New Residential Vidyalayas in Telangana : తెలంగాణలో 7 జవహర్ నవోదయ విద్యాలయాల ఏర్పాటుకు కేంద్రం ఆమోదం తెలిపింది. దీనిపై కేంద్రమంత్రి కిషన్రెడ్డి ప్రధాని మోదీకి కృతజ్ఞతలు తెలిపారు. మోదీ అధ్యక్షతన దిల్లీలో శుక్రవారం జరిగిన కేంద్ర కేబినెట్ సమావేశంలో ఈ నిర్ణయం తీసుకున్నారని పేర్కొన్నారు. ఈ నిర్ణయం పట్ల యావత్ తెలంగాణ ప్రజలతో పాటుగా, వ్యక్తిగతంగా తనకు చాలా సంతోషంగా ఉందని అన్నారు. రాష్ట్రంలో నూతన జవహర్ నవోదయ విద్యాలయాలను ఏర్పాటు చేయాలని కోరుతూ గతంలో కేంద్ర విద్యాశాఖ మంత్రి ధర్మేంద్ర ప్రధాన్ను పలుమార్లు విజ్ఞప్తి చేసినట్లు ఆయన గుర్తు చేశారు.
దాదాపు రూ.340 కోట్లతో ఈ విద్యాలయాలను ఏర్పాటు చేయనున్నారు. దీంతో 4000 విద్యార్థులు ఇందులో చదువుకోవచ్చని కిషన్ రెడ్డి అన్నారు. అలాగే 6 నుంచి 12వ తరగతి వరకు హాస్టల్ వసతితో సహా అత్యున్నతమైన ప్రమాణాలతో కూడిన విద్యను అందించనున్నట్లు కేంద్రమంత్రి కిషన్రెడ్డి తెలిపారు. మరోవైపు 330 మందికి కొత్తగా ఉపాధి లభించనుందన్నారు.
కేబినెట్ మీటింగ్ : శుక్రవారం జరిగిన కేంద్ర కేబినెట్ సమావేశంలో ఆర్థిక వ్యవహారాల కేబినెట్ కమిటీ దేశవ్యాప్తంగా ఏడు రాష్ట్రాల్లో 28 నవోదయ విద్యాలయాలను ఏర్పాటు చేయాలని నిర్ణయించింది. అందులో 7 నవోదయాలను తెలంగాణకు కేటాయించింది. ఈ 28 విద్యాలయాల ఏర్పాటుకు 2024-29 మధ్యకాలంలో సుమారు రూ.2,359 కోట్లు ఖర్చు అవుతుందని అంచనా వేసింది.
జవహర్ నవోదయ విద్యాలయాలు :
- ఈ విద్యాలయాల ఏర్పాటుకు 2024-29 మధ్యకాలంలో సుమారు రూ.2,359 కోట్లు ఖర్చు అవుతుందని అంచనా.
- ఇందులో మూల ధన వ్యయం రూ.1,944 కోట్లు కాగా, పాఠశాలల నిర్వహణకు రూ.415 కోట్లు
- ఇవి పూర్తిస్థాయి రెసిడెన్షియల్ పాఠశాలలు
- ఇక్కడ బాల, బాలికలు ఉమ్మడిగా చదువుకోవడానికి వీలు
- గ్రామీణ ప్రాంత విద్యార్థులకు అత్యధికంగా అవకాశం
- ప్రవేశపరీక్ష ద్వారా ప్రవేశాలు
- 6 నుంచి 12వ తరగతి వరకు ప్రతిభావంతమైన విద్యార్థులకు నాణ్యమైన విద్య
30 ఏళ్ల తర్వాత ఇప్పుడే మంజూరు : 1993 తర్వాత కొత్త నవోదయ పాఠశాలలు తెలంగాణకు మంజూరు అయ్యాయి. రాష్ట్రంలో ఇప్పటివరకు ఏర్పాటైన పాఠశాలల్లో 1986-87లో రెండు, 1987-88లో ఐదు, 1991-92లో ఒకటి, 1993-94లో మరొకటి ఏర్పాటు అయ్యారు. ఆ తర్వాత ఒక్కటీ కూడా తెలంగాణకు రాలేదు. తాజాగా 2024-25లో ఏకంకా ఏడు రెసిడెన్షియల్ పాఠశాలలను మంజూరు చేశారు. ఇప్పటికే ఉన్న 9 పాఠశాలల్లో 4,287 మంది చదవగా వారిలో బాలలు 2,566, బాలికలు 1,721 మంది ఉన్నారు. వారిలో గ్రామీణ విద్యార్థులు 3,684, పట్టణ ప్రాంతవాసులు 603 మంది ఉన్నారు.
7 కొత్త విద్యాలయాలు :
- నిజామాబాద్
- జగిత్యాల
- మేడ్చల్-మల్కాజిగిరి
- భద్రాద్రి కొత్తగూడెం
- సంగారెడ్డి
- సూర్యాపేట
- మహబూబ్నగర్
ఇప్పటికే ఉన్న పాత విద్యాలయాలు : కరీంనగర్, కుమురంభీం ఆసిఫాబాద్, నాగర్కర్నూల్, నల్గొండ, కామారెడ్డి, వరంగల్, రంగారెడ్డి, సిద్దిపేట, ఖమ్మం
