Telangana DSC Exam Hall Ticket Issue : ఈ నెల 18 నుంచి ఆన్‌లైన్‌ విధానంలో డీఎస్సీ పరీక్షలు ప్రారంభం కానున్నాయి. అందుకు సంబంధించి హాల్ టికెట్లను విద్యాశాఖ ఇప్పటికే విడుదల చేసింది. గత కొంతకాలంగా పరీక్షలను వాయిదా వేయాలంటూ డీఎస్సీ అభ్యర్థులు ఆందోళన చేస్తున్నప్పటికీ, ప్రభుత్వం పరీక్షలను నిర్వహించాలని నిర్ణయించింది. తాజాగా హాల్టికెట్ల విషయంలో విద్యాశాఖ తీరుపై అభ్యర్థుల్లో ఆందోళన నెలకొంది. తాము ఒక జిల్లాలో దరఖాస్తు చేసుకుంటే, మరో జిల్లాలోని పోస్టుకు ఆప్షన్లు ఇచ్చుకున్నట్లుగా చూపించడంతో అభ్యర్థుల్లో ఆందోళన నెలకొంది.
ఉపాధ్యాయ ఉద్యోగ పరీక్ష కోసం జారీ చేసిన హాల్టికెట్ల గందరగోళంతో అభ్యర్థుల్లో ఆందోళన నెలకొంది. ఒక జిల్లాలో డీఎస్సీకి దరఖాస్తు చేసిన వారికి, మరో జిల్లాలో పోస్టుకు అప్లై చేసుకున్నట్లుగా హాల్ టికెట్లో రావడంతో అభ్యర్థులు కంగుతింటున్నారు. ఏం చేయాలో పాలుపోక ఆందోళన చెందుతున్నారు. మంచిర్యాల జిల్లా జన్నారం మండలం కలమడుగు గ్రామానికి చెందిన శ్రీపెల్లి జ్యోత్స్న మంచిర్యాల జిల్లాలో ఎస్జీటీ పోస్టుకు దరఖాస్తు చేసుకుంది. ఈ నెల 19న డీఎస్సీ పరీక్ష ఉండగా, ఆమె నల్గొండ జిల్లాలో పోస్టుకు దరఖాస్తు చేసుకున్నట్లు హాల్ టికెట్ జారీ అయ్యింది. పరీక్ష కేంద్రాన్ని ఆదిలాబాద్‌ జిల్లా మావలలో కేటాయించారు.
కరీంనగర్‌ జిల్లా వీణవంక మండలం కొర్కల్‌కు చెందిన పొరెడ్డి సౌజన్య డీఎస్సీలో అదే జిల్లాలో ఎస్‌ఏ పోస్టుకు దరఖాస్తు చేసుకుంది. కరీంనగర్‌లో ఈ నెల 24న పరీక్ష ఉండగా, హాల్ టికెట్లో మాత్రం ఖమ్మం జిల్లాలో పోస్టుకు అప్లై చేసుకున్నట్లుగా ఉంది. ఈ విషయంపై హెల్ప్‌డెస్క్‌కు ఫిర్యాదు చేశామని, చాలా మందికి ఇలాగే తప్పుగా వచ్చాయని సౌజన్య తెలిపారు. దీనిపై విద్యాశాఖ అధికారులు విచారణ జరిపి పొరపాటును సరిచేయాలని కోరారు. ఇప్పటికే ప్రభుత్వం డీఎస్సీ పరీక్షా షెడ్యూల్ను విడుదల చేసింది. జులై 18 నుంచి ప్రారంభం కానున్న పరీక్షలు, ఆగస్టు 5వ తేదీతో ముగుస్తాయి. అందుకు తగ్గట్లుగా అధికారులు ఏర్పాట్లు చేశారు.
| తెలంగాణ డీఎస్సీ హాల్‌టికెట్ www.schooledu.telangana.gov.in డౌన్‌లోడ్‌ చేసుకోండి |
ఒకే రోజు 2 పరీక్షలు ఉంటే ఒకేచోట రాయొచ్చు - డీఎస్సీ అభ్యర్థులకు సూపర్ గుడ్న్యూస్ - TS DSC Exam Rules
