ధరలు పెంచకుండా, ఖజానాకు ఆదాయం పెరిగే మార్గాలు అన్వేషించాలి : ఉప ముఖ్యమంత్రి భట్టి

ధరలు పెంచకుండా రాష్ట్ర ఖజానాకు ఆదాయం పెరిగే మార్గాలు అన్వేషిచాలని అధికారులను ఆదేశించిన ఉపముఖ్యమంత్రి భట్టి - గతంలో నిర్ధేశించుకున్న ప్రణాళికలు, వాటి ప్రగతిని నివేదించాలని చెప్పారు.

Deputy CM Bhatti Vikramarka Review Meeting With Officials : ధరలు పెంచకుండా, రాష్ట్ర ఖజానాకు ఆదాయం పెరిగే మార్గాలను అన్వేషించాలని ఉపముఖ్యమంత్రి మల్లు భట్టివిక్రమార్క అధికారులను ఆదేశించారు. ఆర్థికశాఖతో పాటు ఖజానాకు ఆదాయాన్ని అందించే వాణిజ్యపన్నులు, ఎక్సైజ్, ఆర్​అండ్​బీ, గనులు, పురపాలక, గృహనిర్మాణ శాఖల అధికారులతో డిప్యూటీ సీఎం సచివాలయంలో సమావేశమయ్యారు.

ఆదాయం పెంచే విషయమై ఆయా శాఖల ఉన్నతాధికారులతో సమీక్ష నిర్వహించారు. ఖజానాకు ఆదాయం పెంచేందుకు నిర్దిష్ట ప్రణాళికతో అధికారులు రావాలని భట్టి సూచించారు. గతంలో నిర్ధేశించుకున్న ప్రణాళికలు, వాటి ప్రగతిని నివేదించాలని చెప్పారు. లీకేజీలను అరికడుతూ ఆదాయం పెంచేందుకు వాణిజ్యపన్నుల శాఖ ప్రత్యేకంగా సమావేశం నిర్వహించాలని ఆదేశించారు.

మద్యం దుకాణాల్లో అధిక ధరలు : మద్యం దుకాణాల్లో కనీస ధర కన్నా అధిక రేట్లతో విక్రయాలు జరుగుతున్నాయని వాటిని అరికట్టేందుకు ఎన్​ఫోర్స్​మెంట్ విభాగాన్ని బలోపేతం చేయాలని స్పష్టం చేశారు. ఖజానాకు ఆదాయం పెంచేందుకు వివిధ శాఖలు సమన్వయంతో పనిచేయాలని, అందుకోసం ప్రత్యేకంగా ఉమ్మడి సమావేశాలు నిర్వహించాలని ఉప ముఖ్యమంత్రి తెలిపారు. అక్రమంగా తరలిస్తున్న ఇసుక రవాణా, పనుల ఎగవేతను కట్టడి చేయడానికి వాణిజ్య పన్నులు, ఆర్​అండ్​బీ, ఇతర శాఖల అధికారులు సమావేశమై నివేదిక రూపొందించాలని అన్నారు.

నిర్మాణాలు పూర్తిచేసి పెండింగ్​లో ఉన్నరాజీవ్ స్వగృహ, గృహనిర్మాణ శాఖ పరిధిలోని ఇండ్లను విక్రయించే అంశంపై త్వరగా నిర్ణయం తీసుకోవాలని సంబంధిత అధికారులకు సూచించారు. ఇసుక రీచ్​ల ద్వారా ఖజానాకు గరిష్ట ఆదాయం సమకూరేందుకు తీసుకోవాల్సిన చర్యలపై సీనియర్ అధికారులు సమావేశమై నివేదిక ఇవ్వాలని భట్టివిక్రమార్క ఆదేశించారు.