హైదరబాద్​లో భారీగా హవాలా మనీ - రూ. 1.21 కోట్ల నగదు సీజ్​ - Huge Hawala Money Seized in Hyd

Huge Hawala Cash Seized by Police : హైదరాబాద్​ నగరంలోని సుల్తాన్‌బజార్‌లో భారీ మొత్తంలో హవాలా డబ్బు పట్టుబడింది. వాహన తనిఖీలలో రూ.1.21 కోట్ల నగదును పోలీసులు గుర్తించి, సీజ్​ చేశారు. ఈ హవాలా డబ్బు తరలిస్తున్న ముగ్గురు నిందితులను పోలీసులు అదుపులోకి తీసుకొని విచారిస్తున్నారు.

Rs.1.21 Crore Hawala Cash Seized in Hyderabad : హైదరాబాద్ సుల్తాన్ బజార్ పోలీస్ స్టేషన్ పరిధిలో భారీగా హవాలా డబ్బు పట్టుపడింది. వాహన తనిఖీలలో రూ.1 కోటి 21 లక్షలు పట్టుబడింది. సుల్తాన్ బజార్ పోలీసులు మంగళవారం సాయంత్రం బొగ్గులకుంటలో వాహనాల తనిఖీలు చేపట్టారు. ఆ సమయంలో అటుగా బైక్ పై వస్తున్న ఇద్దరిని పోలీసులు ఆపేందుకు యత్నించారు. వారు పోలీసులను తప్పించుకొని పోవడంతో కోఠి హనుమాన్ టెక్డి వద్ద వారిని పోలీసులు పట్టుకున్నారు.

రాజస్థాన్ రాష్ట్రానికి చెందిన లక్ష్మణ్ (27), వసంత్ ( 24) లు అనుమానాస్పదంగా, ఓ బ్యాగ్​ను తరలిస్తుండటం గమనించారు. ఆ బ్యాగ్​ను తనిఖీ చేయగా అందులో కోటి రూపాయల నగదు పట్టుబడింది. వారిని విచారించగా, తమకు ఆ డబ్బుతో ఎలాంటి సంబంధం లేదని తన ప్రతినిధి ఆదేశాల మేరకు డబ్బులను సేకరిస్తున్నట్లు పేర్కొన్నారు. వారి ఇచ్చిన సమాచారంతో హనుమాన్ వ్యాయామశాల వద్ద ఉన్న ఓ అపార్ట్మెంట్​లో తనిఖీ చేయగా, అక్కడ రూ.21 లక్షలు పట్టుబడ్డాయి. అక్కడ ఉన్న మరోవ్యక్తి తరుణ్​ను విచారించగా, ముంబయిలో ఉండే బబ్లూ అనే హవాలా వ్యాపారి ఆదేశాల అనుసారంగా, తాము పని చేస్తున్నామని తరుణ్ తెలిపాడు.

నగరంలో ఉండే వ్యాపారుల నుంచి ఈ లావాదేవీలు సాగిస్తున్నట్లు ఈస్ట్ జోన్ డీసీపీ బాలస్వామి వెల్లడించారు. హవాలా డబ్బు తరలిస్తున్న ముగ్గురు నిందితులను అరెస్ట్ చేసి, వారి వద్ద నుంచి రూ.1.21 కోట్ల నగదు సీజ్ చేసి ఇన్​కమ్​ ట్యాక్స్ అధికారులకు అప్పగించినట్లు తెలిపారు. ప్రధాన నిందితుడు బబ్లూను త్వరలో అరెస్ట్ చేస్తామని డీసీపీ వివరించారు.