15 కేంద్రాలు - 240 టేబుళ్లు - 1000 మంది సిబ్బంది - జంట నగరాల్లో ఓట్ల లెక్కింపునకు అంతా రెడీ - Hyderabad Lok Sabha Counting day

Lok Sabha Election 2024 Counting : రాష్ట్రవ్యాప్తంగా ఇప్పుడు జూన్​ 4వ తేదీన లోక్​సభ స్థానాల్లో జరిగే కౌంటింగ్​పైనే అందరి దృష్టి నిలిచింది. ముఖ్యంగా హైదరాబాద్​, సికింద్రాబాద్​ ఎంపీ స్థానాలనే ప్రధాన ఆకర్షణ. అయితే ఈ జంట నగరాల్లో కౌంటింగ్​కు సంబంధించి ఇప్పటికే అధికారులు లెక్కలు వేసుకున్నారు. మొత్తం 15 లెక్కింపు​ కేంద్రాలను ఏర్పాటు చేసి 240 టేబుళ్లను ఏర్పాటు చేశారు.

Lok Sabha Election 2024 Counting Arrangements in Hyderabad : రాష్ట్రవ్యాప్తంగా పార్లమెంటు ఎన్నిక ముగిసి దాదాపు 25 రోజులు గడుస్తోంది. ఇప్పుడు అందరి దృష్టి జూన్ 4న జరిగే కౌంటింగ్​ మీదనే ఉంది. 17 లోక్​సభ స్థానాలు ఒకేత్తు అయితే జంట నగరాల్లోని హైదరాబాద్​, సికింద్రాబాద్​ స్థానాలు ఏ పార్టీ కైవసం చేసుకుంటుందనే దానిపైనే రాష్ట్రవ్యాప్తంగా చర్చ నడుస్తోంది. అయితే ఈ జంటనగరాల ఓట్ల లెక్కింపుకు సంబంధించి రంగం సిద్ధమైంది. ఎన్ని టేబుళ్లపై ఓట్లను లెక్కిస్తారు, ఎంతమంది సిబ్బందితో ఈ లెక్కింపును పూర్తి చేస్తారు అనేవాటిపై కసరత్తు నేడు కొలిక్కి వచ్చింది. ఇలా తయారు చేసిన ప్రణాళిక నివేదికను రాష్ట్ర ప్రధాన ఎన్నికల అధికారి వికాస్​రాజ్​కు పంపించామని ఎన్నికల విభాగం స్పష్టం చేసింది.

రాష్ట్రంలో అందరి దృష్టిని ఆకర్షించిన హైదరాబాద్​ లోక్​సభ స్థానానికి ఓట్ల లెక్కింపు సమయంలో గొడవలు చోటుచేసుకునే అవకాశం ఉందన్న నేపథ్యంలో ఇందుకు తగిన ఏర్పాట్లను పకడ్బందీగా చేస్తున్నామని జీహెచ్​ఎంసీ అధికారులు తెలిపారు. అయితే ఈ జంట నగరాల్లోని పార్లమెంటు స్థానాల పరిధిలోని 3,986 పోలింగ్​ కేంద్రాల్లో ఓట్లు పోలయ్యాయి. అందుకు తగ్గట్లుగా హైదరాబాద్​, సికింద్రాబాద్​ పార్లమెంటు స్థానాల పరిధిలోని 15 చోట్ల కౌంటింగ్​ కేంద్రాలను ఎన్నికల అధికారులు ఏర్పాటు చేశారు. ఈ కేంద్రంలో జూన్ 4వ తేదీన ఓట్ల లెక్కింపు చేయనున్నారు.

ఈ రెండు పార్లమెంటు స్థానాల పరిధిలో 15 అసెంబ్లీ స్థానాలు ఉన్నాయి. హైదరాబాద్​ లోక్​సభ పరిధిలో ఏడు స్థానాలు, సికింద్రాబాద్​ పరిధిలో మరో ఏడు స్థానాలు ఉన్నాయి. మిగిలినది సికింద్రాబాద్​ కంటోన్మెంట్​ నియోజకవర్గం. ఈ కంటోన్మెంట్​కు ఉపఎన్నిక జరిగింది. అయితే ఈ శాసనసభకు సంబంధించిన ఓట్లను కూడా హైదరాబాద్​ జిల్లా అధికారులు లెక్కించనున్నారు. ఎంపీ విషయంలో మాత్రం ఈ నియోజకవర్గం మల్కాజిగిరి పార్లమెంటు స్థానంలో ఉంది. దీంతో లోక్​సభకు సంబంధించిన ఈవీఎంలను మేడ్చల్​ జిల్లా పరిధిలోని లెక్కింపు కేంద్రానికి తరలించారు.

జూబ్లీహిల్స్​లో 20 టేబుళ్లపై లెక్కింపు : దీంతో ఈ జంట నగరాల్లోని 15 అసెంబ్లీల ఓట్లను వేర్వేరుగా లెక్కించాలని ఇప్పటికే హైదరాబాద్​ ఎన్నికల అధికారి రోనాల్డ్​ రాస్​ నిర్ణయం తీసుకున్నారు. అయితే ఉపఎన్నిక ఫలితాన్ని మాత్రం కంటోన్మెంట్​ బోర్డు సీఈవోగా పర్యవేక్షణ చేయనున్నారు. హైదరాబాద్​, సికింద్రాబాద్​ ఎంపీ స్థానాల పరిధిలోని రిటర్నింగ్​ అధికారులు అసెంబ్లీ స్థానాల ఓట్లను రౌండ్లవారీగా తెప్పించుకుని తుది ఫలితాన్ని వెలువడిస్తారు. జూబ్లీహిల్స్​ నియోజకవర్గంలో ఎక్కువ పోలింగ్​ కేంద్రాలు ఉండడంతో అక్కడ 20 టేబుళ్లపై కౌంటింగ్​ చేయనున్నారు.

మిగిలిన 14 స్థానాల ఓట్లను 14 టేబుళ్లపై కలిపి మొత్తం 216 టేబుళ్లపై ఓట్లను అధికారులు లెక్కించనున్నారు. హైదరాబాద్​ పార్లమెంటు స్థానానికి తపాలా ఓట్లకు 14, సికింద్రాబాద్​ తపాలా ఓట్లకు 10 కలిపి మొత్తం 24 టేబుళ్లపై లెక్కింపు చేయనున్నారు. ఈ క్రమంలో ఒక్కో టేబుల్​ వద్ద ఓ సహాయకుడు, సూపర్​వైజర్​, మైక్రో ఆబ్జర్వర్​ ఉండనున్నారు. ఈ లెక్కింపులో మొత్తం 1000 మంది సిబ్బంది పాల్గొననున్నారు. ఎలాంటి గొడవలు జరగకుండా పటిష్ఠ బందోబస్తు ఏర్పాటు చేయనున్నారు. ఈ లెక్కింపు మొత్తం సీసీ కెమెరాల్లో రికార్డు చేయనున్నారు.