెక్​ని ప్రతిపాదించగా, ఈ మార్గంలో 10 స్టేషన్లు రానున్నాయి.
• కారిడార్-2లో భాగంగా ఎంజీబీఎస్ నుంచి ఫలక్​నుమా, చాంద్రాయణగుట్ట వరకు 7.5 కి.మీ. పొడిగిస్తారు. ఆరు స్టేషన్లు రానున్నాయి.

నాలుగో నగరంపై త్వరలో స్పష్టత : త్వరగా కేంద్రానికి రెండోదశ డీపీఆర్​లు చేరాలంటే ఫ్యూచర్​సిటీని మినహాయించాల్సి ఉంది. ఎందుకంటే విమానాశ్రయం నుంచి ఫ్యూచర్ సిటీకి 32 కిలోమీటర్లు దూరం ఉంటుంది. ఒకవేళ ఐదు కారిడార్లతో పాటు ఫ్యూచర్ సిటీ వరకు మెట్రో డీపీఆర్​ను కూడా కలిపి పంపాలని కేంద్రం కోరితే మెట్రో విస్తరణకు మరింత సమయం పట్టే అవకాశం ఉందని అధికార వర్గాలు అంటున్నాయి. ఈరెండు కలిపితే 110 కిలోమీటర్లు అవుతుంది. మరి ఏం జరుగుతుందో తెలియాలంటే కొన్ని రోజులు ఆగాల్సిందే.