Telangana Phone Tapping Case Update : రాష్ట్రంలో కలకలం సృష్టించిన ఫోన్ ట్యాపింగ్ కేసులో మరో కొత్త అంశం వెలుగులోకి వచ్చింది. కేసులో ప్రధాన నిందితుడిగా ఉన్న ఎస్ఐబీ(SIB) మాజీ చీఫ్ ప్రభాకర్రావును అరెస్టు చేసేందుకు పోలీసులు వారెంట్ జారీ చేయాలని నాంపల్లి కోర్టును కోరారు. ఈ క్రమంలో ఆయన న్యాయస్థానంలో మెమో దాఖలు చేశారు. అందులో కీలక విషయాలను తెలిపారు. మాజీ సీఎంది, తనది ఒకే కులం కావడం వల్లే ఎస్ఐబీ చీఫ్గా నియమించిన్నట్లు పోలీసులు చెబుతున్న దానిలో నిజం లేదన్నారు. తానూ కూడా కేసీఆర్ బాధితుడినేనని స్పష్టం చేశారు.
అప్పట్లో విపక్ష నేతలకు మద్దతిస్తున్నట్లు బీఆర్ఎస్ జిల్లా నేతలు చెప్పగా అక్కడి నుంచి సీఐడీకి బదిలీ చేశారని మెమోలో ప్రభాకర్రావు తెలిపారు. డీఐజీ నుంచి ఐజీగా పదోన్నతి కల్పించేందుకు ఐదు నెలలు ఆలస్యం చేశారన్నారు. ఎస్ఐబీలో ఎస్పీగా పదేళ్ల అనుభవం ఉండటం అప్పటి డీజీపీ సిఫార్సుతోనే ఎస్ఐబీ అధిపతిగా నియమించారని వివరించారు. ఎస్ఐబీ చీఫ్గా అప్పటి డీజీపీ, ఇంటెలిజెన్స్ చీఫ్ పర్యవేక్షణలోనే పని చేశానని, ప్రతి అంశాన్ని వారి నోటీస్లో ఉంచినట్లు చెప్పారు. అక్కడ స్వతంత్రంగా పని చేసే అధికారం ఉండదన్నారు.
SIB Ex Chief Prabhakar Rao on KCR : 30 ఏళ్ల సర్వీసులో ప్రతిభతో 2012లో ప్రతిష్ఠాత్మక ఐపీఎం, 2016లో పీఎంజీ, 2019లో పీపీఎం, ఆసాధారణ్ అసూచన కుశలత పదక్ పురస్కారాలు లభించినట్లు వివరించారు. తనపై వారంట్ జారీ చేయాలని కోర్టులో దర్యాప్తు సంస్థ దరఖాస్తు చేయడం సరికాదన్నారు. హైదరాబాద్లో శాశ్వత నివాసం ఏర్పాటు చేసుకున్నానని, ప్రస్తుతం అమెరికా ఇల్లినాయిస్ పొంటియాక్లో ఉన్నట్లు తెలిపారు. చికిత్స పూర్తయ్యాక తప్పనిసరిగా దర్యాప్తు అధికారి ముందు హాజరవుతానని చెప్పారు. ఈ క్రమంలో దర్యాప్తు సంస్థ దరఖాస్తును కొట్టివేయాలని కోరారు. ప్రభాకర్రావు తరఫున న్యాయవాది సురేందర్రావు కోర్టులో అఫిడవిట్ను సమర్పించారు.
జూన్ 26న అమెరికా నుంచి తిరిగి ప్రయాణం : నాలుకపై ట్యూమర్ వల్ల 2004-10 మధ్య కాలంలో పలు సర్జరీలు చేసుకోవాల్సిన వచ్చిందనీ, అప్పటి నుంచి క్రమం తప్పకుండా వైద్యులను సంప్రదిస్తున్నట్లు వివరించారు. కొవిడ్ ఇన్ఫెక్షన్ తర్వాత 2023 మార్చిలో గొంతు, ఊపిరితిత్తుల్లో సమస్యలొచ్చాయని, ఉద్యోగ విరమణ చేశాక అమెరికా వెళ్లి పూర్తిస్థాయిలో పరీక్షలు చేయించి చికిత్స పొందాలనుకున్నానన్నారు. అందుకే అమెరికా పౌరుడైన బంధువు రంగినేని విజయ్ ద్వారా నిపుణులైన వైద్యులని సంప్రదించినట్లు తెలిపారు. మింగడంలో అసౌకర్యం కలగడం సహా అలసట లక్షణాలు కనిపించడంతో భార్యతో పాటు అమెరికా వెళ్లేందుకు గత ఫిబ్రవరి 15న టికెట్లు బుక్ చేసుకున్నట్లు చెప్పారు. జూన్ 26న తిరిగి వచ్చేందుకు టికెట్ బుక్ చేసుకున్నట్లు ప్రభాకర్రావు తెలిపారు.
