అయ్యప్ప స్వాములు ఆ మసీద్​లోకి వెళ్తే అపచారం : ఎమ్మెల్యే రాజా సింగ్

అయ్యప్ప స్వాములు వావర్ మసీద్​కు అయ్యప్ప స్వాములు వెళ్లకూడదన్న ఎమ్మెల్యే రాజా సింగ్ - నేరుగా శబరిమల వెళ్లాలని విజ్ఞప్తి

Goshamahal MLA Raja Singh Suggests Ayyappa Devotees Not To Visit Vavar Masjid : శబరిమల వెళ్లే మార్గంలో ఉన్న వావర్ మసీద్​కు అయ్యప్ప స్వాములు వెళ్లకూడదని గోశామహల్ ఎమ్మెల్యే రాజా సింగ్ కోరారు. అయ్యప్పలు నిష్టగా మాల వేసి, 41 రోజులు దీక్ష చేసి మసీద్​లోకి వెళ్తే అపచారమని అన్నారు. గతంలో తప్పకుండా వావర్ మసీద్​కు వెళ్లాలని తప్పుడు ప్రచారం చేశారని, అది కుట్రలో భాగమని తెలిపారు. అయ్యప్పలు నేరుగా శబరిమల వెళ్లి అయ్యప్ప స్వామిని దర్శించుకోవాలని రాజా సింగ్ విజ్ఞప్తి చేశారు.

భాగ్యనగర్ అయ్యప్ప సేవా సమితి (బాస్) ఆధ్వర్యంలో శబరిమలలోని నీలక్కల్ వద్ద ఈ నెల 7 నుండి 14 వరకు అయ్యప్ప స్వాములకు ఏర్పాటు చేయబోయే అన్నదానం కోసం కావలసిన సామగ్రిని తరలించే లారీని రాజా సింగ్ హైదరాబాద్​లో జెండా ఊపి ప్రారంభించారు. 16 ఏళ్లుగా భాగ్యనగర్ అయ్యప్ప సేవా సమితి సంస్థ అన్నదానం చేయడం అభినందనీయమని కొనియాడారు. కేరళ ప్రభుత్వంతో మాట్లాడి అక్కడ 10 ఎకరాల భూమిని తీసుకొని శబరిమల వెళ్లే తెలుగు రాష్ట్రాల అయ్యప్ప స్వాముల కోసం అక్కడ వసతి, భోజన సౌకర్యం కల్పించాలని, ఈ విషయంలో రెండు తెలుగు రాష్ట్రాల ముఖ్యమంత్రులు నారా చంద్రబాబు నాయుడు, రేవంత్ రెడ్డి చొరవ చూపాలని రాజా సింగ్ కోరారు.