Clash Between Forest Officials and Podu Farmers : అటవీ శాఖ భూముల్లో చెట్లు, పొదలను నరికి పోడు వ్యవసాయం చేస్తున్నారన్న సమాచారంతో అధికారులు వెంటనే అక్కడ వెళ్లి వారిని అడ్డుకునేందుకు ప్రయత్నించారు. ఈ క్రమంలో అధికారులకు, గ్రామస్థులకు మధ్య తీవ్ర వాగ్వాదం చోటుచేసుకుంది. ఈ వాగ్వాదంలో తోపులాట జరిగింది. కుమురం భీం ఆసిఫాబాద్ జిల్లా రెబ్బెన మండలం తుంగెడ గ్రామ శివారులోని రిజర్వ్ ఫారెస్ట్లో ఈ ఘటన జరిగింది.
పోలీసులు తెలిపిన వివరాల ప్రకారం : తుంగెడ గ్రామ శివారులోని రిజర్వ్ ఫారెస్ట్ అటవీ శాఖ భూములలో తుంగెడ గ్రామస్థులు చెట్లు, పొదలను నరికి అటవీ భూమిలో పోడు వ్యవసాయం చేయాలని నిర్ణయించారు. ఇందుకోసం ఆ భూమిని చదును చేయడానికి గ్రామస్థులు పెద్ద సంఖ్యలో అక్కడి చేరుకుని చెట్లను నరకడం ప్రారంభించారు. ఈ విషయం తెలుసుకున్న అటవీ అధికారులు ఘటనా స్థలానికి చేరుకున్నారు. అటవీ భూమిని చదును చేస్తున్న వారిని అడ్డుకునే ప్రయత్నం చేశారు. ఈ క్రమంలో గ్రామస్థులకు, అటవీ శాఖ అధికారులకు మధ్య మాట మాట పెరిగి వివాదం చోటుచేసుకుంది. అధికారులకు, గ్రామస్థులకు మధ్య తోపులాట జరిగింది. ఈ తోపులాటలో పలువురికి గాయాలు అయ్యాయి. అక్కడ ఘర్షణ వాతావరణం చెలరేగింది.
