A Doctor in Trap Of Cyber Criminals : జగిత్యాల జిల్లా మెట్పల్లిలో ఓ పిల్లల వైద్యుడు సైబర్ నేరగాళ్ల వలలో పడి నిలువు దోపిడికి గురైన సంఘటన ఆలస్యంగా వెలుగులోకి వచ్చింది. స్టాక్ మార్కెట్లో ఇన్వెస్ట్ చేద్దామన్న ఆశతో ఏకంగా రూ.74 లక్షలకు పైగా పోగొట్టుకొని తలపట్టుకున్నాడు. పోలీసులు తెలిపిన వివరాలు ప్రకారం, సోషల్ మీడియా యాప్లో అనాధికార ఓ సైట్ లింకును డాక్టర్ ఓపెన్ చేశాడు.
ఇంతలో అవతలి వైపు నుంచి స్టాక్ మార్కెట్లో ఇన్వెస్ట్ చేయాలనుకుంటే ఏసీ మాక్స్ అనే అప్లికేషన్ డౌన్లోడ్ చేసుకొని యాక్సిల్ స్టూడెంట్ సీ 95 గ్రూపులో చేరండంటూ ఒక లింకు వాట్సాప్కు వచ్చింది. ఆ లింకును ఓపెన్ చేసి ఇన్వెస్ట్ చేయడం ప్రారంభించాడు. విడతల వారీగా మొత్తం రూ.22 లక్షలు పెట్టుబడి పెట్టాడు. తర్వాత ఐపీఓ సబ్స్క్రైబ్ చేసుకోవాలని వాట్సప్ కాల్ రావడంతో తన దగ్గర డబ్బులు లేవని బదులిచ్చాడు.
అప్పు చేసి రూ.50 లక్షలు చెల్లించి : జమ చేసిన డబ్బులు సరిపోతాయని నమ్మించడంతో సదురు వైద్యుడు ఐపీఓ సబ్స్క్రైబ్ చేశాడు. ఆ వెంటనే రూ.50 లక్షలు కట్టాలని లేదంటే క్రెడిట్ స్కోర్ పడిపోతుందని, లైఫ్ రిస్క్లో పడుతుందని కాలర్ చెప్పడంతో తన వద్దనున్న డబ్బులతో పాటు అప్పు చేసి రూ.50 లక్షలు చెల్లించాడు. జూన్ 26న ఐపీఓలో పెట్టిన పెట్టుబడి లాభం రూ. కోటి 27 లక్షలకు పెరిగిందని మళ్లీ ఇంకో ఐపీఓ సబ్స్క్రైబ్ చేసుకోవాలని వాట్సప్ కాల్ వచ్చింది.
తన వద్ద డబ్బు లేదని తన డబ్బులు విత్ డ్రా చేసుకుంటానని చెప్పాడు. అలాగైతే 20% సర్వీస్ టాక్స్ చెల్లించాలని విత్ డ్రా చేసుకునే మొత్తం రూ.కోటి 27 లక్షలలో 30% డిపాజిట్ చేయాలనడంతో వైద్యుడు కంగుతిన్నాడు. దీంతో తాను మోసపోయినట్లు గుర్తించిన వైద్యుడు గత నెల నాలుగున క్రైమ్ విభాగానికి, 13న స్థానిక మెట్పల్లి పోలీస్ స్టేషన్లో ఫిర్యాదు చేశాడు. పోలీసులు కేసు నమోదు చేసుకుని దర్యాప్తు చేస్తున్నట్లు మెట్పల్లి డీఎస్పీ ఉమామహేశ్వరరావు తెలిపారు.
"ఒక డాక్టర్ అయి, ఉన్నత చదువులు చదివి ఇటువంటి సైబర్ క్రైమ్లో ఇరుకుంటున్నారు. ఈ సైబర్ క్రైం చేసేవాళ్లు జార్ఖండ్, గుజరాత్ సహా ఇతర రాష్ట్రాల నుంచి పదో తరగతి కూడా పూర్తి చేయని కొందరు కేటుగాళ్లు ల్యాప్టప్లతో ఈ మోసాలకు పాల్పడుతున్నారు. సోషల్ మీడియాలో ఈ లింక్లు పంపి, అకౌంట్లో ఉన్న సొమ్మునంతా స్వాహా చేస్తుంటారు. ఇందులో ముఖ్యంగా చదువుకున్న వాళ్లే వారి ఉచ్చులో పడి, చాలా వరకు మోసపోతున్నారు."- ఉమామహేశ్వరరావు, మెట్పల్లి డీఎస్పీ
రూ.10వేలకు 20 వేలు వస్తాయన్నారు - చివరకు రూ.10కోట్లు కొట్టేశారు - Investment Fraud in Karimnagar
