రోడ్​ సైడ్​ బండ్ల వద్ద చిరుతిండ్లు తింటున్నారా? - వాటి తయారీ గురించి తెలిస్తే ఆవైపు కూడా వెళ్లరు!

నగరంలో విచ్చలవిడిగా ఆహార కల్తీ - బస్తీలు, శివారుల్లోని రేకుల షెడ్లలోని బట్టీల్లో నాసిరకం తిను బండారాల తయారీ - ఇష్టమొచ్చిన పేర్లతో ప్యాకింగ్​ చేసి అమ్మకాలు

Adulterated Food Making in Hyderabad : ప్రస్తుతం జనాలు అంతా బిజీబిజీ లైఫ్​ను గడుపుతున్నారు. ఈ క్రమంలో ఏదైనా పనిని చేయాలనుకుంటే టైం సరిపోదని చెప్పి, కొన్నిసార్లు ఆహారాన్ని కూడా బయటే తినేస్తున్నారు. ఇలా బయట ఫాస్ట్​ ఫుడ్స్​, హోటళ్లు, రెస్టారెంట్లు, చిరు బండ్ల వద్ద ఏ టైంలో చూసినా రద్దీగానే ఉంటుంది. కొన్నిసార్లు ఏంటి జనాలు ఇంటి దగ్గర వండుకోవడం మానేశారా అనే ప్రశ్న చాలా మందిలో తలెత్తుతుంది. అయితే ఇలా బయట బిర్యానీ, ఫ్రైలు అంటూ బాగానే తింటున్నారు. కానీ అవి వేటితో తయారు చేస్తారు? రుచికి ఏం కలుపుతున్నారు? ఇంతకీ అవి తాజావేనా అనే ఆలోచన ఎవరికైనా వచ్చిందా? మనం ఆర్డర్​ చేయగానే వచ్చేస్తున్నాయి. రుచిగా ఉంటున్నాయని తినేస్తున్నాం. కానీ అవి వేటితో తయారు చేస్తున్నారో తెలిస్తే దెబ్బకు అటువైపు వెళ్లడమే మానేస్తారు.

నగరంలోని బస్తీలు, శివారు ప్రాంతాల్లో ఆహార కల్తీ విచ్చలవిడిగా సాగుతోంది. చిన్న రేకుల షెడ్లు ఏర్పాటు చేసి, బట్టీలు వేసి నాసిరకం తిను బండారాలను భారీగా తయారు చేస్తున్నారు. వీటిని ఇష్టం వచ్చిన పేర్లతో ప్యాకింగ్​ చేసి, జనాలకు విక్రయిస్తున్నారు. ఇలాంటి విక్రయాలు ఎక్కువగా పేదలు, మధ్య తరగతి ప్రజలు నివాసం ఉండే ప్రాంతాల్లో జరుగుతున్నాయి. ఇటీవల చింతలబస్తీలోని ఓ ఇంట్లో తయారైన మోమోస్ తిన్న మహిళ ఏకంగా ప్రాణాలనే విడిచింది. మరో 60 మంది ఆసుపత్రి పాలయ్యారు. ఈ దృశ్యాన్ని చూస్తే తెలిసిపోతుంది పరిస్థితులు ఎంత దారుణంగా ఉన్నాయోనని.

ఇవే కాకుండా ఇలాంటి ఘటనలు ఇంకా చాలానే ఉన్నాయి. 10 నెలల క్రితం అల్వాల్​లోని ఓ హోటల్​లో షవర్మా తిన్న వ్యక్తులు నాలుగుసార్లు అనారోగ్యానికి గురయ్యారు. ఈ కల్తీగాళ్లు చిన్న పిల్లలు తాగే పాలను సైతం వదలడం లేదు. పాతబస్తీలో తయారయ్యే కల్తీ పాలు, ఇతర డెయిరీ వస్తువులు తాగి రోగాల బారిన పడుతున్నారు.

పానీపూరి ఇలా తయారు చేస్తున్నారా? : ఆడవాళ్లు ఇష్టంగా తినే పానీపూరి విషయంలోనూ ఎంతో కల్తీ జరుగుతుంది. అవి తయారు చేసే ప్రదేశాలను చూస్తే ఇక లైఫ్​లో పానీపూరి జోలికి ఎవరూ వెళ్లరు. బోరబండ సైట్​-3 నవ భారత్​ నగర్​లో అల్లాపూర్​, పర్వత్​నగర్ తదితర ప్రాంతాల్లో పానీ పూరీల తయారీ కేంద్రాలు అనేకం. ఇక్కడ ఉపయోగించే నూనె, పిండితో పాటు ఆ వాతావరణం అంతా పూర్తిగా అనారోగ్యకరమే. ఇవి తిని బోరబండ, మాదాపూర్​లోని బస్తీల్లో తయారయ్యే పానీపూరిలు తినేవారికి విరేచనాలు, వాంతులు సాధారణం అయిపోయాయి. అలాగే నిత్యం వార్తల్లో నగరంలోని ఏదో ఒక మూల బిర్యానీలోనో, కూరల్లోనో కప్పలు, బొద్దింకలు, బల్లులు, ఎలుకలు వచ్చాయంటూ జీహెచ్​ఎంసీకి ఫిర్యాదులు వెళుతున్నాయి.

అవి తయారీ కేంద్రాలా లేక మరుగుదొడ్లా : శామీర్​పేట నుంచి గండిమైసమ్మ, కాటేదాన్​ నుంచి ఘట్​ కేసర్​ వరకు ఉన్న అనేక శివారు ప్రాంతాల్లో కోడి మాంసం, శెనగపిండి, మొక్కజొన్న పిండి వాటితో తయారు చేసే అనేక రకాల చిరుతిండ్ల తయారీ కేంద్రాలు ఉన్నాయి. వీటి తయారీని చూస్తే వాంతులు కావాల్సిందే. మరుగుదొడ్లకు తయారీ కేంద్రాలు ఒకేలా ఉంటాయంట. అక్కడే తినడం, కాలకృత్యాలు తీర్చుకోవడం, నిద్రించడం. ఇలానే బట్టీల్లో టన్నుల కొద్దీ తినుబండారాలను తయారు చేస్తున్నారు.

నకిలీ బ్రాండ్ మసాలా : మసాలా కలిపి అమ్ముతున్న మాంసాహార ముక్కల ప్యాకెట్లను అయితే లైసెన్సు లేకుండా, నకిలీ బ్రాండ్లతో, వారం పది రోజుల ముందు ప్యాకింగ్​ తేదీలతో సరకులను సిద్ధం చేస్తున్నారు. ఇలా తయారు చేసిన సరకును కొన్ని డెలివరీ సంస్థల ద్వారా విక్రయిస్తారు.

పట్టించుకొని ఫుడ్​ తనిఖీ అధికారులు : బేగంబజార్​లోని ఏ దుకాణాల్లో కల్తీ కిరాణాలు సరకులు, బస్తీల్లో లైసెన్సులేని తినుబండారులు, హోటళ్లు కుళ్లిన మాంసంతో వంటలు, ఇలాంటి సమాచారం అంతా జీహెచ్​ఎంసీ ఆహార కల్తీ నియంత్రణాధికారుల వద్ద ఉంటుంది. కానీ వారు చూసీ చూడనట్లు వదిలేస్తున్నారు. దాడులు, తనిఖీలు మాత్రం అరుదుగా చేస్తారు. ఈ అధికారులు నెలవారీ మామూళ్లు అందుతున్నాయని సమాచారం ఉంది.