'కూల్​ రూఫ్'​ వాడండి ఇంటిని చల్లబరచడమే కాదు - విద్యుత్​ ఆదా కూడా చేస్తుంది - Benefits of Cool Roofs

Benefits of Cool Roofs in Summer : వేసవికాలం వచ్చిందంటే వేడి నుంచి ఉపశమనం కోసం ఎయిర్ కండిషనర్లు, ఎయిర్ కూలర్ల వాడకం పెరిగిపోతుంది. దీంతో విద్యుత్ బిల్లులు తడిసి మోపెడవుతాయి. ఈ ఖర్చు తగ్గించుకోవాలంటే కూల్ రూఫింగ్ చక్కని పరిష్కారం అంటున్నారు నిపుణులు. విద్యుత్ బిల్లు కూడా ఆదా అవడంతో ప్రజలు వీటి ఏర్పాటుపై ఆసక్తి చూపిస్తున్నారు.

Benefits of Cool Roofs in Summer : ప్రస్తుతం వేసవి ప్రారంభంలోనే 40 డిగ్రీల ఉష్ణోగ్రత నమోదవుతోంది. ఇళ్లు, కార్యాలయాలు, వాణిజ్య భవనాల్లో ఉండలేని పరిస్థితి ఏర్పడుతోంది. చల్లదనం వేసవి కోసం ఏసీలు, కూలర్ల వినియోగం పెరుగుతోంది. వీటి నిర్వహణ ఖర్చు భరించలేనివారు చలువ పైకప్పు (కూల్‌ రూఫ్‌) ఏర్పాటు చేసుకునేందుకు ఆసక్తి చూపిస్తున్నారు. దీనివల్ల భవనం లోపల వేడి తగ్గడంతో పాటు విద్యుత్తు ఆదా చేసుకోవచ్చు. కొత్త నిర్మాణాలతో పాటు పాత భవనాలకు ఇది పనికొస్తుంది. దీనివల్ల గది లోపలి 4-5 డిగ్రీలు, పైకప్పు ఉపరితల ఉష్ణోగ్రత 15-18 డిగ్రీలు తగ్గుతుందని నిపుణులు తెలిపారు.

Importance of Cool Roof in Summer : నిర్మాణంలో ఉన్న భవనాలకు ఆధునిక సాంకేతికత ద్వారా పైకప్పు నిర్మాణ సమయంలో ప్రత్యేక రసాయనాలు వాడటం ద్వారా సూర్యకిరణాలు తిరిగి వాతావరణంలోకి పరావర్తనం చెందుతాయి. ఫలితంగా వేడి తగ్గుతుంది. దీనివల్ల విద్యుత్​ బిల్లులు తగ్గుతాయి. ఇది పర్యావరణహితమైనది. మన దేశంలో 6 శాతం మంది ప్రజలు ఏసీలు వాడుతున్నారని మరో పదేళ్లలో ఇది 20 రెట్లు పెరుగుతుందని రీజెన్సీ ఎండీ సత్యేంద్ర ప్రసాద్ అన్నారు. విద్యుత్ వినియోగం పెరిగి ప్రభుత్వాలపై అధిక భారం పడటమే కాకుండా పర్యావరణానికి కూడా హాని చేస్తుందని తెలిపారు.

Cost of Cool Roof in House : టైల్స్‌ను ఉపయోగించి చలువ పైకప్పు ఏర్పాటు చేసుకోవాలనుకుంటే చదరపు అడుగుకి రూ.100 నుంచి రూ.120 వరకు వెచ్చించాల్సి ఉంటుంది. ఇవి 80 శాతం సూర్యకిరణాలను పరావర్తనం చేస్తాయి. విభిన్న రంగులు, డిజైన్‌లు, సైజుల్లో అందుబాటులో ఉన్న వీటిని అమర్చేందుకు చదరపు అడుగుకు రూ.25 నుంచి రూ.60 వసూలు చేస్తున్నారు. కప్పుపై నాచు పేరుకోకుండా శుభ్రం చేసుకుంటూ, వర్షం నీరు నిల్వ లేకుండా చూస్తే 25 ఏళ్ల పాటు ఇవి మన్నికగా ఉంటాయని తయారీదారులు చెబుతున్నారు. ఇది వేసవిలోనే కాదు, శీతాకాలంలోనూ ఉష్ణోగ్రతలను హెచ్చుతగ్గులు కాకుండా చూస్తాయని తెలిపారు.

Tips for Home Cool in Summer : తెలంగాణలో గత ఏడాది కూల్ రూఫ్ పాలసీని బీఆర్​ఎస్ ప్రభుత్వం తెచ్చింది. అది పూర్తిగా అమలు కాలేదు. తమిళనాడులో ఐక్యరాజ్య సమితి పర్యావరణ హిత కార్యక్రమాన్ని అమలు చేస్తున్నారు. పూర్తి స్థాయిలో ప్రతి ఒక్కరూ కూల్ రూఫ్ టైల్స్​ను ఉపయోగించేలా అక్కడి ప్రభుత్వం చొరవ తీసుకుంది. కానీ తెలుగు రాష్ట్రాల్లో దీనిపై చాలా మందికి అవగాహన లేదు. ఉష్ణోగ్రత 2 డిగ్రీల కంటే ఎక్కువ పెరిగితే భూమి మీద వ్యవసాయం చేయటం కూడా కష్టమని పారిస్ క్లైమేట్ కాన్ఫరెన్స్ కాప్​-28 సదస్సులో చర్చకు వచ్చింది. వీటి వాడకం వల్ల దీర్ఘకాలంలో విద్యుత్ బిల్లుల ఖర్చు తగ్గడమే కాదు పర్యావరణానికి కూడా మేలు జరుగుతుంది. ఇప్పుడిప్పుడే నగరాల్లో వీటికి ఆదరణ పెరుగుతోందని నిపుణలు చెబుతున్నారు.