సీఎం సాబ్!! ప్రభుత్వంలో టీఎస్​ఆర్టీసీ విలీనం ఎప్పుడు? : హరీశ్​రావు

Harish Rao On TSRTC Merging in Govt : తెలంగాణ ఆర్టీసీ విలీనంపై సీఎం రేవంత్​ రెడ్డికి బీఆర్​ఎస్​ ఎమ్మెల్యే హరీశ్​రావు లేఖ రాశారు. విలీన తేదీని ప్రకటించాలని లేఖలో కోరారు. కార్మికులు, ఉద్యోగుల భద్రత, సంస్థ ఆర్థిక పరిస్థితులను దృష్టిలో ఉంచుకొని నాడు బీఆర్​ఎస్​ ప్రభుత్వం ఆర్టీసీ విలీన బిల్లు ప్రవేశపెట్టిందని గుర్తు చేశారు.

Harish Rao On TSRTC Merging in Govt : టీఎస్​ఆర్టీసీని ప్రభుత్వంలో విలీనం చేసే తేదీని ప్రకటించాలని మాజీ మంత్రి, బీఆర్​ఎస్​ ఎమ్మెల్యే హరీశ్​రావు డిమాండ్​ చేశారు. ఈ మేరకు సీఎం రేవంత్​ రెడ్డికి బహిరంగ లేఖ రాశారు. కార్మికులు, ఉద్యోగుల భద్రత, సంస్థ ఆర్థిక పరిస్థితిని దృష్టిలో ఉంచుకొని గత బీఆర్​ఎస్​ ప్రభుత్వం ఆర్టీసీని ప్రభుత్వంలో విలీనం చేసేందుకు వీలుగా అసెంబ్లీలో బిల్లు ప్రవేశపెట్టిందని లేఖలో పేర్కొన్నారు.

ఆర్టీసీ విలీన బిల్లు(TSRTC Merger Bill)ను కొన్ని వివరణలు కోరుతూ గవర్నర్​ తమిళిసై తొలుత ఆమోదించలేదని, ఆ తర్వాత రాష్ట్ర ప్రభుత్వం వివరణ ఇవ్వడంతో ఆమోదం తెలిపిన విషయాన్ని లేఖలో హరీశ్​రావు గుర్తు చేశారు. ఎన్నికల కోడ్​ నేపథ్యంలో అప్పట్లో అపాయింటె​డ్​ డేను ప్రకటించలేకపోయామని అన్నారు. కొత్త ప్రభుత్వం ఈ బిల్లును అమలు చేసే రోజును ప్రకటించాలని కోరారు.

Harish Rao letter to CM Revanth : కాంగ్రెస్​ ప్రభుత్వం ఏర్పడి రెండున్నర నెలలు అవుతున్నా ఇప్పటి వరకు ఆర్టీసీ విలీనం ఊసెత్తలేదని సీఎం రేవంత్​ రెడ్డికి రాసిన లేఖలో బీఆర్​ఎస్​ నేత హరీశ్​రావు పేర్కొన్నారు. ఆర్టీసీ బస్సుల్లో మహిళలకు ఉచిత ప్రయాణం పథకం(Women Free Bus) ప్రారంభించిన రోజే విలీనానికి సంబంధించిన జీవో విడుదల చేస్తారని కార్మికులు భావించారని అన్నారు. కానీ మహిళలకు ఉచిత బస్​ సర్వీసులు ప్రారంభించిన తర్వాత కండక్టర్లు, డ్రైవర్లకు పని భారం పెరిగిందని తెలిపారు. సిబ్బందిపై పని భారం కూడా పెద్ద మొత్తంలో పెరిగిందని లేఖలో హరీశ్​రావు వెల్లడించారు.

మరో 2000 బస్సులు కొనుగోలు చేయాలి : ఈ నేపథ్యంలో వారి సేవను గుర్తించి వెంటనే విలీన తేదీని ప్రకటించాలని రాష్ట్ర ప్రభుత్వానికి సూచించారు. ఇక బస్సుల్లో పెరిగే రద్దీని దృష్టిలో ఉంచుకొని మరో 2,000 బస్సులు కొనుగోలు చేయాలని డిమాండ్​ చేశారు. 2013లో జారీ చేసిన పీఆర్సీ బాండ్స్​కు పేమెంట్​ చేస్తామని కాంగ్రెస్​ ప్రభుత్వం ప్రకటించిందని హరీశ్​రావు గుర్తు చేశారు. బాండ్స్​కు అనుగుణంగా నగదు చెల్లింపులు చేయాలని రాష్ట్ర ప్రభుత్వానికి రాసిన లేఖలో విజ్ఞప్తి చేశారు.

గతంలో టీఎస్​ఆర్టీసీని ప్రభుత్వంలో విలీనం చేసేందుకు అసెంబ్లీలో గత బీఆర్​ఎస్​ ప్రభుత్వం బిల్లును ప్రవేశపెట్టిన విషయం తెలిసిందే. ఆ బిల్లును గవర్నర్​కు పంపగా కొన్ని వివరాలపై పూర్తి సమాచారం, వివరణ ఇవ్వాలని తమిళిసై సౌందరరాజన్ బిల్లును తిరిగి వెనుకకు పంపారు. ఆ తర్వాత ప్రభుత్వం బిల్లుపై పూర్తి వివరణ ఇవ్వడంతో ఆమె గ్రీన్ సిగ్నల్ ఇచ్చారు. అయితే ప్రస్తుతం రాష్ట్రంలో సర్కార్ మారడంతో ఆర్టీసీ ప్రభుత్వ విలీనం గొడవ ముందుకు సాగడం లేదు.