Andhrapradesh Liquor Prices 2024 : ఈ నెల 16 నుంచి ఆంధ్రప్రదేశ్లో నూతన మద్యం విధానం అమల్లోకి రానుంది. ఈ తరుణంలో భారత్లో తయారయ్యే విదేశీ మద్యం (ఐఎంఎఫ్ఎల్) బాటిల్ ఎమ్మార్పీ ధరపై రాష్ట్ర ప్రభుత్వం కీలక నిర్ణయం తీసుకుంది. విదేశీ మద్యం బాటిల్ ఎమ్మార్పీ ధరపై అదనపు ప్రివిలేజ్ ఫీజును విధిస్తూ సవరణ చేసింది. దీన్ని ఆ రాష్ట్ర గవర్నర్ ఆమోదించారు. ఆయన ఆమోదం మేరకు గెజిట్ నోటిఫికేషన్ను ఎక్సైజ్ శాఖ ముఖ్య కార్యదర్శి ముఖేశ్ కుమార్ మీనా విడుదల చేశారు. అదననపు ప్రివిలేజ్ ఫీజు కింద ఎమ్మార్పీ ధరల్లో చిల్లర కాకుండా రూ.10 పెంచుతూ రాష్ట్ర ప్రభుత్వం సవరణ చేసింది.
ఎలా లెక్కిస్తారు : ఈ లెక్కన చూసుకుంటే బాటిల్ ఎమ్మార్పీ ధర 150.50 ఉంటే దాన్ని రూ.160కి పెంచుతారు. పెంచిన ఈ రూ.10 ప్రివిలేజ్ ఫీజు. క్వార్టర్ బాటిల్ ధర రూ.90.50గా ఉంటే ఏపీఎఫ్ కలిపి దాని ధర రూ.100 అవుతుందని అధికారులు తెలిపారు. ప్రభుత్వ ఆదేశాల మేరకు క్వార్టర్ బాటిల్ ధర రూ.99కే నిర్ధారించారు. అందుకే రూ.100 ధరలో రూ.1ని మినహాయించి విక్రయిస్తారని ప్రభుత్వం స్పష్టం చేసింది.
మద్యం దుకాణాలకు దరఖాస్తులు 90 వేల పైనే : ఆంధ్రప్రదేశ్లో నూతన మద్యం పాలసీ విధానం తీసుకొచ్చిన విషయం తెలిసిందే. ఈ క్రమంలో మద్యం దుకాణాల లైసెన్సుల కోసం దరఖాస్తులు అత్యధికంగా వచ్చాయి. నూతన మద్యం దుకాణాలకు దరఖాస్తులు ఈ నెల 11తో ముగిశాయి. 90 వేల పైనే మద్యం దుకాణాలకు దరఖాస్తులు వచ్చాయని ప్రభుత్వ వర్గాలు చెబుతున్నారు. ఈ దరఖాస్తుల ద్వారా రాష్ట్ర ఖజానాకు రూ.1800 కోట్లు సమకూరినట్లు సమాచారం. దరఖాస్తులను పరిశీలించి ఈ నెల 14న అయా జిల్లాల కలెక్టర్ల పర్యవేక్షణలో మద్యం షాపుల కోసం లాటరీ వేయనున్నారు. ఈ నెల 16 నుంచి నూతన మద్యం విధానం తీసుకొచ్చి ప్రైవేటు షాపులు నడపనున్నారు.
వామ్మో! ఏందిరా సామీ - 11 రోజుల్లో రూ.1057 కోట్ల మద్యం తాగేశారా!
ఏపీలో 3,396 మద్యం దుకాణాలకు 90 వేలకు పైనే దరఖాస్తులు - ఆదాయం ఎంతో తెలుసా?
