మిర్చి రైతుల్ని నిలువునా ముంచేస్తున్న దళారులు - పట్టించుకునే నాథుడే కరవు!

Fraud in khammam Mirchi Market : మిరప రైతు పరిస్థితి రోజురోజుకు తీసికట్టులా తయారవుతోంది. అసలే దిగుబడులు గణనీయంగా పడిపోయి ఇబ్బందులు పడుతున్న అన్నదాతకు గిట్టుబాటు ధర కలగానే మిగులుతోంది. ఖమ్మం మార్కెట్‌లో మితిమీరుతున్న వ్యాపారుల మోసాలు సాగుదారును నట్టేట ముంచుతున్నాయి. పంట కొనేముందు ఓ ధర నిర్ణయించి, కాంటాలు వేసే సమయంలో మళ్లీ కొర్రీలు వేస్తున్నా పట్టించుకునే వారే కరవయ్యారు. విధిలేని పరిస్థితుల్లో వచ్చిన ధరకు తెగనమ్ముకుని దైన్యంగా రైతులు ఇంటి బాట పడుతున్నారు.

Fraud in khammam Mirchi Market : ప్రకృతి విపత్తులు, నకిలీ విత్తనాలు, ఎరువుల మాయాజాలాన్ని తట్టుకుని ఆరుగాలం శ్రమించి పండించిన పంటను విక్రయించేందుకు అన్నదాతలు అవస్థలు పడుతున్నారు. వ్యాపారులు సిండికేట్‌గా ఏర్పడి రైతు జేబుకు చిల్లు పెడుతున్నారు. మొదట ఒక రేటుకు బేరమాడి, కాంటా వేసే సమయానికి కుంటి సాకులు చెబుతూ భారీగా ధర తగ్గిస్తుండటంతో మిర్చి రైతు కుదేలవుతున్నాడు. ఖమ్మం మిర్చి మార్కెట్‌కు కొద్దిరోజులుగా లక్షల్లో మిరప బస్తాలు తరలివస్తున్నాయి. దేశీయంగా మంచి పేరు ఉండటంతో రాజస్థాన్‌(Rajasthan), బెంగాల్‌, విదేశాల నుంచి సైతం వ్యాపారులు వస్తుండటంతో కొనుగోళ్లు జోరుగా సాగుతున్నాయి.

ఇదే అదునుగా దళారులంతా సిండికేట్‌గా మారి జెండా పాటను తగ్గిస్తున్నారు. గత వారంలో రూ. 25 వేలు జెండా పాట ఉండగా సోమవారం ఒక్కసారిగా రూ. 20 వేల 800కు తగ్గించారు. వ్యాపారులు తమను మోసం చేస్తున్నారని రైతులు వాపోతున్నారు. ధర తగ్గించడమే కాకుండా ఖమ్మం మార్కెట్‌ మరో దగాకు తెరలేపారు. మొదట కమీషన్‌ ఏజెంట్‌ తీసుకొచ్చిన వ్యాపారి, మిర్చి బస్తాను కోసి నాణ్యతను బట్టి ధర నిర్ణయిస్తాడు. కొద్దిసేపటి తర్వాత కాంటా వేయడానికి వచ్చిన వ్యాపారి తరఫు సిబ్బంది ఐదారు బస్తాలు కోసి మిచ్చి నాణ్యంగా లేదంటూ మరో వెయ్యి వరకు ధర తగ్గిస్తున్నారు. ఓ వ్యాపారి బేరం ఆడిన తర్వాత మరో వ్యాపారి కొనేందుకు ముందుకు రావట్లేదు.

'ఇవాళ మిర్చి ధర 20 వేల 800 ఉన్నది. గత వారం రోజుల ముందు అయితే రూ. 22,450 ఉండేది. ఎలాంటి సరుకు తెచ్చిన ఇరవై వేలపైనే అమ్ముడుపోయింది. గత వారంతో పోలిస్తే ఈ వారం 1500 వందల నుంచి రెండు వేలు దాకా తగ్గింది. ధర తగ్గడానికి కారణాలేంటో తెలియడం లేదు' -రైతులు

Traders Cheating Mirchi Farmers in Khammam : గిట్టుబాటు కాకపోయినా కన్నీరు దిగమింగుకుని వచ్చిన ధరకు అమ్ముకుని రైతులు ఇంటిబాట పడుతున్నారు. వర్షాభావ పరిస్థితులు, నల్లి, తెల్లదోమ వంటి చీడ పీడలతో ఈ ఏడాది మిర్చి సరిగా పండలేదు. మిగ్‌జాం తుఫాను(Michaung Cyclone) ప్రభావంతో తాలుకాయలు ఎక్కువైపోయాయి. ఏకరాకు 3 క్వింటాళ్లకు మాత్రమే దిగుబడి వచ్చిందని రైతులు చెబుతున్నారు. క్వింటాకు కనీసం 25వేలు ధర పలికితేనే, తాము పెట్టిన పెట్టుబడికి గిట్టుబాటు అవుతుందంటున్నారు. వ్యాపారులు ధరలు తగ్గిస్తుండటంతో కొంత మంది రైతులు సరుకు అమ్మేందుకు మొగ్గు చూపట్లేదు. రవాణా ఖర్చులు నష్టపోయినా సరే ఇంటికి తీసుకెళ్తామని చెబుతున్నారు. ప్రభుత్వం, అధికారులు స్పందించి దళారుల మోసాన్ని అరికట్టాలని మిర్చి రైతులు కోరుతున్నారు.

'ఇక్కడ జెండా పాట ఒక రకంగా జరుగుతోంది, కొనుగోళ్లు ఒక రకంగా జరుగుతోంది. మా మిర్చి అయితే రూ.17 వేలకు ధర పలికింది. మిర్చిని వాళ్లు ఇష్టారాజ్యంగా తీసుకుంటున్నారు' -రైతులు