కొత్త కారుకు పూజలు చేసుకుని వస్తుండగా ప్రమాదం - నలుగురి మృతి

ఏపీలోని పల్నాడు జిల్లాలో రోడ్డు ప్రమాదం - నలుగురు మృతి - మరో నలుగురికి గాయాలు, ఆసుపత్రికి తరలింపు - ఘటనా స్థలిని పరిశీలించిన పోలీసులు

Road Accident in AP : తెలంగాణలోని కొండగట్టు ఆంజనేయ స్వామి దర్శనానికి వెళ్లి వస్తుండగా ఏపీకి చెందిన నలుగురు రోడ్డు ప్రమాదంలో మృతి చెందారు. మరో నలుగురు గాయాలతో ఆసుపత్రిలో చికిత్స పొందుతున్నారు. శనివారం యాదాద్రి భువనగిరి జిల్లా భూధాన్​ పోచంపల్లిలో కారు అదుపు తప్పి చెరువులోకి దూసుకెళ్లి ఐదుగురు యువకులు మృతి చెందిన దుర్ఘటన మరువక ముందే ఈ ఘటన జరగడం గమనార్హం. సమాచారం అందుకున్న పోలీసులు ఘటనా స్థలికి చేరుకొని సమాచారం సేకరించారు. కేసు నమోదు చేసి దర్యాప్తు చేస్తున్నారు.

పోలీసులు, స్థానికులు తెలిపిన వివరాల ప్రకారం ఏపీలోని పల్నాడు జిల్లా బ్రాహ్మణపల్లి సమీపంలో అద్దంకి-నార్కట్​పల్లి హైవేపై ఈ రోడ్డు ప్రమాదం జరిగింది. ప్రమాదం సమీపంలో గీతికా స్కూల్​ వద్ద చెట్టును కారు ఢీ కొట్టింది. ఈ ప్రమాదంలో నలుగురు మృతి చెందారు. మరో నలుగురికి గాయాలు అయ్యాయి. క్షతగాత్రులను పిడుగురాళ్లలోని ఆసుపత్రికి తరలించారు. అతి వేగమే ప్రమాదానికి కారణమని పోలీసులు ప్రాథమికంగా నిర్ధారించారు. ఘటనా స్థలాన్ని పోలీసులు పరిశీలించారు.

మృతుల వివరాలు : మృతులు శ్రీ పొట్టి శ్రీరాములు నెల్లూరు జిల్లా కావలి మండలం సిరిపురానికి చెందిన తుళ్లూరు సురేశ్​, యోగులు, వెంకటేశ్వర్లు, వనితగా పోలీసులు గుర్తించారు. తెలంగాణలోని కొండగట్టు ఆంజనేయస్వామి దర్శనానికి వెళ్లి వస్తుండగా ఈ ప్రమాదం జరిగింది. కొత్త కారుకు పూజలు చేయించేందుకు వీరంతా కొండగట్టుకు వెళ్లారని పోలీసులు తెలిపారు.

శనివారం ఐదుగురు యువకులు మృతి : ఈ నెల 7వ తేదీన యాదాద్రి భువనగిరి జిల్లా భూధాన్​ పోచంపల్లి మండలం జలాల్​పూర్​ వద్ద కారు అదుపు తప్పి చెరువులోకి దూసుకెళ్లిన ఘటన తెలిసిందే. ఈ ప్రమాదంలో ఐదుగురు యువకులు మృతి చెందారు. కారు చెరువులో మునగడంతో హైదరాబాద్​ ఎల్బీనగర్​లోని ఆర్టీసీ కాలనీకి చెందిన హర్ష, దినేశ్​, వంశీ, బాలు, వినయ్​ అనే ఐదుగురు యువకులు మృత్యువాత పడ్డారు. మృతదేహాలను భువనగిరి ప్రభుత్వ ఆసుపత్రికి తరలించి పోస్టుమార్టం నిర్వహించారు. మృతుల కుటుంబ సభ్యులు, స్నేహితులతో ఆసుపత్రి ప్రాంగణం కన్నీటి పర్యాంతమయింది. ఈ ప్రమాద సమయంలో కారులో ఆరుగురు యువకులు ఉండగా, మణికంఠ అనే యువకుడు చెరువులో కారు అద్దాలు పగులగొట్టి సురక్షితంగా ప్రాణాలతో బయటపడ్డాడు. వీరంతా 20 నుంచి 21 ఏళ్ల వయసు మధ్య ఉన్న యువకులు కావడం విశేషం.