రాజీనామా చేసిన మూడు నెలల తర్వాత అమెరికారాగా ఫోన్ ట్యాపింగ్ గురించి అధికారులెవరూ సంప్రదించలేదని పేర్కొన్నారు. కేసు నమోదైన సంగతి తెలిశాక దర్యాప్తు అధికారి సహా ఉన్నతాధికారులను సంప్రదించినట్లు ప్రభాకర్రావు వివరించారు. మార్చి 22,23న దర్యాప్తు అధికారి, 23న హైదరాబాద్ పోలీస్ కమిషనర్, పశ్చిమ మండల డీసీపీని ఫోన్లో సంప్రదించి దర్యాప్తునకు సహకరిస్తానని చెప్పినట్లు పేర్కొన్నారు.
అమెరికాలో సంప్రదించాల్సిన నంబర్, మెయిల్ ఐడీలని కోర్టుకు సమర్పించినట్లు చెప్పారు. దర్యాప్తు అధికారులెవరూ కేసు గురించి సంప్రదించలేదనీ కుమారుడు నిషాంత్ రావు అమెరికా ప్రయాణ కారణాలపై దర్యాప్తు అధికారి అడిగిన సమాచారం అందించినట్లు చెప్పారు. సీఆర్పీసీ 91 సెక్షన్ కింద దర్యాప్తు అధికారి అడిగిన సమాచారాన్ని నిషాంత్రావు అందించారని చికిత్స పూర్తయి ప్రయాణం చేయవచ్చని వైద్యులు సూచించిన వెంటనే స్వదేశానికి తిరిగి వస్తానని కోర్టుకు సమర్పించిన మెమోలో ప్రభాకర్రావు పేర్కొన్నారు.
సీఆర్పీసీ 73 మోపడం సరికాదు : మరోవైపు ఫోన్ ట్యాపింగ్ కేసు దర్యాప్తు సాగుతుండగా పోలీసులు సీఆర్పీసీ 73 సెక్షన్ మోపడం సరికాదని మీడియా సంస్థ అధినేత శ్రవణ్ పేర్కొన్నారు. అరెస్టుకి అనుమతివ్వాలంటూ పోలీసులు దాఖలు చేసిన పిటిషన్ను కొట్టేయాలంటూ నాంపల్లి కోర్టులో పిటిషన్ దాఖలు చేశారు. భారత్కి తిరిగొచ్చేవరకు ఫోన్లో అందుబాటులో ఉంటానని స్వదేశానికి వచ్చాక దర్యాప్తునకు సహకారం అందిస్తానని తెలిపారు. ట్యాపింగ్ కేసులో తనకి ఎలాంటి పాత్ర లేదని చట్టవ్యతిరేక కార్యకలాపాలకి పాల్పడలేదని శ్రవణ్ తెలిపారు. చట్టానికి లోబడే హైదరాబాద్లో 35 ఏళ్లుగా ఉంటూ వ్యాపారం ప్రారంభించినట్లు చెప్పారు. ముందస్తు ప్రకారం 15 మార్చి 2024న లండన్ వెళ్లినట్లు వివరించారు.
ఆపరేషన్ 'పోల్ 2023 - కేఎంఆర్' - ఫోన్ ట్యాపింగ్ కేసులో వెలుగులోకి మరిన్ని కొత్త విషయాలు
ఫోన్ ట్యాపింగ్ కేసులో పోలీసుల కీలక నిర్ణయం - ప్రభాకర్రావు అరెస్టుకు కోర్టులో పిటిషన్
